Мэндиэмэн 10 сыл күүппүт түгэнэ тосхойдо - Блоги Якутии

2 недели назад 4480

Мэндиэмэн 10 сыл күүппүт түгэнэ тосхойдо

Нерюнгри ыһыаҕар кэлбит дьон бары хаартыскаҕа түспүт сирдэрэ – “Ыһыах алгыһа” арт-дьүһүйүү.

Бу 5 миэтэрэ үрдүктээх скульптурнай ансаамбылы Тааттаттан төрүттээх маастар Илиан Павлов-Мэндиэмэн, Лариса Лаптева, Василий Винокуров буолан үһүөн оҥордулар.

–Эскииһэ аатырбыт худуоһунньук, билигин биһиги кэккэбитигэр суох Иннокентий Пестряков киэнэ. Ону мин пластилинынан объемнай гына оҥорон баран, 10 сылы быһа Олоҥхо ыһыаҕа ыытыллар улуустарыгар үҥүлүтэ сатаабытым да, бары аккаастаан испиттэрэ. Хата, бу Нерюнгри тэрийээччилэрэ сэҥээрэн, “Амикан” этнокомплекс саамай көстөр сиригэр – киирэр аартыктан тыргыллар аллея тиксэрэр тоҕойугар – олоҕун-оннун булла.

Скульптурнай ансаамбыл ааптара Илиан ПавловМэндиэмэн

Ыһыах диэн Дьөһөгөй айыыга сүгүрүүйү. Үрүҥ илгэ бырааһынньыга. Алгыс онно ананар. Ааттыын да, кымыһы ыһар буолан, ыһыах дэннэҕэ эбээт. Онон Сабыйа Баай Хотун саҥа төрөөбүт кулунчугу тутан турара – уйгу-быйаҥ бэлиэтэ.  Оттон Айыы Саарын Тойон кымыстаах чорооннооҕо – илгэлээх сайын туһугар алгыс көтөҕөр. Иннилэригэр иһит-хомуос толору астааҕа – байылыат олох түстэниитэ. Ыҥыыр диэн биһигини аһатар, таҥыннарар сылгыбыт, миинэр миҥэ буолар аппыт сүрүн өйдөбүлэ.

Дьон маннык арт-эбийиэги сылы сыллаан оҥорор. Биһиги ыйы кыайбат кэмҥэ түүннэри-күнүстэри үлэлээн бүтэрдибит. Оруобуна ыһыах саҕаланыан эрэ иннинээҕи күн түмүктээтибит. Кыл мүччү. Онон өссө хат кырааскаланыаҕа, тупсарыллыаҕа.

Эр дьону кытта тэҥҥэ үлэлэспит Лариса Лаптева

Скульптурный полимербетон диэн ардахха-хаарга бэриммэт бөҕө матырыйаалтан чочуллан оҥоһулунна. Дьон-сэргэ сөбүлээтэ, онон сүргэбит көтөҕүлүннэ. Дьыала харчытыгар буолбатах. Ороскуота сабылынна да – бүттэ. Тоҕо диэтэххэ, сүрүнэ, идиэйэтигэр – талааннаах киһибит И. Пестряков уруһуйун үйэтитии, ыһыах ис хоһоонун биир дьүһүйүүнэн тиэрдии, 10 сыл турууласпыппын олоххо киллэрии, – диир Мэндиэмэн.

Олоҥхо ыһыаҕын түһүлгэтиттэн сырдатта: Анисия Иевлева

Добавить комментарий