1 месяц назад 175
“Айарга абылыыр ахтылҕаным…” кинигэ таҕыста
Бу күннэргэ Дьокуускай куоракка СӨ норуодунай суруйааччыта Егор Петрович Неймохов үбүлүөйдээх сылын түмүктүүр тэрээһиннэр буола тураллар.
Ахсынньы 18 күнүгэр Ойуунускай аатынан Литературнай түмэлгэ “Неймохов Егор Петрович. Жизнь и творчество в фотографиях” диэн альбом-кинигэ уонна “Айарга абылыыр ахтылҕаным…” диэн ахтыы кинигэтин биһирэмэ буолар.
Бу “Айарга абылыыр ахтылҕаным…” диэн кинигэни СӨ Национальнай бибилэтиэкэтин электроннай издательствота таһаарда. Манна суруйааччы кэргэнэ Мария Петровна Неймохова бибилэтиэкэ саайтын “Сахалыы сэһэргиибит” интернет-сурунаалыгар тахсыбыт матырыйааллара түмүллэн киирдилэр.
Кинигэ үс бастан турар. Бастакы түһүмэххэ — Е.П. Неймохов аатын үйэтитиигэ туһуламмат тэрээһиннэри Мария Петровна сырдаппыта. Иккискэ — суруйааччы айымньылаах олоҕор алтыһан ааспыт доҕотторун туһунан. Үһүскэ — Егор Петрович төрөөбүт түөлбэтин дьонун-сэргэтин кэпсиир, билиһиннэрэр матырыйааллар.
Биллэн турар, Егор Петрович биир дойдулаахтарын да, доҕотторун да туһунан Мария Петровна кини кэпсээнин, сыһыанын нөҥүө билэр, билсибит буоллаҕа эбээт. Онон хас биирдии ахтыы Егор Петровиһы киһи, доҕор, кэргэн, аҕа, оҕо, устудьуон, суруйааччы, салайааччы, тэрийээччи, уопсастыбаннай диэйэтэл, саҥаны саҕалааччы, дойдунаат быһыытынан арыйаллар.
Кинигэни суруналыыс, СӨ Национальнай бибилэтиэкэтин үлэһитэ Анисия Иевлева хомуйан, бэлэмнээн оҥордо. Электроннай бибилэтиэкэҕэ киирэн ааҕар сигэҕит:
