2 недели назад 175
“Доруобуйа”: 20 сыл чэгиэн буолууну көҕүлээн
Кулун тутар 20 күнүгэр Мэҥэ Хаҥалас улууһун Балыктаах бөһүөлэгэр “Доруобуйа” уопсастыбаннай түмсүү тэриллибитэ 20 сыллаах үбүлүөйдээх тэрээһинэ олохтоох култуура дьиэтигэр буолан ааста.
Үөрүүлээх күнү “Ыллыкчаан” оҕо үҥкүү көрдөрүүлээх ансаамбылын (сал. Алина Говорова) орто бөлөҕүн кыргыттарын толоруутугар “Эрэкэ-дьэрэкэ” үҥкүү арыйда.
Ыҥырыылаах ыалдьыттарын, нэһилиэк олохтоохторун, биир дойдулаахтарын “Доруобуйа” түмсүү далбар хотуттара “Эҕэрдэ үҥкүүтүнэн” уруйдаан көрүстүлэр.
“Доруобуйа” түмсүү 20 сыллаах көхтөөх уонна ситиһиилээх үлэтин туһунан түмсүүбүт салайааччыта, Саха Өрөспүүбүлүкэтин үөрэҕин туйгуна, Саха Өрөспүүбүлүкэтин социальнай өҥөнү оҥорууга туйгуна, РФ уопсай үөрэхтээһиҥҥэ Бочуоттаах үлэһитэ, Саха Өрөспүүбүлүкэтин физическэй култууратын бастыҥ уопсастыбаннай инструктора Марфа Иннокентьевна Ноговицына билиһиннэрдэ.
Чөл олоҕу тутуһарга, доруобуйаны тупсарынарга ыҥыран, “Доруобуйа” түмсүү кыттыылаахтара үөрэ-көтө чэбдигирдэр хамсаныылары оҥорон көрдөрдүлэр.
“Ыллыкчаан” ансаамбыл салайааччыта Алина Говорова бу үөрүүлээх күнүнэн “Дьүкээбил уота” үҥкүүтүнэн эҕэрдэтин тиэртэ.
Салгыы дьоро күҥҥэ бэйэлэрэ тиктибит мааны таҥастарын кэтэн, “доруобуйалар” сыанаҕа тахсан хааман наскылдьыйбыттарын мустубут дьон ытыс тыаһынан биһирээбитин биллэрдэ.
“Мэҥэ нэһилиэгэ” тыа сирин тэриллиитин баһылыга Ньургун Габышев эҕэрдэтигэр “Доруобуйа” түмсүү бу 20 сыл устата өрүү инники күөҥҥэ сылдьарын, нэһилиэк уопсастыбаннай олоҕор күүс-көмө буоларын, нэһилиэкпит сайдыытыгар киллэрбит кылааттара үрдүктүк сыаналанарын бэлиэтээн эттэ уонна Ил Түмэн (Судаарыстыбаннай мунньах), Мэҥэ Хаҥалас улууһун баһылыга Дмитрий Тихонов грамоталарын, Мэҥэ нэһилиэгин баһылыгын эҕэрдэ суруктарын туттартаата.
Эҕэрдэ тылларын эттилэр: Маттатааҕы социальнай геронтологическай киин салайааччыта Александр Куприянов, көхтөөх уһун үйэлэнии лиидэрэ, үһүс көлүөнэ оскуолатын салайааччыта, Мэҥэ нэһилиэгин кураатара Людмила Заровняева-Стручкова, кини Мэҥэ Хаҥалас улууһун бэтэрээннэрин сэбиэтин салайааччыта Евдокия Решетникова эҕэрдэтин туттарда, Мэҥэ нэһилиэгин түөлбэлэрин, тэрилтэлэрин салайааччылара, “Эрэл” уопсастыбаннай түмсүү аатыттан Татьяна Цыденжапова, нэһилиэк бэтэрээннэрин сэбиэтин салайааччыта Елена Кычкина, Төҥүлүттэн анаан кэлбит биир дойдулаахпыт Евдокия Баишева.
Олохтоох култуура киинин кэлэктиибин аатыттан дириэктэр Любовь Кычкина “доруобуйалар” мэлдьи өйөбүл буолалларын иһин махтанна уонна анал өйдөбүнньүк бэлиэни бэлэх уунна.
Араас сылларга кыттан кэлбит уонна билигин дьарыктана сылдьар дьоммутугар ис сүрэхтэн эҕэрдэлээн туран, аймах билэ дьонноро өйдөбүнньүк бэлэхтэрин, тапталлаах оҕолорун ааттарыттан тыыннаах сибэкки дьөрбөлөрүн туттардылар.
“Доруобуйа” түмсүү кыттыылаахтара ытыктыыр салайааччыбытыгар Марфа Иннокентьевнаҕа, бу сыллар тухары бииргэ ыкса үлэлэспит баһылыктарбытыгар Ирина Черкашинаҕа, Александр Куприяновка, сахалыы таҥаспытын тиктиигэ көмө буолбут, мэлдьи сүбэ-ама биэрэр киһибит Светлана Кардашевскаяҕа уонна Любовь Кычкинаҕа махталы кытта сэмэй бэлэхтэрбитин туттардыбыт.
Үөрүүлээх тэрээһини ырыанан-тойугунан киэргэттилэр – Дария Андросова, Рима Фадеева,”Сайдыына” вокальнай ансаамбыл.
Үөрүүлээх түгэммитинэн тэриллибит фуршекка кыттыыны ылбыт ыалдьыттарбыт: “Доруобуйа” түмсүү өссө да сайда-үүнэ тур, элбэх батыһааччылары, өрүү да бу курдук нэһилиэккэ күүс-көмө буола туруҥ!” – диэн баҕа санааларын тиэртилэр.
Мария Захарова, Балыктаах.
