4 недели назад 78
График Наталья Винокурова (Филиппова) үлэлэрэ
Бу саас “Диалоги в библиотеке” диэн саҥа тахсан эрэр электроннай сурунаал бастакы нүөмэрин сирэйин тугунан киэргэппит киһи диэн толкуйдуу олорон, Наталья Винокурова диэн талааннаах, ураты буочардаах худуоһунньук үлэлэрин өйдөөн кэлбитим. Бастакыбын 2014 сыллаахха аҕыйах үлэтин көрөн аһарбытым. Сымнаҕас өҥүн-дьүһүнүн, уоскутар, налытар композициятын, сахалыы холку уобарастарын сөбүлээбитим. Наталья 2021 сыллаахха ыарахан ыарыыттан олохтон туораабыта. Аймахтара, дьүөгэлэрэ худуоһунньук айар талаанын, хаалларбыт үэлэлэрин дьоҥҥо билиһиннэрэргэ, тарҕатарга кыһаналлар. Кинилэр ыыппыт хаартыскаларыттан графическай үлэлэриттэн таһаарабын.
Наталья Винокурова (Филиппова) 2006 сыллаахха Дьокуускайдааҕы художественнай училищены бүтэрбитэ. Онтон 2012 сыллаахха дылы И. Репин аатынан живопись, скульптура, архитектура Санкт-Петербурдааҕы академическай институтугар ситиһиилээхтик үөрэммитэ, дипломун “туйгун” сыанаҕа көмүскээбитэ. А.Г. Неболсин фондатын норуоттар икки ардыларынааҕы премиятын лауреата (2008), Валериан Васильев аатынан иккис степеннээх премия кыайыылааҕа (2013).
