“ҺӨҔҮҤ: дорҕоону дьүһүйэн” күрэххэ кыттыҥ!

СӨ Национальнай бибилэтиэкэтэ уонна “Саха сирин култуурата” айар холбоһук саха тылын ыччакка сонун ньыманан тиэрдэргэ туһуламмыт “ҺӨҔҮҤ” диэн бырайыактарын чэрчитинэн ҺӨҔҮҤ арт-эбийиэк оҥоһуллубута, буктрейлер уонна видеопоэзия күрэхтэрэ ыытыллыбыттара, “Саха тыла – худуоһунньук хараҕынан” диэн аныгы ускуустуба быыстапкалара тэриллибиттэрэ, о.д.а.

Бу хамсааһын өрөспүүбүлүкэҕэ киэҥник тарҕанна, улуустарга, оскуолаларга “ҺӨҔҮҤ” диэн ааттаан, тэрээһиннэри ыытар буоллулар. Холобура, аҕыйах хонуктааҕыта кырачаан блогер Айыына Кожурова сахалыы видеороликтары устарга #ҺӨҔҮҤ диэн челлендж биллэрбитин Ил Дархан бэйэтинэн өйөөтө.

Дьэ, итинник диэн туран, Төрөөбүт тыл уонна сурук-бичик күнүн көрсө, “ҺӨҔҮҤ: дорҕоону дьүһүйэн” күрэҕи биллэрэбит.

Куонкурус суолтата: “Ол дорҕоону дьүһүйэллэр дуо?” – диэххит. Сүрүнэ онно сытар – төрүт дорҕооммутун бэлиэтиир Һ, Ө, Ҕ, Ү, Ҥ буукубалары илиинэн оҥоһукка дьүһүйүөхтээххит. Итинник оҥоһуктары (сувенир, киэргэл, инсталляция, панно, о.д.а) көрөн, кэнчээри ыччат ураты тыллаах-бичиктээх омук буоларын өйдүү улаатар.

Кимнээх кытталлар:

Биирдиилээн (V-XI кылаас үөрэнээччилэрэ);
Кэлэктиибинэн (кылааһынан, куруһуогунан, түмсүүнэн, о.д.а);
Дьиэ кэргэнинэн (алын кылаас оҕолоро төрөппүттэрин кытта).

Оҥоһукка ирдэбил:

туохтан баҕар оҥороҕут – ол эһиги фантазияҕыт, сатабылгыт, толкуйгут;
кээмэйэ эмиэ хааччахтаммат;
туох матырыйаалтан хайдах оҥорбуккутун кылгастык быһааран суруйаҕыт (ураты идиэйэлээх, суолталаах, ис хоһоонноох буоллаҕына, ону эмиэ сырдатаарыҥ);
оҥоһуккутун хаартыскаҕа үчүгэйдик көстөр гына түһэрэҕит, илиигитигэр тутан биитэр аттытыгар туран эмиэ.

Болдьоҕо:

Тохсунньу 31 күнүгэр биллэриннэ.
Үлэлэри тутуу Төрөөбүт тыл уонна сурук бичик күнүттэн 3 күн устата буолар. Ол эбэтэр олунньу 13-15 күннэригэр электроннай почтаҕа ыытаҕыт.
Түмүгэ Төрөөбүт тыл норуоттар икки ардыларынааҕы күнүгэр (олунньу 21 күнэ) бу сайтка тахсыаҕа, социальнай ситимнэринэн өрөспүүбүлүкэҕэ тарҕаныаҕа, тустаахтарга тута биллэриэхпит.

Усунуоһа:

Биирдиилээн – 200 солкуобай;
Кэлэктиибинэн – 500 солкуобай;
Дьиэ кэргэнинэн – 300 солкуобай.

Бу куйаар-кодунан начаас төлөнөр (биир киһи төлөпүөҥҥэ арыйан олорон, иккиһэ мобильнай баанын туһаайда да, сонно тута киирэр).

Үлэҕитин ханна уонна хайдах ыытаргыт:

Оҥоһуккут хаартыскаларын, быһаарыы суругун, сайаапкаҕытын, усунуоһу төлөөбүккүтүн бигэргэтэр чек куоппуйатын – барытын биир паапкаҕа уган, бу аадырыска ыытаҕыт: am.ievleva@nlrs.ru
Сайаапкаҕа оҥоһук ааптарын аата, кылааһа, оскуолата, төлөпүөнүн нүөмэрэ, салайааччыта толору ыйыллар. Дьиэ кэргэнинэн, бөлөҕүнэн кыттааччылар эмиэ дааннайдаргытын ити курдук чопчу суруйаарыҥ.