Чурапчытааҕы киин библиотекаҕа "БИБЛИОНОЧЬ - 2023" ААХСЫЙА "ЧИТАЕМ ВМЕСТЕ" ДЕВИҺИНЭН ДЬОНУ-СЭРГЭНИ ТҮМЭ ТАРТА - Блоги Якутии

11 месяцев назад 312

Чурапчытааҕы киин библиотекаҕа “БИБЛИОНОЧЬ – 2023” ААХСЫЙА “ЧИТАЕМ ВМЕСТЕ” ДЕВИҺИНЭН ДЬОНУ-СЭРГЭНИ ТҮМЭ ТАРТА

Сааскы чаҕыл күммүт оту-маһы угуттаан, айылҕа уһуктар кэмигэр, ыам ыйын 17 күнүгэр улуустааҕы киин библиотека тэрийиитинэн ааҕыыны көҕүлүүр Бүтүн Арассыыйатааҕы 12-с төгүлүн ыытыллар “Библионочь – 2023” аахсыйа “Читаем вместе” девиһинэн бэрт сэргэхтик ыытылынна.

Тэрээһини бэйэлэрин хомоҕой тылларынан библиотека үлэһиттэрэ Сардаана Дьячковская уонна Римма Петрова иилээн-саҕалаан ыыттылар.

«Чуораанчык» уһуйаан иитиллээччитэ кырачаан Катя Никонова “Арай, арай кинигэ” диэн чаҕаархай ырыатын сэргии, үөрэ иһиттилэр.

Чурапчы улууһун библиотечнай ситимин дириэктэрэ, СӨ култууратын үтүөлээх, туйгун үлэһитэ Вера Аполлоновна Платонова мустубут дьону эҕэрдэлээн, тэрээһини сырдатан тыл эттэ. 2022 сыл түмүгүнэн библиотекаҕа куруутун сылдьар бэриниилээх ааҕааччыларбытыгар  анал ааттары туттарар “Созвездие лучших читателей” бастыҥтан бастыҥнарга махтал сурук, Анал аат, өйдөбүнньүк бэлэх, сибэкки дьөрбөтүн туттартаата. 

Сыл бастыҥ ааҕааччылара: «Почитатель истории» анал аат Мария Андреевна Герасимова“Многогранный читатель” анал аат Людмила Анатольевна Яковлева“Читатель краевед” Виктор Семенович Дьяконов“Почитатель художественной литературы” анал аат Михаил Афанасьевич Дьячковскай“Читающая семья” анал аат Елена Ивановна, Аман Михайлович, кыыстара Сайаана Винокуровтар“Любитель классики” анал аат Сардаана Старостина 8 “б” уонна «Перспективный читатель» анал аат Сардаана Сивцева 10 “а”, Чурапчытааҕы гимназия  үөрэнээччилэрэ ыллылар.

Ону тэҥэ,  ыытыллар бары тэрээһиннэргэ көхтөөхтүк кыттар, библиотека бастыҥ доҕотторугар махтал сурук туттарылынна. Сибэккилэри спонсордаабыт “Дом цветов” маҕаһыыҥҥа, Светлана Дмитриевна Александроваҕа уонна коллективыгар истиҥмахталбытын тиэрдэбит.

Наҕараадаламмыт ааҕааччылар ааттарыттан Виктор Дьяконов бэйэтин санаатын, эҕэрдэ тылын тиэртэ.

Саха Өрөспүүбүлүкэтигэр үлэ сылын чэрчитинэн ааҕааччыларбыт “Үлэ киһини киэргэтэр” үлэ туһунан хоһооннору уус-ураннык ааҕан иһитиннэрдилэр.

Бэйэлэрин эҕэрдэ ырыаларын тиэртилэр Семен Ноговицын, Аман Винокуров.

Саха норуотун төрүт үгэһин, итэҕэлин тарҕатааччы алгысчыт, арчыһыт Ая Николаевна Макарова – Айууна “Өбүгэ өһүллүбэт күүһэ” квантовай уйулҕа туһунан билиһиннэрдэ, көрдөрдө.

Сахалыы таҥаска аныгылыы көрүүнү киллэрэн, кэрэ көстүүлээх, дьон биһирэбилин ылар таҥастары тикпит эдэр талааннаах иистэнньэҥ Аина Анемподистова коллекциятын көрдөрдө.

