Саха суруналыыстыкатын саҥа ҮЙЭтин саҕалааччы - Блоги Якутии

4 недели назад 1291

Саха суруналыыстыкатын саҥа ҮЙЭтин саҕалааччы

Устуоруктар саха суруналыыстыкатын XXI үйэ саҕаланыытыгар сайдыытын үөрэтэллэригэр, Николай Кривошапкины, туспа ойуччу тутан, киниэхэ бүтүн биир баһы дуу, салааны дуу анаан ырытыахтара турдаҕа: бэчээт эйгэтэ кумааҕыттан Интэриниэт ситимигэр көһө, дойду экэниэмикэтэ халбаҥныы, үтүмэн таһаарыы кыаммакка сабылла турар кэмигэр, аны оҥоһуу өй баһылаан-көһүлээн эрдэҕинэ, оннук былдьаһыктаах быыһык кэрдииһигэр сурунаал умсугутуулаах үлэтин бигэ биисинэскэ хайдах кубулуппутун, судаарыстыбаттан тутулуга суох бэйэтин хааччынар суолу тобулбутун, туох көдьүүстээх ньымалары толкуйдаабытын, аныгы ааҕааччы интэриэһин тугунан туппутун  – барытын чинчийиэхтэрэ, холобур оҥостон кэпсиэхтэрэ.

Чахчы да, Николай Кривошапкин – саха суруналыыстыкатын сэдэх көстүүтэ. Феномена да диэххэ сөп. Ол уһулуччута оҕо сааһыттан биллэн барбыта. Хайа үөлээннээҕэ, кини курдук, күн аайы салҕыбакка, хаһыакка анаан суруйан ыыппыта баарай? Биитэр ким сэттис кылаастан ыла хамнаска кэрэспэдьиэннээн саҕалаабытай? Суруналыыстыка салаатыгар  400-тэн тахса ыстатыйалаах туттарса кэлбитин куоһарар абитуриент, бука, күн бүгүнүгэр диэри көстө илик быһыылаах. Төрдүс кууруска айар күрэхтэргэ кыайан, биир сыл иһигэр 5 ноутбугу бириис быһыытынан туппут рекордун идэтийбит суруналыыстар да хатылыахпыт биллибэт. Аны туран, устудьуоннуур сылларыгар өрөспүүбүлүкэ бары таһаарыыларыгар бэчээттэммит, арааһа, кини соҕотох буолуо. Онно эбии бэһис кууруска хайыы-үйэ 5 кинигэлээх ааптар буолан, Саха Сирин суруйааччыларын устуоруйатыгар сойууска саамай эдэр чилиэнинэн ылыллыбытын эбэн кэбиһиҥ. Уонна, сүрүнэ, сүүрэкэлии оонньуохтаах сүүрбэ биирдиир сааһыгар “ҮЙЭ” сурунаалын төрүттүүр.

-Николай, дьэ, онтон ыла 15 сыл ааста. Оччолорго элбэх глянцевай сурунаал баар буола сылдьыбыта. Билигин олор суохтар. Оттон эйиэнэ, аатын курдук, уһун үйэлэнэн эрэр… 

— 50 сыл таһаарар соруктаахпын. Ол кэннэ судаарыстыбаҕа туттарыам. Салгыы кэм-кэрдии хайдах салайарынан… Оттон билигин “ҮЙЭ” миэхэ, этэргэ дылы, иккис кэргэним, үһүс оҕом тэҥэ. Идэм курдук буолбакка, олоҕум уобараһа, истиилэ, сорҕото, анала курдук ылынабын. Ол иһин үлэлии сылдьар курдук санаммаппын. Сурунаалбын кытта тэҥҥэ үүнэр-сайдар буоламмын, сылайыы туругун билиҥҥитэ билэ иликпин.

Өйдүүбүн ээ, онус кылааска Санкт-Петербурга түспүт көстүүнэйим бибилэтиэкэтигэр “Москуба  – дьон мөссүөнүнэн” диэбит курдук ааттаах кинигэни сэҥээрэ көрбүппүн. Дьоруойдара улахан куорат олохтоохторо этэ: умнаһытыттан саҕалаан, учуонайыгар тиийэ. Онно маннык курдук сурунаалы таһаарар санаа саҕыллыбыта. Ол толкуйбун олоххо киллэрэ сылдьабын – саха билиҥҥи майгытын дьон олоҕун нөҥүө көрдөрөн.

Глянцевай сурунаал, дьиҥэр, сулустары, байылыат олоҕу, бэлиэ дьону, сынньалаҥы, о.д.а. сырдатар аналлаах. Ол эрээри сахалыыга ити киэп барсыбат: биһиги алаастан, тыа сириттэн силистээхпит. Ол иһин мин кэнсиэпсийэм олоҕурбуттан атын: омукпут билиҥҥи уратытын кэрэһилиир дьонун ҮЙЭтитии.

Итиниэхэ күлүүс тыла “ҮЙЭтитии” диэн. Киһи дьылҕата диэн 100 сыллаах олоҕун сэһэнэ эбит буоллаҕына, биһиги ону үйэлэргэ сүппэт-симэлийбэт номоххо кубулутабыт. Кырдьыга да, суруллубут – суоруллубат. Билигин наһаа элбэх киһи миэхэ махтанар: “Бочуоттаах сынньалаҥмар тахсан баран, “ҮЙЭ” сурунаалы арыйталаан, үлүмнэһэн үлэлээбит кэммин туһунан аахтахпына, сүргэм көтөҕүллэр”, – диэн.  Оччоҕо  үөрэ саныыбын – ҮЙЭлээх дьыаланан дьарыктана сылдьарбыттан. Олох наһаа түргэн, тоҕоостоох күнү күүппэккэ, бэйэҥ устуоруйаҕын бүгүҥҥүттэн сурукка тиһэн иһэр ордук.

Сурунаалым аата, куйаартан ким эрэ анаан ыыппытын курдук, тута тиийэн кэлбитэ. Оччолорго мин, дьиҥэр, судаарыстыба, бырабыыталыстыба таһаарыыларыгар үлэлиир соруктааҕым. Тоҕо диэтэххэ, 13 сааспыттан «Мүрү саһарҕата»,  “Забота-Арчы”, “Саха Сирэ” хаһыаттарга дуогабарынан да, ыстаакка да ылыллан үлэлээбитим. Ол иһин инниким хайдах буолуохтааҕа дьэҥкэ көстөрө. Онон биллибэт тус суолбун солуурга санаммытым. Уонна сыыстарбатахпын. Билигин мин медиа-менеджербин, урбаанньыппын, бас эрэдээктэрбин уонна суруналыыспын.

Оччоҕо айар эйгэҕэ баҕа санааҥ туолла диэххэ сөп дуо?

– Муҥутуур баҕа санаам – суруйааччы быһыытынан бэйэбин бигэргэтии. Ол билигин кыаллыбат: бириэмэ тиийбэт. Этэргэ дылы, бүтүн биир эрэдээксийэ үлэтин соһо сырыттаҕым дии. Биллэн турар, илиим кычыгыланар, тиэрдиэхтээҕим-кэпсиэхтээҕим да баһаам, ол эрээри ҮЙЭлээх дьоһун айымньыны суруйарга уһуннук олоруохха наада – хас биирдии этиини чочуйан. Саатар, кыра эрдэхпиттэн бэйэбэр наһаа ирдэбиллээхпин. “Синдром отличника” диэн миэхэ  баар:  ылсыбытым булгуччу хаачыстыбалаах буолуохтаах.

Оннук айылаах кыһаллыбатым эбитэ буоллар, барытыгар биллэ-көстө көтүмэхтэнэ сылдьыам этэ: итиннэ мин, онно мин. Кырдьыга, оҕо сааспар дэгиттэрим: оскуола уонна эдэр чинчийээччилэр научнай уопсастыбаларын бэрэсидьиэнэ, улуус үрдүкү сүһүөх кылаастарын сүбэтин бэрэссэдэтээлэ, эдэр натуралистар ыстаансыйаларын, мусукаалынай кыһа, “Кэнчээри” ансаамбыл, цирк устуудьуйатын, үҥкүү куруһуогун уһуйуллааччыта, эдэр кэрэспэдьиэн, туйгун үөрэнээччи… Аны нэдиэлэ ахсын сценарийдаан тэрээһиннэри ыытарым. Ол эрээри улахан киһи итиччэ элбэҕи дьүөрэлиирэ сатаммата чахчы. Ол иһин устудьуон буолаат, үгүс суолтан биири талбытым – бэчээт эйгэтин. Дьиҥэр, билим байҕалыгар даҕаны далааһыннаахтык устуохтаахпын учуонайдар эрдэттэн бэлиэтээбиттэрэ. Эбэтэр тэлэбиидэнньэҕэ айыам-тутуом хааллаҕа. Сэҥээрини мэлдьи ыларым. Билигин да ыйыталаһалларын истэбин: “Ол уол ханна сүттэ?” – диэн.  Салайааччы быһыытынан ыҥырыылары, кистэл буолбатах, билигин да тутабын. Ол гынан баран, киһи бэйэтин биир дьыалаҕа толору анаатаҕына эрэ, ис сүрэҕиттэн арыллар. Холобура, урут миигин сөбүлээн аахпыт буоланнар, дьоруойдарбыт бэйэлэрэ сураһан кэлэллэр. “Наһаа үчүгэйдик суруйарыҥ”, – диэн ахталлар. Оччоҕо мин холтууралаабакка суобастаахтык үлэлээбиппэр махтана саныыбын.

 Оччолорго “Саха Сирэ” хаһыаты, кырдьык, наһаа ааҕаллара. Бар дьон санаатын үллэстэрэ, биһирээбитин биитэр сөпсөспөтүн биллэрэрэ. Нууччалыы эттэххэ, “обратная связь” баара. Оттон билигин оннук харданы киһи тутар дуо? Ити түгэн миигин тохтотор – барытын быраҕан, айар үлэнэн эрэ үлүһүйүөхпүн. Чэ, бэйэм дуоһуйуом, сүрэҕим уоскуйуо. Ол эрээри… Күҥҥүн-дьылгын анаабытыҥ таах халтайга хаалара кыһыылаах. Биир ааттаах-суоллаах суруйааччы күлэрэ: “Кинигэбин корректор эрэ ааҕар быһыылаах”, – диэн. Мин, холобура, ити дьээбэттэн хомойобун. Дьон сүрүннээн бассаап сонунугар болҕойор буолла. Инньэ гынан ардыгар айымньыларбын социальнай ситимнэргэ таһааран тарҕатыахпын баҕаран ылабын эрээри,  туох эрэ сүрүнүн сүтэрэн кэбиһэр диэн туттунабын.

Онон өссө да бэйэм кыахпын, талааммын көрдөрөрүм иннигэр…

– Тута билиниини эрэйбэккэ, литэрэтиирэҕэ хорутуулаахтык айыаҥ-тутуоҥ этэ буоллаҕа дии.  Оттон бу кэпсэтэ олорон, мин биири өйдөөтүм, урут эн ааккар үлэлээбиккин, билигин аатыҥ эн биисинэскэр үлэлиир эбит диэн.

-Итинэн биһиги Сахабыт Сиригэр айар-тутар уратылаах: бары бэйэ-бэйэбитин билсэбит. Мин оҕо саастан бэчээт эйгэтигэр тирэхпин оҥостон саҕалаабыт буолан, бэйэм сурунаалланарым судургу этэ. Ааптардарым – алтыһан үлэлээбит суруналыыстарым. Дьоруойдарым – хаһан эрэ интервью ылбыт салайааччыларым, урбаанньыттарым, уопсастыбанньыктарым уо.д.а.

Биисинэс биир сүрүн быраабылата – дьыала түмүктэннэҕинэ, бииргэ үлэлэспит партнердарыҥ, суруйбут дьонуҥ, ааҕааччыларыҥ харахтарын кыбыстыбакка утары көрөр курдук сиэрдээхтик дьаһаныы. Ол иһин биһиги матырыйаалы-макыаты барытын сакаасчыкка бэрэбиэркэлэтэбит, көҥүлүн ылан баран, биирдэ киэҥ араҥаҕа таһаарабыт.

 – Аптарытыат, репутация, аат сүҥкэн сабыдыаллааҕа чахчы. Ол эрээри бэйэҥ бэлиэтээн аһардыҥ дии, дьон ааҕара намтаабытын. Оннук кэмҥэ сурунаал таһаарыытын урбаан көрүҥүн курдук илдьэ сылдьар уустуктардаах буолуо ээ…

-Урут, холобура, өрөспүүбүлүкэ кинигэнэн эргинэр сүрүн ситимигэр 900 сурунаалы туттардахпытына, сонно тута атыыланара. Билигин 200-тэн тахса барар. Ол таһаарыыҥ интэриэһинэйэ суох буолбут диэн буолбатах: кэмэ оннук. Ону кыһалҕа курдук көрбөккө, билиҥҥи олох кырдьыгын быһыытынан ылынан, хайдах тарҕатар уонна батарар туһунан сырыы аайы саҥалыы толкуйдуур оруннаах.

 Биһиги 15 сыл тухары Новосибирскайга бэчээттэннибит. Олоҕурбут сыаналаахпыт, ол иһин тиражпытын аччатан кэбиһэр кыахпыт суох. Онон эксэмпилээрим ахсаанын түһэрбэккэ, бэйэм мэлдьи араас ньыманы тобула сатыыбын, сонун бырайыактарынан үлэлиибит. Маныаха улуустар, нэһилиэктэр, оскуолалар бибилэтиэкэрдэригэр махтанабын, көрүллэр аҕыйах үптэриттэн аттаран, “ҮЙЭ” сурунаалы куруук суруйтаралларыгар. Манна даҕатан эттэххэ, А.Н. Жирков Ил Түмэн бэрэссэдээтэлэ эрдэҕинэ, дьокутааттар өрөспүүбүлүкэ таһаарыыларын, ол иһигэр “ҮЙЭ”-ни ааҕалларын ирдиирэ. Бэл, Судаарыстыбаннай Мунньах хас биирдии кэмитиэтэ «ҮЙЭ»-ҕэ суруттарарын хааччыйара.

Бэйэ дьыалата, биллэн турар, сылаалаах. Өрөбүлэ, уоппуската, нуормата суох түбүк. Онтон сылайаннар, сорох урбаанньыттар, “делегирование” диэн ааттаан, үлэһиттэригэр сэлээннээн кэбиһэллэр. Оннукка хаачыстыба намтыыра баа буолбатах. Мин барытын бэйэм сүрүннэһэбин. Ноҕуруускатыттан “умайан” хаалбат гына, чопчу былаанынан салайтарабын. Дьиэ кэргэммин кытта сынньанарга, сири-дойдуну кэрийэ барарга, сайыннарар куурустарга үөрэнэргэ бириэмэ хаалларабын. 

Медиа-эйгэҕэ эрэ буолбакка, ханнык баҕарар биисинэскэ таһымнаах хамаанданы тэрийиэхтээххин уонна үчүгэй сыаннастарга олоҕурар хаачыстыбалаах бородууксуйалары оҥорорго кыһаллыахтааххын. Оннукка дьон тардыһар, итэҕэйэр уонна өрүү бииргэ тутуһа сылдьар. 15 сыл үлэлээн кэлбит устуоруйабытын анааран көрдөххө, сурунаалга алтыспыт дьоммут эргийэн кэлэ турар. Ол аата наадыйаллар. Саамай сүрүнэ ол.

– Эн Москубаттан, Калининградтан олорон үлэлиигин. Ыраахтан барыта дьэҥкэ көстөр буолуохтаах. Саха суруналыыстыкатын туһунан санааҥ…

– Миигин сорохтор: “Соҕуруу көспүт дьону наһаа сырдатар”, — дииллэрин истэбин. Миэхэ оннук араарыы суох – ханна олороллоруттан тутулуга суох, саха дьонун ҮЙЭтитэбит. Иккиһинэн, бэйэм төһө да киэҥ сиринэн тэлэһийдэрбин, саха тылын тарҕатыыга утумнаах үлэни ыыта сылдьабын дии саныыбын. Бу диэн эттэххэ, төрөөбүт тылбытынан айар-тутар таһаарыылар бары бу үрдүк аналы толорорбут иһин, дьиҥэр, ситимнээхтик өйөнүллүөхпүтүн сөптөөҕүн биир идэлээхтэрим бэлиэтииллэрин кытта сөбүлэһэбин.

Онон бэйэбин дьиҥнээх патриотунан ааҕынабын. Оҕолорбун да сахалыы иитэбин. Төрөөбүт тыл дьылҕата дьиэ кэргэнтэн тутулуктааҕын бэркэ билэбин, ол иһин ийэ тылларынан саҥаралларын биһиги ыал көҕүлүүбүт.

Дьиҥэр, хаһыат буоллун, саайт буоллун, тэлэбиидэнньэ буоллун, араадьыйа буоллун, сүрүн болҕомто тиэкискэ ууруллуохтаах. Сахалыы сыыһата суох сурулларыгар. Оччоҕо эрэ тыл култууратын үрдэтэбит.  

Таһымнаахтык суруйар суруналыыс элбэх. Ол эрээри кинилэри билиҥҥи ирдэбил сылатта. Нэдиэлэҕэ 5 балаһаны биэрэллэрин таһынан, саайка сонун таһаараллар, ону тарҕаталлар, аны социальнай ситимнэргэ блогер курдук, видео-контент оҥороллор. Киһи итинниккэ эстэрэ чахчы. Матырыйаал хаачыстыбата да мөлтүүр. Айар үлэ диэн өй үлэтэ ээ. Наһаа уустук. Аны үксүлэрэ – суруйааччылар. Кинигэ суруйуохтаахтар. Хаһан? Дэгиттэр суруналыыстары оҥоро сатаан, ураты туспа буочардарын сүтэрэр суолларыгар туһаайдыбыт. Күннээҕи сонуннары сырсар дьуһуурунай кэрэспэдьиэҥҥэ кубулутан эрэбит. Саайка устудьуоннары да гонорарга сыһыарыахха сөп этэ. Тоҕо уопуттаах үлэһиттэри сүүрдэллэрий?

Саха билиҥҥи суруналыыстыкатын сүрүн кыһалҕата ити – дьоммутун харыстаабакка, сыыр-мыыр үлэнэн көмөн кэбиһии. Онтон сылтаан хаарыан талааннаах суруналыыстар атын үлэҕэ көһөллөр. Дьиҥэр, уруккулуу салааларынан сааһыланыы барыан наада этэ: хас биирдии кэрэспэдьиэн бэйэтэ сырдатар, идэтийэр анал тиэмэлээх буоларын курдук. Оччоҕо эрэ үчүгэй  матырыйааллар суруллуохтара.

Дьон хаһыаты, кинигэни аанньа аахпат, ыччат үксэ тэлэбиисэри көрбөт буолбут кэмигэр Саха Сирин көрдөрөр-биллэрэр тэрилтэлэрэ – “Саха” НКИХ, “Айар”, “Сахабэчээт”, “Сахамедиа”, «Ил Түмэн», “Кэскил”, “Ситим” – бэркэ дьаһанан айа-тута олороллорун бэлиэтиир сиэрдээх.

