1 месяц назад 190
Бэлиэ сылга кыайбыппыт суолталаах
СӨ Национальнай бибилэтиэкэтэ “Саха сирин култуурата” айар холбоһугу кытта сүрүннүүр “ҺӨҔҮҤ” хамсааһынын чэрчитинэн сахалыы ааҕыыны көҕүлүүр бырайыага Арассыыйа ыччакка аналлаах Судаарыстыбаннай бибилэтиэкэтин тэрийиитинэн ыытыллыбыт Бүтүн Арассыыйатааҕы “На своем языке” диэн бибилэтиэкэлэр куонкурустарыгар “Лучший проект” номинацияҕа кыайыылаах буолла.
“Ол туох бырайыагай?” – диэтэргит, маны көрдөххүтүнэ, үгүскүт тута өйдүөҕэ: өрөспүүбүлүкэ араас муннугуттан – Мииринэйтэн саҕалаан Булуҥҥа тиийэ – тыһыынчанан оҕо кыттыбыт күрэхтэһиилэрэ. Ол онтон 66 үөрэнээччитэ “Сосновый бор” лааҕырга сынньанар путевканан наҕараадаламмыта. Бастыҥ үлэлээхтэр ноутбук, 3Д планшет, МФУ-принтер, о.д.а. курдук сыаналаах бириистэри тутан үөрбүттэрэ.
Оттон биһиги электроннай бибилэтиэкэбит сүүһүнэн видеоролигынан байбыта: https://nlrs.ru/collections/3636 уонна https://nlrs.ru/collections/4354.
“На своем языке” дьүүллүүр сүбэтэ роликтары олус сэргээбитин, уопсайынан, бу бырайыагы сэҥээрбитин наҕарааданы туттарыыга эттилэр. Ол чиэстиир тэрээһин Москубаҕа ахсынньы 5 күнүгэр интеллектуальнай литература “Non\Fiction№27” дьаарбаҥкатын кэмигэр буолла.
“Гостиный двор” киэҥ уораҕайын толору уонна тилэри издательстволар павильоннара тардыллыбыт. Маҕаһыыннарга мэнээх көстүбэт сэдэх уонна нэһилиэнньэҕэ тарҕана илик сабыс-саҥа таһаарыыларын атыылыыр буоланнар, сыллата 50 тыһыынчаттан тахса киһи сылдьар эбит. Ыччат, харчы төлүү-төлүү киирэн, хас эмэ уонунан тыһыынча суумаҕа кинигэ ылан барарын көрөн, төһө да тикток үйэтэ буоллар, өйдүүр сүмэ буолар кэскилбит дьоһунуттан үөрэҕин.
Бу “На своем языке” күрэх 3 номинацияҕа үлэлэри бэс ыйыттан тутан саҕалаабыта. “Лучший ресурс” диэҥҥэ бибилэтиэкэлэр саайтарын, мобильнай сыһыарыыларын, медиа-бырайыактарын, подкастарын, о.д.а. ыыппыттар. Манна Арассыыйа национальнай бибилэтиэкэтин “Дореволюционные бурятские книги на вертикальном письме” диэн электроннай каталогтара кыайда. 1930-с сылларга диэри бүрээттэр, монгуоллар курдук, туруору суруйа сылдьыбыттар эбит. Ол суруктары сыыппара эйгэтигэр көһөрөн, куйаар ситимигэр үйэтиппиттэр.
“Лучшее событие” диэн анал аакка Рудомино аатынан Омук литературатын Бүтүн Арассыыйатааҕы судаарыстыбаннай бибилэтиэкэтэ төрдүс сылын ыытар “Гуманитариум” бэстибээлэ ылла.
Оттон “ҺӨҔҮҤ” бастаабыт номинациятыгар Татарстан “Тат.ру” платформата, Мордовия “Традиция жепляре” арт-устуудьуйата, Бурятия “Сэсэн наадан” квиз-оонньуута, Сахалин төрүт олохтоохторугар туһуламмыта “Близким тебе станет” бырайыага о.д.а. киирсибиттэр эбит.
Уопсайа РФ 36 субъегыттан кыттыбыттар: 15 өрөспүүбүлүкэттэн, 14 уобаластан, 2 кыраайтан, 1 аптаныамыйалаах өрөспүүбүлүкэттэн, 3 федеральнай куораттан.
Итинник үрдүк таһымнаах күрэххэ Национальнай бибилэтиэкэ сахалыы ааҕыыны көҕүлүүр “ҺӨҔҮҤ” бырайыага саха уус-уран литературата төрүттэммитэ 125 сылыгар Арассыыйаҕа биһирэммитэ икки бүк үөрүүлээх уонна ураты суолталаах. Чахчыта да, Национальнай бибилэтиэкэ 100 сыл тухары Саха сирин төрүт олохтоох норуоттарын култуураларын, тылларын, литератураларын хараанньыта буолан, итиэннэ ол үйэлээх баайы тарҕатыыга утумнаах үлэни ыытан кэллэ. Олортон биирдэстэрэ бу – аныгы ньыманан ыччакка саха тылын, литературатын, култууратын тиэрдэр “ҺӨҔҮҤ” бырайыак.