РФ Президенын Гранын хаһаайката, “К красоте и здоровью вместе” бырайыак ааптара, педагогическай наука кандидата, доцент, СӨ физкультураҕа уонна спортка туйгуна, СӨ үөрэҕириитин туйгуна  Светлана Степановна Гуляева бырайыагын туһунан кэпсээтэ, эти- сиини чэбдигирдиигэ эрчиллиилэри көрдөрөн дьон интэриэһин тарта.

“Чурапчы нэһилиэгэ” муниципальнай тэриллии дьаһалтатын баһылыга Владимир Дмитриевич Сивцев бэйэтин эҕэрдэ тылын, библиотека араас тэрээһиннээх дьаһаллары ыытарын бэлиэтээн туран, библиотека биир бастыҥ үлэһитигэр Марфа Николаевна Кузьминаҕа “Чурапчы нэһилиэгэ – 375” түөскэ кэтиллэр знагы туттарда.

Бу күн “Ночной доЖор” кино-кафе үлэлээтэ. Тэрээһиҥҥэ кэлбиттэри библиотека кыргыттара итии чэйдээх, толору астаах үөрэ-көтө көрүстүлэр уонна мини-кофейня  “Сoffee-time” Саргылана Афанасьева  араас көрүҥ бурдук аһын, салааттары, минньигэстэри, кофе аҕалан атыылаата.  

Кинигэттэн киинэ буолбут кинигэ быыстапкатын уонна киинэ трейлердарын кэлбит дьон сэҥээрэ көрдүлэр, уларыстылар. 

“Селфи с книгой” фотозонаҕа кинигэлэри тутан хаартыскаҕа түстүлэр.

Быйыл В.С. Яковлев – Далан төрөөбүтэ 95 уонна “Дьикти саас” сэһэн бастакы бэчээттэнэн тахсыбыт кинигэтэ 45  сылларыгар, Арассыыйаҕа Учуутал уонна настаабынньык сылыгар аналлаах, ол кэмнээҕи олоҕу кэрэһэлиир кинигэлэринэн, таҥаһынан-сабынан, туттар малларынан уурбут-туппут курдук ис киирбэхтик оҥоһуллубут фотозонаҕа хаартыскаҕа түстүлэр. Ону таһынан ыччаттарга аналлаах фотозона дьон болҕомтотун тарта.

  

Хосторунан араас маастар кылаастар ыытылыннылар. Ол курдук, Евдокия Ванчулинтан “Бумажная лоза” кумааҕыттан корзинаны, Прокопий Екечьямовтан туойтан иһит онорууга маастар кылаастар, таролог – Айна Федороваттан Таро хаартынан сэрэбиэй, Ая Макарова – Айууна биирдиилээн дьону кытары көрүстүлэр, Луиза Кобельяноваттан “Нейрографика запускаем желание во Вселенную”, Чурапчытааҕы физическэй култуура уонна спорт институтун специалистара анал аппаратынан уопсай доруобуйа туругун көрдүлэр, “Игротека в библиотеке” остуол, оҕуруктаах өй оонньууларын оонньоотулар.

“Үтүөкэн айымньылар, кэрэхсэбиллээх геройдар” саха суруйааччыларын айымньыларыттан оруолунан аахтылар, “Уостан түспэт ырыалар”, “Чэйиҥ ыллыаҕыҥ” караокенан сүрэхтэн сүппэт ырыалары астына-дуоһуйа ыллаатылар, “Целый мир открывает Книга!”, “Стихи русских писателей-классиков” кинигэ  быыстапкалара турдулар.

Бэрт сэргэх тэрээһин ыытыллан ыалдьыттар бириэмэни билбэккэ, элбэххэ үөрэнэн, сэргэхсийэн, үөрэн-көтөн, библиотека үлэһиттэригэр махтанан тарҕастылар.

Сиһилии “Библионочь – 2023” тэрээһини ютуб каналбытыгар көрүҥ.

Бэлэмнээтилэр: Киин библиотека уонна

Клара Кузьмина.

Фоторепортаж

   

  

  

  

  

  

  

  

  

  

  

   

  

  

  

  

  

      

  

  

 

Добавить комментарий