Үчүгэйэ диэн, биһиэхэ судаарыстыбаннай уонна чааһынай таһаарыылар бииргэ тутуһар үтүө үгэстээхпит. Тоҕо диэтэххэ, барыбыт соруга биир – норуоппут кэскилин туһугар туруулаһыы. Итиэннэ сүрүннээн мэлдьи биир суруналыыстар эргийэ сылдьан үлэлиир буоламмыт, арахсыбаппыт, атааннаспаппыт. Бэйэ-бэйэбитигэр ытыктабыллаах сыһыаннаахпыт.

Мин суруналыыс быһыытынан бэйэбин дьоллоохпун дэнэбин. Билигин биһиги кэккэбитигэр суох Нина Протопопова, Николай Дмитриев, Дмитрий Кустуров, Андрей Аргунов, Леонид Левин, Иван Мигалкин алгыстарын ылбытым. Бэчээт аксакаллара Варвара Угарова, Наталья Харлампьева, Галина Бочкарева, Айталина Никифорова, Галина Нельбисова, Иннокентий Сыроватскай, Иван Ксенофонтов, Аркадий Алексеев, Иван Ушницкай, Филипп Пестряков, Александр Веревкин өйөбүллэрин билбитим. Куруук хайҕалга сылдьыбытым эрээри, хаһан да онтон төбөм эргийбэтэҕэ. Тоҕо диэтэххэ, өссө да уһулуччуну айар-тутар кыахтаахпын билэрим, ол иһин хас күн ахсын саҥа саҕахтары арыйар сыалы бэйэбэр туруорунарым.

Угаровтар дьиэ кэргэн мин идэбин таба тайаныыбар сабыдыаллаахтар. Варвара Николаевна урут миигин, күн аайы “Кэскилгэ” суруйарым иһин, түөрт эркиҥҥэ хаайтаран олорор инбэлиит уол быһыылаах дии саныыр эбит. Ол иһин доруобуйатын көннөрүннүн диэн, мээчик кэһиилээх Уус Алдаҥҥа кэлбитэ. Ол кэмҥэ «Мин XXI үйэ оҕотобун» бырайыакпынан өрөспүүбүлүкэбит бастакы бэрэсидьиэнэ М.Е. Николаев гранын оскуола үөрэнээччитэ ылар чиэскэ тиксибитим. Актыбыыс бөҕө уолу көрөн үөрбүтэ. Оттон Варвара Николаевна кыыһа Яна Угарова сурунаалым хара төрүттэниэҕиттэн анаан-минээн көрсүһэн, «ҮЙЭ»-тэн биэс сыл аҕа “Журфикс” уопутуттан үллэстэригэр махтана саныыбын. “Барытын кэмигэр ситиһэн ис”, – диэн сүбэлээччи. Ити “успейдаа” диэн тылын кэтэҕэр суруналыыстыка биисинэстиин дьүөрэлэһиитин кистэлэҥэ саһа сылдьар.

– Бу кэпстиибитигэр дьоҥҥо эрэ буолбакка, бэйэҕэр эмиэ элбэх түгэҥҥэ махтанаргын бэлиэтии иһиттим…

– Оннук. Кырачаан Коляҕа махтанабын – көҥүл тыынын арааран өйдөөбүтүгэр уонна эдэркээн сааһыттан хааччахха, халыыпка, хаайтарыыга киирбэтэҕэр. Айар киһиэхэ ол олус наада.

Үөрэнээччи Коляҕа махтанабын – хаһыаттарга салҕыбакка суругун бооччойон ыытан испитигэр, тулууругар, туппутун ыһыктыбат өрүтү бэйэтигэр ииппитигэр. Үөрэҕэр кыһалларыгар, бастыҥ буолууга дьулууру олоҕун нуорматын курдук ылыммытыгар.  Ийэтэ балыыһаҕа уһун кэмҥэ киирдэҕинэ, аҕата киин куоракка өр болдьоххо үлэлии бардаҕына, убайын кытта иккиэйэх хаалан, бэйэтин бэйэтэ көрүнэн, күнүн былааннаан сылдьарга үөрэммитигэр. Харса суох барытыгар холоноругар уонна хаһан да санаатын түһэрбэтигэр.

