7 месяцев назад 1471
Бибилэтиэкэ күнүгэр “Кинигэ – олохпут тутула” клип сүрэхтэниэ
Ыам ыйын 27 күнүгэр, Бибилэтиэкэ бүтүн Арассыыйатааҕы күнүнэн, саха тэлэбиидэнньэтин “Саҥа күн” биэриитигэр “Кинигэ – олохпут тутула” диэн клип сүрэхтэниитэ буолуоҕа. Саха Сиригэр кинигэ туһунан, арааһа, бу бастакы клип буолуохтаах.
Клиби устуу идиэйэтэ соһуччу үөскээбитэ. Ол курдук, Хатас нэһилиэгин П.Н. уонна Н.Е. Самсоновтар ааттарынан оскуола бибилэтиэкэрдэрэ Татьяна Антонова, Елена Гаврильева биир идэлээхтэригэр сэминээр ыыталларыгар, туох эрэ саҥаны-сонуну киллэрэн сэргэхситээри, кинигэ туһунан ырыа ыллыырга соруммуттар.
Тиэмэтин ыйан туран, хоһоонньут Светлана Егорова-Тулуйхаанаҕа тылын, оттон дьүрүлүн оскуолаларыгар үлэлиир биллиилээх мелодист Николай Андросовка суруйтарбыттар.
Ырыаны олунньуга куорат бибилэтиэкэрдэригэр иһитиннэрбиттэр. Бары олус сөбүлээннэр, хайҕааннар, саас Елена Михайловна миэхэ, суруналыыс идэлээх, бибилэтиэкэ эйгэлээх киһиэхэ эрийэн, киэҥ эйгэҕэ таһаарыан баҕарарын туһунан эппитэ.
Онуоха тута, аныгылыы эттэххэ, коллаборациялыырга тыл көтөхпүтүм: “Биһиги СӨ Национальнай бибилэтиэкэбит 100, эһиги Хатаскыт оскуолата 110 сыллара. Оруобуна бу үбүлүөйдээх сылбытыгар Национальнай бибилэтиэкэ хора тэрилиннэ. Онон ырыаны тэҥҥэ ыллыахха уонна онно медиа-кииммит үлэһитэ Михаил Эверстов-Соргулуун сценарийдаан, режиссердаан, таҥан, клип устуохпут”, – диэн.
Дьэ, ол толкуйбут олоххо киирэн, кэнчээри ыччаты ааҕыыга угуйар, бибилэтиэкэ билии биһигэ буоларын бигэргэтэр, кинигэ киһини сайыннарар сырдык күүһүн туоһулуур, биир кинигэ “дьылҕатынан” бүтүн бибилэтиэкэ үлэһиттэрин үлэтин көрдөрөр клип баар буолла.
Онон, доҕоттоор, сарсын сарсыарда 8 ч. 20 мүнүүтэҕэ “Саҥа күн” биэриини умнубакка көрөөрүҥ, оттон биһиги клипкэ уһуллубут Хатас оскуолатын VIII “а” уонна маҥнайгы кылаастарын үөрэнээччилэригэр махтанабыт, итиэннэ түгэнинэн туһанан, бибилэтиэкэ үлэһиттэрин идэлээх бырааһынньыктарынан эҕэрдэлиибит!
Анисия Иевлева.
