7 месяцев назад 674
Николаев ыччаттарыгар Чиряев туһунан
Дьокуускай куорат саҥа аһыллыбыт 40-с оскуолатын үөрэнээччилэрэ бэйэлэрин: “Николаев ыччаттарабыт”, – диэн киэн тутта этэллэр. Тоҕо диэтэххэ, кинилэр үөрэнэр кыһалара Саха Өрөспүүбүлүкэтин бастакы Президенэ Михаил Ефимович Николаев аатын сүгэр.
Судаарыстыбаннас күнүн көрсө, СӨ Национальнай бибилэтиэкэтин үлэһиттэрэ Анисия Иевлева уонна Михаил Эверстов-Соргу Николаев ыччаттарыгар Саха Сирин сайдыытыгар сүҥкэн өҥөлөөх Гавриил Иосифович Чиряев туһунан “Сайдыы суолугар эркээйи охсооччу” диэн документальнай киинэни көрдөрдүлэр.
Киинэни көрүү кэнниттэн режиссер Михаил Эверстов-Соргу санаа атастаһыытын тэрийдэ.
Оҕолор Чиряев уулуссата ким аатын сүгэр эбитин, Гавриил Иосифович быйыл төрөөбүтэ 100 сылын туолбутун, Обком I сэкирэтээрэ диэн Ил Дархаҥҥа тэҥнээх дуоһунас буоларын, Саха Сирин 17 сыл салайбыт кэмигэр Нерюнгрины, Удачнайы, Айхалы туттарбытын, ол кэмҥэ бырамыысыланнас күүскэ сайдыбытын, сир баайын хостооһун көрдөрүүтэ улааппытын, оҥорон таһаарар собуоттар, фабрикалар, комплекстар аһыллыбыттарын, тимир суол тардыллыбытын, гаас тиһигэ Кыһыл Сыыртан Дьокуускайга кэлбитин, элбэх таас дьиэ дьэндэйбитин, Бүлүүтээҕи ГЭС баар буолбутун, холкуостан сопхуоска көһүү ыытыллыбытын, нэһилиэктэргэ социальнай тутуу үлэтэ утумнаахтык барбытын, тустууктарбыт Олимпиадаҕа тиийэ ситиһиилэммиттэрин, саха тылын харыстыырга, олоҥхону таһаарарга сүҥкэн өҥөтүн, наука, култуура, үөрэх таһыма үрдүүрүгэр табыгастаах усулуобуйаны тэрийбитин сөхпүттэрин биллэрдилэр.
“Маннык чулуу дьон үлэлээн ааспыт буолан, күн бүгүн биһиги аан дойдуну кытта тэҥҥэ сайдабыт, онон кинилэр ааттарын умнуо суохтаахпыт, норуоттарын туһугар анаабыт олохторун үөрэтиэхтээхпит, холобур оҥостуохтаахпыт” диэн түмүккэ кэллилэр.
Тэрээһин бүппүтүн кэннэ, Х “а” кылаас үөрэнээччитэ Александра Соловьева режиссер Михаил Соргуга кэлэн: “Нерюнгри куораты мин эһэм туппута”, – диэн сэһэргээтэ.
Кэпсэтэн быһаарбыттара, Александра эһэтэ биллиилээх салайааччы Петр Семенович Федоров эбит – Бүлүү, Хаҥалас, Өймөкөөн, Томпо, Нерюнгри оройуоннарын Бочуоттаах гражданина, “Үлэ Кыһыл Знамята” орден кавалера, СӨ норуотун хаһаайыстыбатын үтүөлээх үлэһитэ, “Гражданскай килбиэн” бэлиэ туһааннааҕа.
Кини 1975-1983 сылларга Нерюнгритааҕы горком II сэкирэтээринэн, онтон 1989 сылга диэри Нерюнгри куоратын норуодунай депутаттарын Сэбиэтин исполкомун бэрэссэдээтэлинэн үлэлээбитэ. Онон Александра сөпкө бэлиэтиир: эһэтэ Петр Семенович куораты хара маҥнайгыттан тутуспут, саамай түбүктээх кэмигэр салайбыт киһи буолар. Кини эмиэ Гавриил Чиряев курдук, Бүлүүттэн төрүттээх. Баппаҕайга төрөөбүт.
Ити курдук VI “а”уонна Х “а” кылаастар киинэни болҕойон көрбүттэрэ уонна истибиттэрэ үөрдэр.
Бу көрсүһүү киһи быһыытынан сайдалларыгар, төрөөбүт дойдуларын историятын билэллэригэр туһалаах буоллун диэн туран, ыҥырбыт учууталларга – Гея Семеновна Корниловаҕа уонна Любовь Алексеевна Гоголеваҕа – ис сүрэхтэн бибилэтиэкэ аатыттан махтанабыт.
