8 месяцев назад 699
Онно мин кэрэҕэ тиксибитим…
Бүгүн СӨ норуодунай бэйиэтэ, ССРС суруйааччыларын сойууһун чилиэнэ, лирика маастара, талааннаах тылбаасчыт, уопсастыбаннай диэйэтэл Моисей Ефимов төрөөбүт күнэ.
Кини Дьааҥы Дулҕалааҕар 1927 сыл атырдьах ыйын 4 күнүгэр төрөөбүтэ. Онно Томтор диэн сиргэ 1866 сыллаахха хоту эҥээр суох улахан таҥара дьиэтин туппуттар. 1867 сыллаахха Иннокентьевскай диэн сибэтии гыммыттар. Манна ыытыллар сулууспаларга I уонна III Дьуһаал нэһилиэктэрин олохтоохторо, итиэннэ Түгэһиир (Эбээн Бытантай улууһа) эбээннэрэ сылдьаллар эбит. 1910 сыллаахха таҥара дьиэтигэр церковнай-приходской оскуола аһыллыбыт.
Сэбиэскэй былаас сылларыгар сэбиэт, кулууп, ыскылаат буола сылдьыбыт. Куолакалларын, кириэстэрин, куполларын суулларан баран, ханна гыммыттара билбэт. Арай биир оччугуйу оскуолаҕа чуораанчык оҥостубуттар, 90-с сылларга диэри ол лыҥкынас тыаһа Дулҕалаах үөрэнээччилэрин уруокка ыҥырара.
Сөргүтүү, чөлүгэр түһэрии, өрөмүөн үлэтэ 2013 сыллартан саҕаланан баран, үп суоҕунан бытааран, 2023 сыллаахха түмүктэммит.
Иннокентьевскай таҥара дьиэтин Моисей Ефимов 5 сааһыгар көрбүтүн “кэрэҕэ тиксибитим” диэн “Дулҕалаах таҥаратын дьиэтигэр санаа” хоһоонугар хоһуйар. Кыракый уолчаан кириэстэр, куолакаллар, куполлар күн уотугар ыраахтан күлүмүрдээн көстүбүттэрин сөхпүтүн, сааһын тухары умнубакка, үрдүккэ ыҥырар-угуйар ыраас өйдөбүл гынан, сүрэҕэр-дууһатыгар илдьэ сылдьыбыт.
Бу хоһоону Дьааҥы улууһун Боронук орто оскуолатын үөрэнээччитэ Маша Мордовская киһини долгутар гына истиҥник-иһирэхтик ааҕарын истиҥ. Видеопоэзияны Алеша Ефимов туох эрэ таайыллыбат дьиктилээх, кистэлэҥнээх, алыптаах гына устан, таҥан оҥорбутун сэҥээрэ көрүҥ.
Машалаах Алеша быйыл XI кылааһы түмүктээтилэр. Оскуола сылларыгар саха тылын учуутала Акулина Трофимовна Стручкова салайар “Аах-ай” медиа-кииҥҥэ, уруккута “Сиккиэр” юнкорпоска дьарыктаннылар. Маша төрөөбүт тыл уонна литэрэтиирэ олимпиадаларыгар Арассыыйаҕа тиийэ кыттыбыта, өрөспүүбүлүкэҕэ призер. Онон тыл үөрэҕэр туттарсар, Алеша техническэй идэҕэ. Абитуриеннарга ситиһиини баҕарыаҕыҥ!
