2 недели назад 630
Айылҕа ойуулаабыт хартыыната
Олоҥхо ыһыаҕын сырдата баран иһэр суруналыыстар Алдан уонна Нерюнгри оройуоннара кыраныыссалаһар Тиит диэн сирдэригэр тохтоон аастыбыт. Оптуобустан түһээт: “Уой, ол хайаҕа ойуу оҥорбуттар дуо?” – дэстибит. Онтукабыт айылҕабыт хаар диэн кыраасканан, ирбэт тоҥ диэн киистэнэн уруһуйдаабыт хартыыната эбит.
Хайа күлүк өттө буолан, сайыннары ууллубакка, тарын курдук чиҥээн сытар. Төкүнүктүҥү быһыылаах мууһу сэттэ уһуктаах дүҥүргэ майгыннаттыбыт.
Сэттэ – оруобуна Нерюнгрига 2 судаарыстыбаннай (нуучча, саха) уонна 5 дьиҥ таһымнаах ( эбээн, эбэҥки, дьүкээгир, чукча уонна дулҕаан) тыллаах норуоттар олороллор. Алта төрүт олохтоох омуктарыгар барыларыгар дүҥүр баар.
Оттон иккис маҥан “болотунаҕа” дьиэлэр дьэндэспиттэрэ, тутуу бара турара көстөргө дылы – Нерюнгри куората үүнэр-сайдар бэлиэтэ.
Бу хаар субурҕа биир сиргэ кэтирээбитэ, хайдах эрэ, Нерюнгри оройуонун каартаҕа көстөр быһыытын курдук. Онтон салгыы синньээн, балаһа курдук субуллара – тимир суол Нерюнгри оройуонун нөҥүөлээн, Аллараа Бэстээххэ ааһарын санатар.
Дьэ, бу курдук Олоҥхо ыһыаҕын биир сүрүн соруга — улууһу билиһиннэрии. Онуоха, бастатан туран, кэлбит дьон айылҕатын уратытын сэҥээрэр.
Төһө да силбиктээх тымныы күн буоллар, сир баайа элбэҕинэн аатырар, күүскэ умайар буолан, үрдүк кыраадыстаах итиини биэрэр сэдэх чоҕунан сураҕырар Нерюнгри, халлааҥҥа харбаһар, ыраахтан барыһар хайаларын курдук, үрдүк таһымнаахтык Олоҥхо ыһыаҕын тэрийэргэ толору бэлэм.
Сырдатта: Олоҥхо ыһыаҕын түһүлгэтиттэн Анисия Иевлева
