4 недели назад 333
Мин, эн, биһиги Натальябыт
Билиҥҥи түргэн тэтимнээх үйэҕэ барытын ситиһэр киһи буоларга “многозадачность” диэн хаачыстыбаҕын сайыннарыах тустааххын дииллэр. Ол аата хас да дьыаланы тэҥинэн оҥоро, толоро сылдьар сатабылы этэллэр.
Ол эрээри төһө да оннукка дьулустарбыт, көмпүүтэр араас кыамталааҕын курдук, хас биирдии киһи эмиэ тус-туспа ис кыахтаах буоллаҕа эбээт. Ол иһин барытыгар тиийэр эниэргийэлээх дьону киһи сөҕө-махтайа көрөр. Оннук уҕараабат нэҥирдээх киһинэн Наталья Руфова буолар.
Кини дьоҥҥо сылаас сыһыана, олоххо тардыһыыта уонна тугу дьарыктанарыттан дуоһуйара – барыта бэйэтигэр күүс-уох буолан эргиллэн кэлэн, сэниэ буолан иҥэн, ол эрчимэ хас биирдиибитигэр Балааҕыйа баайа Барахсаанаттан алгыс буолан тиийэр.
Маны дьүөгэтэ Мария Кычкина олус бэркэ быһааран эппитэ: “Бу үбүлүөйгэ ыҥырыллыбыт ыалдьыттар бары “Мин эрэ Натальям” дии саныыргыт буолуо. Соннук кини, Данко курдук, төлөннөөх сүрэҕин уота барыбытыгар сыдьаайа тыгар”, – диэн.
Кырдьык, хаһааҥҥыттан мин кинилиин билсэбин? “Ил Түмэн” хаһыакка редактор эрдэхпинэ эбит. Оччолорго Алексей Калининскай-Луҥха Ырыа күнүн тутуорса сылдьар кэмэ этэ. Онон дьокутааттар хаһыаттарыгар ыстатыйаларын бэчээттэтэрэ. Кини миигин Наталья Ивановнаҕа тиксэрбитэ: “Ырыа туһунан бу кини суруйуоҕа”, – диэн баран, нүөмэрин ыыппыта.
Оччолорго саҥа өйдөөбүтүм – Хатастааҕы “Тускул” култуура киинэ ыытар үлэтин өрөспүүбүлүкэ дьоно тоҕо бары наһаа билэрбитин: Наталья Руфова курдук бэртээхэй кэрэспэдьиэннээх буоланнар, СМИ эйгэтигэр сонуннара ситимин быспакка тахса тураллар эбит. Кини бу биир тэрилтэ эрэ үлэтин сырдатар буолбатах, тэҥинэн бүтүн нэһилиэгин бүгүҥҥү устуоруйатын сурукка тиһэр.
Онон олус абыраллаах үлэһит. Маннык дьону киһи хаһан да биэнсийэҕэ олордуон баҕарбат, куруук айымньылаахтык үлэлии сылдьыахтарын саныыгын.
“Аны балалайкаҕа үөрэнэ сылдьар”, – диэбиттэригэр, “Арааһа, кини суукката 48 чаастаах быһыылаах”, — дии санаабытым: халлаан суһуктуйуута туран, алгыста айан тарҕат, онтон күн устата тустаах уонна уопсастыбаннай үлэлэргинэн сүүр, куонкурустаргын тэрий, биэриигин уһултар, ол кэннэ киэһэ хартыынаҕын кэлэн ситэрэн уруһуйдаа, иискин салҕаа, нэһилиэк кэнсиэригэр кытын, ырыаҥ куруһуоктарыгар сырыт, оҕуруоккун олорт, тэлгэһэҥ сибэккилэрин үүннэр, ол быыһыгар сериалга оонньоо, айымньыта, ыстатыйата суруй, кинигэ таһаартар, сиэннэргин көр… Дьэ, чахчы, “многозадачность”. Ол тэҥэ кэлэктиибэ, эҥээрдэһэр эйгэтэ да үгүс эбит: “тускуллара”, “арчылара”,“умкалара”, дьаһалтата, ДШИ-лэрэ, ансаамбыллара, суруналыыстара, артыыстара, суруйааччылара, сериаллара, устудьуоннааҕы доҕотторо, уруһуйдьуттара, иистэнньэҥнэрэ…
Олорго барыларыгар кини – биһиги Натальябыт. Бэйэтинэн толору эрэ киһи соннук бэрсэр айылгылаах буолар. Ол өрүтүн дьаһалта исписэлииһэ бэркэ бэлиэтээбитэ: “Кини иэс баайан дуу, туох эрэ иһин дуу көмөлөһөр буолбатах, көннөрү бэйэтин баҕатынан оҥорор. Оннук наар бэйэтиттэн тугу эрэ биэрэр уратылаах”, – диэн.
Ол бэрсибитэ бу 65 сааһын туолар дьоро киэһэтигэр махтал, таптал тыллара буолан иһилиннилэр, өссө да айа-тута сылдьарыгар баҕа санаа буолан этилиннилэр…
Анисия Иевлева, суруналыыс.
