2 месяца назад 276
Аан дойдуга тиийэ таайдыбыт
Олунньу 10 күнүгэр, Мэҥэ Хаҥалас улууһа тэриллибитэ 96 сылын көрсө, Балыктаахха нэһилиэк тэрилтэлэрин, бэтэрээннэрин уонна оскуола үөрэнээччилэрин икки ардыларыгар “Кини кимий?” диэн өй күрэһэ буолан ааста.
“Кини кимий?” күрэх Мэҥэ Хаҥалас улууһун өрөгөй ырыатынан саҕаланна.
Өй күрэҕэ оонньууга олохтоох дьаһалта, “Звёздочка” оҕо уһуйаанын үлэһиттэрэ, олох-дьаһах хомунаалынай хаһаайыстыба, М.П. Габышев аатынан орто оскуола учууталлара, нэһилиэк бэтэрээннэрэ уонна оскуола үөрэнээччилэрэ кытыннылар – биэстии киһилээх уопсайа алта хамаанда.
Өй күрэҕэ биэс түһүмэҕинэн ыытылынна: бастакыга нэһилиэкпититтэн тахсыбыт ытык-мааны биир дойдулаахтарбытын, иккискэ улууспут, үһүскэ өрөспүүбүлүкэбит, төрдүскэ Арассыыйа, бэһискэ аан дойду биллиилээх дьонун таайдыбыт.
Күрэх бэрт сэргэхтик, олус интэриэһинэйдик ыытыллан, бириэмэ биллибэккэ ааста.
Бастакы миэстэни 750 очкону ылан, оскуола учууталларын “Мэҥэбил” хамаандата (хапытаан Никифор Николаев) кыайыылаах үрдүк аатын ылары ситистэ.
650 очколаах “Звёздочка” (хапытаан Саргылаана Стручкова) иккис миэстэ буолла.
Бэтэрээннэр “Мэҥэ аат” хамаандалара (хапытаан Андрей Винокуров), 550 очкону хомуйсан, бириистээх үһүс миэстэҕэ тиксэн, үөрүүлэрэ үксээтэ.
Кыайыылаахтар грамоталары туттулар. “Дьулуур” (хапытаан Михаил Барабанов), “Аал уот” (хапытаан Николай Цыпандин), “Кэскил” (хапытаан Надя Стручкова) хамаандалар көхтөөх кыттыыларын иһин туоһу суругунан бэлиэтэннилэр.
“Кини кимий?” өй күрэһин Татьяна Иванова иилээн-саҕалаан сэргэхтик ыытта.
Тэрээһини Петр Дохунаев ылбаҕай ырыатынан ситэрэн биэрдэ.
Оонньуу кыттыылаахтара күрэхтэн астынан, кыттыыны ылбыт оскуола үөрэнээччилэрэ бу тэрээһинтэн эбии билиини сомсон, бары оонньууттан астынан тарҕастыбыт.
Мария Захарова, Балыктаах.