Устудьуон Николайга махтанабын – көргө-нарга бириэмэни бараабакка, үөрэҕи, үлэни өрө туппутугар, кыһаллан суруйан, маастарыстыбатын үрдэппитигэр. Биир идэлээхтэрин кытта чугастык билсэн-кэпсэтэн, оччолортон доҕордуу сыһыаны олохтообутугар. Бэйэтин туораттан көрөн, алҕаһын көннөрүнэригэр, сыыһатын билинэригэр уонна бэйэтигэр эрэллээҕэр.

Бүгүҥҥү ситиһиим – баарынан олорору сатыырым. Ол аата хайдах баҕарар балаһыанньаны табыгастаахтык иилииргэ-саҕалыырга дьулуһуу.  Онуоха өрүү ис куоласпын истэбин, тас сабыдыалга бэриммэппин, бэйэбин иһиллэнэбин. Оччоҕо суол бэйэтэ арыллан иһэр.  Холобура, биир күн В.В. Путин пресс-сэкирэтээрэ Дмитрий Пескову кэргэмминээн үстэ араас сиргэ көрсөн турардаахпыт.  Үһүспүтүгэр кэпсэтэн, кэргэнэ Татьяна Навка шоу-испэктээгэр дьиэ кэргэнинэн ыҥырыллыбыппыт. Итинник курдук соһуччу алтыһыылартан саҕыллан, киһи эйгэтэ кэҥиир. Этэргэ дылы, Дональд Трамп аргыстаах умнуллубат күн кытта буолан турар.   

Оччоҕо Песков көмөтүнэн быйыл Кыайыы күнүгэр Кыһыл болуоссакка параакка ыҥырыллынныҥ дуо?

Мин Бэрэсидьиэн пресс-кэмпириэнсийэлэригэр, Михаил Готовцев Үлэ Дьоруойа бэлиэтин тутарыгар, Кириэмил пулугар эҥин, о.д.а. историческай түгэннэргэ Кириэмил үгүс саалатынан дьаһалларга сырыттым. Онон пресс-сулууспалара миигин билэр бөҕө буоллахтара. Аан дойдуга дьалхааннаах кэм буолан, Улуу Кыайыы үбүлүөйдээх күннэрэ тэрээһин өттүнэн ымпыга-чымпыга элбэх этэ. Парааты 27 дойду лиидэрдэрин кытта тэҥҥэ олорон көрүү, биллэн туран, долгутуулааҕа. Кинилэр биһиги Арассыыйа Дьоруойа Тутабытын үрдүктүк сыаналыылларыттан киэн тутуннум.   

 “ҮЙЭ” сурунаал байыаннай дьайыы саҕаланыаҕыттан биир бастакынан волонтердар хамсааһыннарын өйөөбүтэ. Дьоммут-сэргэбит махталлаах дьыаланы оҥоро сылдьаллар диэн биһириибин. Суолтата уолаттарбытыгар ас-таҥас тиэрдиитигэр эрэ буолбатах – уҕараабат болҕомто ууралларыгар, тиийэн алтыһан, сүрэхтэрин сылаанньыталларыгар, эрэллэрин күүһүрдэллэригэр. 

Итинник сылаас сыһыан, истиҥ эйгэ саха омугар, хайдах да кэм үүнэ салайдын, мэлдьи баар буоллун, өрүү аргыстаһа туруохтун.

Анисия ИЕВЛЕВА, суруналыыс

  Мария ОЗЕРЯНСКАЯ, Семен ВИНОКУРОВ түһэриилэрэ, суруйуу дьоруойун социальнай ситимиттэн хаартыскалара туһанылынна.

Добавить комментарий