8 месяцев назад 948
Олох оскуолатыгар уһуйуллуу
Хайдах да кэм кэллин – хара үлэни роботтар да оҥордуннар, өй үлэтин оҥоһуу өй да толордун – син биир онно даҕаны олоххо бэлэмнээх эрэ киһи ситиһиилээх, кыайыылаах-хотуулаах, тахсыылаах буолара чахчы.
Оттон олоҕу бэйэҥ салайар, сүрүннүүр, уларытар, суолталыыр, сайыннарар, быһата, муоһалыыр буоларга, бастатан туран, тулуур, дьулуур, күүстээх санаа, сатабыл ирдэнэр. Ол үөрүйэҕи олох оскуолата эрэ иҥэрэр, биэрэр, уһуйар кыахтаах.
Мин 20-тэн тахса сыл суруналыыстаабытым тухары Орто Халыма улууһун I Хаҥалас нэһилиэгин үлэһит оҕолорун туһунан элбэх матырыйаалы эрэдээктэрдээн таһаардым.
Холобура, туһаҕынан куруппааскылыыр Виталий Винокуров, Коля Колесов, Эрнст Ноговицын, ньирэй көрбүт Нарияна, Күннэй Винокуровалар, лабыктаттан угунньа тигэн атыылаабыт Надя Реундью, биогумус оҥорор чиэрбэлэри иитэр кыргыттар, Явловскай Дмитрий Васильевич салалтатынан бултуур уолаттар, кучу оту хомуйан астыыр «Кэнчээри» лааҕыр, балыксыт Денис Винокуров, Тоҥуулаах учаастагар 176 сылгыны сайылаппыт Артур Созонов, Ваня Ефимов, 90 төбө сүөһүгэ эппиэтинэстээх буолбут Кудрин Коля, Винокуров Ваня, 500 сыспай сиэллээххэ бостууктаабыт Ваня Созонов, Винокуров Вова, Еремеев Коля тустарынан суруйбуттарын өйдүүбүн.
Бу Өлөөкө Күөл Г.Г. Софронов аатынан оскуолата агро-фермерскэй хайысхалаах. Онон үөрэнээччилэри ити курдук кыраларыттан тыа хаһаайыстыбатын үлэтигэр уһуйаллар.
Быйыл II кылааһы бүтэрбит Лева Слепцов иккис ыйын бөһүөлэктэн ыраах баар Махса учаастагар сылгыһыт эһэтигэр көмөлөһө сылдьар эбит.
Учуутал Изабелла Ноговицына “Кини бырдахтаах диэн кыҥкыйдаабат, күүстээх-уохтаах эр бэрдэ, элик үтүөтэ буола улаатыаҕа” диэн миэхэ бассаапка суруйар. Оннук эрэ буоллун!
“Кэнчээри” лааҕыр быйыл да үлэлээбит. Иитиллээччилэрэ кучу от сэбирдэҕиттэн чэй, оттон сибэккитин эминньэҕиттэн барыанньа оҥорон, кыһыҥҥыга хаһааммыттар, өссө фитобар тэрийэн үлэлэппиттэр.
“Оҕолор хоту сир эмтээх үүнээйилэрин туһунан билиилэрин хаҥаттылар, доруобуйаны тупсарынарга түргэн, усха, босхо ньыма баарыттан олус үөрдүлэр. Тымныы уһун кыһын лааҕыр умнуллубат кэрэ күннэрин саныахтара, дойдубут эмтээх чэйин, барыанньатын, сиробун уонна мүөтүн сиэн, туруктарын тупсарыахтара”, – диир Изабелла Егоровна.
Соҕуруунан тэлэһийиэхтээҕэр Дьокуускайга кэлэргэ да сүүһүнэн тыһыынча солкуобай баранар айаннаах хоту сир оҕолоро, хата, сайыннарын дойдуларыгар кимнээҕэр да туһалаахтык атаара сылдьалларыттан үөрэбит уонна киэн тутта кэпсиибит.
Сурукка тистэ Анисия Иевлева.
