7 месяцев назад 3799
Саха кыыһа – Арассыыйа кэрэ куоларын куонкуруһугар
Быйыл “Мисс Россия-2025” национальнай куонкуруска Саха сириттэн Валентина Михайлова кыттар. Кини кимий? (ааҕаргытыгар хаартыскатын буолбакка, тиэкиһин таарыйан сыҕарытаҕыт)
Бастатан туран, Валентина – дойдумсах, дойдунаат, дойдуһа кыыс. Нууччалыы биир тылынан эттэххэ, патриот. Улаатар сааһыгар дьиэ кэргэнинэн Анапаҕа көспүттэрэ. Ол эрээри Валя Сахатын сиригэр талаһар буолан, Хотугулуу-Илиҥҥи федеральнай университекка туттарсан киирбитэ. Билигин омук тылын салаатыгар III кууруска үөрэнэр.
Дьиҥэр, киин үөрэх кыһаларыгар киирэр кыахтааҕа: ЕГЭ-лэрин үрдүк баалларга туттартаабыта, 90-тан тахсаҕа. Ол эрээри ХИФУ-ну талан, Кытайга атастаһыынан үөрэннэ, устудьуоннар араас күрэхтэһиилэригэр кыттар, уопсастыбаннай түмсүүлэргэ көхтөөхтүк сылдьар.
Манна даҕатан эттэххэ, Валентина Марха 1-кы нүөмэрдээх оскуолатын кыһыл көмүс мэтээллээх бүтэрбитэ. Тоҕо Мархаҕа диэтэргит, байыаннай дьайыылар буола турар сирдэриттэн чугас олорор сэрэхтээҕин иһин, ол дьыл дойдуларыгар кыстаабыттара.
СВО тиэмэтин таарыйбычча, Валентина аҕата – анал байыаннай эпэрээссийэ бэтэрээнэ. Аҕыйах хонуктааҕыта эрэ кэлбитэ. Кинини көрсөөт, Валя Москубаҕа “Мисс Россия” көппүтэ.
Валентина – элбэх оҕолоох дьиэ кэргэн улахан кыыһа. Бииргэ төрөөбүт төрдүөлэр. Онон кыра эрдэҕиттэн дьоһуннаах, эппиэтинэстээх.
Төһө да улаатар сааһыгар соҕуруу олордор, сахалыы саҥарар, төрөөбүт тылын уонна төрүт култууратын өрө тутар.
Аны наһаа үчүгэйдик үҥкүүлүүр. Оҕо сылдьан артыыс буолуон баҕарара. Ол иһин Ньургуйаана Шадрина Саха тыйаатырын иһинэн тэрийэн үлэлэппит “Күн оҕолоро” театральнай устуудьуйаҕа дьарыктаммыта.
Алын кылааска “Саха” НКИХ эдэр кэрэспэдьиэнэ этэ. Оҕолорго аналлаах биэрии ыытааччыта этэ.
Кыталык курдук кынталдьыйан хаамар уһун дьылыгыр уҥуохтаах кэрэ кыыһы оскуола саҕаттан улахан подиумнарга ыҥыран кытыннараллар. Оннооҕор соҕуруу олордоҕуна, Москубаҕа муода бэстибээлигэр кинини, саха кыыһын, талан ыыталлара. Соннук кини ирдэбилгэ эппиэттиир быһыылаах-таһаалаах, тупсаҕайдык туттар-хаптар.
2023 сыл бүтүүтэ Ставропольга буолбут “Мисс Студенчество России” күрэххэ ХИФУ аатыттан кыттан, “Вице Мисс Студенчество России” уонна “Мисс Грация” буолбута. “Мисс Россия” тэрийээччилэрэ онно кинини бэлиэтии көрөннөр, кастиҥҥа ыҥырбыттара. Оччолорго кини I куурус этэ. Билигин 20 саастаах.
Социальнай ситимҥэ Валяны @aalyavalya диэнинэн булаҕыт. Эбэтэ Валентина Дмитриевна-Алика аатынан ааттаммыт буолан, таптаан Аля-Валя дииллэрин иһин, ону ник оҥостубут.
Валя Тааттаттан тардыылаах – ийэтэ Уолба Боппосовтара, аҕата Чычымах Михайловтара.
Арассыыйа үрдүнэн 90 тыһыынчаттан тахса кыыс сайаапка биэрбит эбит. Валентина 50 финалист иһигэр киирэн, алтынньы 4 күнүгэр “Barvikha Luxury Village” кэнсиэртиир саалаҕа ыытыллар “Мисс Россия” куонкурус түмүктүүр түһүмэҕэр күрэхтэһээри сылдьар.
Валентина Михайлова туһунан сиһилии 2023 сыллаахха суруйбуппун ааҕыаххытын сөп, сигэтэ бу: https://blogi.nlrs.ru/93902/115253.
Сырдатта Анисия Иевлева.
