1 месяц назад 1209
“Ол сад тыллар тоҥ буортан, таптал сылаас тыыныттан…”
Бүгүн тохсунньу 18 күнүгэр саха норуодунай поэта, прозаик, драматург, РФ култууратын үтүөлээх үлэһитэ, ССРС уонна СӨ суруйааччыларын сойуустарын чилиэнэ Иван Михайлович Гоголев-Кындыл төрөөбүт күнэ (1930–1998).
Кинини кытта ыкса алтыспыт, дьиэ кэргэнинэн доҕордоспут, хоһооннорун сыанаҕа, араадьыйаҕа ааҕан, киэҥ эйгэҕэ билиһиннэрбит, тиһэх суолугар сууйан-тэрийсэн атаарбыт киһинэн СӨ норуодунай артыыһа Зоя Багынанова буолар.
Айылҕаттан айдарыылаах улахан поэппыт аатын үйэтитиигэ Зоя Петровна күүскэ үлэлэһэр. Былырыын баччаларга суруйааччы төрөөбүтэ 95 сылынан П.А. Ойуунускай аатынан Саха тыйаатырын Алампа саалатыгар “Мин тапталым – поэзия” диэн хоһоонунан дьүһүйүүнү режиссер Валентина Якимеһынан туруортарбыта (сигэтэ https://blogi.nlrs.ru/93902/124302). Кындыл төрөппүт кыыһа Лена Гоголева худуоһунньук быһыытынан үлэлээбитэ уонна, биллэн турар, сүбэ-ама буолан көмөлөстөҕө.
Аны билигин Зоя Петровна бырайыагынан СӨ Национальнай бибилэтиэкэтин суруналыыстара Анисия Иевлева уонна Михаил Эверстов-Соргу киинэ уста сылдьаллар.
Айар үлэ биир уһуллуута Иван Михайлович кэргэнэ, аатырбыт агроном, селекционер учуонай Мария Алексеевна Черткова Покровскайга тэрийсибит садыгар, дьаабылыка маһа – яблоня тыллыытыгар, Саха тыйаатырын артыыстара кыттыылаах буолбута.
Ол каадыртартан аҕыйаҕы таҥан, “Ол сад тыллар тоҥ буортан, таптал сылаас тыыныттан…” диэн видеопоэзияны Бүлүүгэ Кындыл үбүлүөйдээх сылын түмүктүүр дьоро киэһэҕэ анаан бэлэмнээбиппит. Ону сэҥээрэ көрүҥ, бу туманнаах кыһыҥҥы тымныы күн сайыны санаан ылыҥ…
