1 месяц назад 524
Идэҕин сөпкө талыаҥ – табыллыаҥ
Бүлүү улууһун Х кылаастарын үөрэнээччилэригэр идэлэри оонньуу көмөтүнэн билиһиннэрэр, интэриэс үөскэтэр сыаллаах “Калейдоскоп профессий-2026” диэн улуустааҕы күрэх олунньу 28 күнүгэр Хампа С.Ф. Гоголев аатынан орто оскуолатыгар буолан ааста.
Баппаҕаайы оскуолатыттан кылаас салайааччыта Винокурова Алина Семеновна, онустар маҥнайгы учууталлара Жиркова Ирина Николаевна уонна 5 үөрэнээччи кыттан кэллилэр.
Барыта 7 нэһилиэк (Хампа, Илбэҥэ, Чочу, Хаҕын, Балаҕаччы, Дьөккөн, Халбаакы) оскуолаларыттан кэлбиттэр. Кинилэр идэ 9 көрүҥэр күрэхтэстилэр.
Күрэхтэһээччилэргэ идэлэр эйгэлэрин, усулуобуйаларын олох дьиҥнээх курдук тэрийбиттэр. Оҕолор ааҕан билбиттэрин эрэ буолбакка, араас балаһыанньаттан тахсары, сатабылларын, мындырдарын көрдөрдүлэр.
Күрэх түмүгүнэн биһиги оскуола үөрэнээччилэрэ үчүгэй бэлэмнээхтэрин, санаалара күүстээҕин, дьулуурдаахтарын көрдөрөн, бары миэстэлэһэн үөрдүбүт:
- “Мир мастера” – Никифорова Ася, I миэстэ (“Якутяночка” сувениры оҥоруу);
- “Мастерская столяра” – Яковлева Мираида, III миэстэ (маска кыһан, киэргэтэн, “Чороон” сувениры оҥоруу);
- “Мир кондитера” – Алексеева Күннээйэ, III миэстэ (үүттэн бананнаах коктейль);
- “Мир переводчика” – Никифорова Тамара, II миэстэ (английскайтан тылбаас);
- “Сестринское дело” – Никифорова Софья, III миэстэ (боппуруостарга эппиэт, маҥнайгы көмөнү оҥоруу).
Оҕолорго саамай өйдөнөн хаалбыт түһүмэх хамаанданан үлэ буолла. Тэрийээччилэр кэлбит оскуола оҕолорун 5 хамаандаҕа арааран, «Профессия мечты» диэн тиэмэлээн, видеоролик оҥорорго сорудахтаабыттара. 1,5 чаас иһигэр айар үлэ, алтыһыы саҕаланна: сценарий суруйуутуттан – таҥатыыгар тиийэ. Эдэр көлүөнэ бэйэтин инникитин аныгылыы көрүүнэн олус креативнайдык оҥорбутун дьүүлүүр сүбэ уонна көрөөччүлэр бэлиэтээтилэр, сэҥээрэ көрдүлэр.
Учууталларга уонна төрөппүттэргэ анаан төгүрүк остуол, уопут атастаһыыта тэриллибитэ – бу күрэххэ саҥа сүүрээн буолла: биир санаалаахтаргын кытта аһаҕастык кэпсэтии, сонун идиэйэлэри билиһиннэрии.
Биһигиттэн начаалынай кылаас учуутала Жиркова Ирина Николаевна уонна нуучча тылын, литературатын учуутала Винокурова Алина Семеновна «Оҕо талаанын айылҕаны кытта алтыһыннаран сайыннарыы” бырайыагы билиһиннэрдилэр.
Түмүккэ оҕолор оскуолаларын уонна кылаастарын сырдатан кэпсээтилэр, эҕэрдэ музыкальнай нүөмэрдэри бэлэхтээтилэр. Оскуолалар хардарыта бэлэх туттарыстылар.
«Күрэх биир тыынынан бүтэн хаалла. Биһиги оҕолор уоттаммыт харахтарын, чахчы ис сүрэхтэн кыһаллан күрэхтэһэллэрин көрдүбүт, оскуоланы бүтэрээри сылдьар үөрэнээччилэр маннык бэйэлэрин араас идэҕэ боруобаланан көрөллөрө наһаа үчүгэй быраактыка” – диэтэ дьүүллүүр сүбэ.
Кыайыылаахтар кубогынан, грамотанан, призердар бары грамотанан наҕараадаланнылар. Ол эрээри саамай сыаналаах бирииһинэн туохха да сыаналаммат уопут, инники идэҕэ хардыы буолар.
Маннык тургутуктары ыытан, оҕо ханнык хайысханы таларын быһаарынар. Онон тэрээһин сыалын-соругун толору ситтэ.
Үөрэнээччилэри, учууталлары түмэ тардан, сүүрэн-көтөн тэрийбит Хампа орто уопсай үөрэхтээһин оскуолатын кэлэктиибигэр, чуолаан нуучча тылын, литературатын учуутала Лена Лазаревна Степановаҕа, маны сэргэ бу тэрээһиҥҥэ бэйэлэрин массыыналарынан илдьэ сылдьыбыт төрөппүттэрбитигэр П.Н. Никифоровка, М.С. Яковлевка махталбытын тиэрдэбит.
Алина Семеновна Винокурова,
нуучча тылын, литературатын учуутала,
Баппаҕаайы М.А. Алексеев аатынан оскуолата
Илбэҥэ, Бүлүү.
