3 месяца назад 76
Саха сирин тыатын иччитэ
Аныгы киһи иччи диэн тылы абааһыны-сибиэни эрэ кытта ситимниир. Дьиҥэр, иччи диэн билигин туттар хаһаайын диэн тылынан солбуйбут өйдөбүлбүтүн бэлиэтиир тыл буоллаҕа. Холобур, ыт иччитэ диэн өлбүт ыт абааһыта буолбатах, ыты бас билэр киһи 🙂
Бу күннэргэ Дьокуускайга “Тыа сирэ – омук дьылҕата” диэн бэрт сэргэх икки күннээх форум буолан ааста. Тыа хаһаайыстыбата оҥорон таһаарыытыттан саҕалаан тыаҕа олорор дьон санаатыгар, таһымыгар тиийэ кэпсэтиилэр буоллулар.
Сүрүн кэпсэтии Саха сирин тыатын хайдах иччилиибит диэн ыйытыы тула барда. Хайдах гынан саха ыччатын тыаҕа тохтотобут, хайдах гынан олох таһымын үрдэтэбит, хайдах гынан төрүт дьарыкпытын тутан хаалабыт, хайдах гынан кэлии дьонтон көмүскэнэбит, хайдах гынан сирбитин бэйэбит иччилээн, саха буолан, бур-бур буруо таһааран этэҥҥэ олоробут, хайдах гынан саҥа сокуоннарга сөп түбэһэбит эбэтэр тупсалларыгар көмөлөһөбүт диэн.
Саха итэҕэлигэр саха бу орто дойдуга айыылартан айдарыллан түһэр уонна бу дойдуну көстүбэт иччилэрбитин кытта тэҥҥэ иччилиир аналлаах диэн буолар. Дьэ бу сорукпутун толордорбут ханнык.
Дьон этиилэрин туһунан “Кыым” бүтэһик нүөмэрдэригэр ааҕыҥ (сотору саайтарыгар эмиэ таһаарыахтара), ону таһынан толору боротокуоллары ситимҥэ бэчээттиир былаан баар эбит, сурукка тиһилиннэҕинэ. Уонна оператордар устубуттара үтүүпкэ сотору тахсыаҕа, кэтии сылдьаарыҥ. Манна ону биллэриэхпит.
