7 месяцев назад 450
Сорук дьэҥкэ, үлэ саҕаланна
Сахалыы саҥаны сайыннарар саргылаах, сайдам-сайаҕас санаалаах оҕолор “Күн” хамсааһыннара бу саҥа үөрэх дьылыгар бастакы тэрээһиннэрин ыыттылар.
Ол курдук, балаҕан ыйын 20 күнүгэр Өрөспүүбүлүкэтээҕи интэринээт-лиссиэйгэ буолбут “Күн Саха Сирэ” тэрээһиҥҥэ “Күн” бу сыллааҕы былаанын торумнаатылар.
Билэрбит курдук, бу хамсааһын 2023 сылтан саҕаламмыта. Төрөөбүт тыл төлкөтүн түстүүр, туттуллар эйгэтин кэҥэтэр соруктаах тэриллибитэ.
Онтон ыла куоратынан, улууһунан сылдьан, “оҕолор оҕолору үөрэттилэр”, ол эбэтэр бэйэлэрин холобурдарынан сабыдыаллаан, сахалыы кэпсэтэр кэскиллээҕин бигэргэтэллэр.
Бу күн М.Е.Николаев аатынан 40-с №-дээх оскуола үөрэнээччилэрэ, салайааччылар Гоголева Любовь Алексеевна уонна Корнилова Гея Семеновна салалталарынан, тэрээһиҥҥэ көхтөөхтүк кытыннылар.
Барыта 8 улуустан уонна куорат 7 оскуолатыттан оҕолор түмсэн, бэйэ-бэйэлэрин кытта билистилэр. Үгэскэ кубулуйбут муҥха оонньуутугар кыттан дуоһуйдулар.
Сахабыт Сирин биллэр дьоно — спортсмен Николай Обоев уонна ырыаһыт Аман Анхаров, итиэннэ “Саха тыла 400” хамсааһынтан Алла Ноговицына кэлэн ыалдьыттаатылар. Кинилэр оҕолорго бэйэлэрин тустарынан сэһэргээтилэр, ситиһии кэлэр төрүөттэрин кэпсээтилэр уонна төрүт култуураны, төрөөбүт тылы өрө тутарга ыҥырдылар.
Бу кэпсэтии кэнниттэн оҕолор бэлэмнээн кэлбит “визиткаларын” көрдөрдүлэр. Онтон бөлөҕүнэн арахсан, «Саха тылын хайдах өрө тутуохха сөбүй?» диэн тиэмэҕэ стратегическай сессияҕа кытыннылар.
Түмүгэр уоттаах-күөстээх дискотека буолла! Оҕолор санаалара көтөҕүллэн, олус астыннылар. Бу маннык киэптээх тэриллэрэ – ыччаты көҕүлүүр, түмэр
Тэрээһин кэнниттэн салайааччылар 2025-2026 үөрэх дьылыгар сыллааҕы былааны ылынныбыт.
Оҕолор, учууталлар биир санаанан өрөспүүбүлүкэ хас биирдии оскуолатыгар “Күн” түмсүүнү тэрийэргэ эттилэр.
Онон сорук дьэҥкэ, үлэ саҕаланна.
Сырдатта Любовь Гоголева,
Дьокуускай куорат М.Е. Николаев аатынан 40-с оскуолатын учуутала
