Оскуоланы идэлээх бүтэрэллэр

Бу күннэргэ өрөспүүбүлүкэ үрдүнэн Тиһэх чуораан лыҥкыныы тыаһыыр: үөрэх дьыла түмүктэммитин биллэрэн, төрдүстэри алын сүһүөх кылаастан улахан оскуолаҕа атааран, тохсустар ситэтэ суох орто үөрэх үктэлин дабайбыттарын бигэргэтэн, уон бииристэргэ олох киэҥ аартыга арыллыбытын туоһулаан…

Дьокуускай куорат Сайсары күөлүн кытылыгар турар Саха политехническай лицейи быйыл 105 үөрэнээччи бүтэрдэ: XI “а”-лар – инженернэй кылаас (сал. Наталья Прокопьевна Леонтьева), “б”-лар – гуманитарийдар (сал. Людмила Ивановна Оконешникова), “в”-лар – естественниктэр (сал. Корнилова Гея Семеновна), “г”-лар – политехтар (сал. Никитина Сардана Андреевна).

Үөрэх бу кыһата оҕо төрөөбүт тылын билэ улаатарын туһугар утумнаах үлэни ыытар, сахалыы эйгэни көдьүүстээхтик тэрийэринэн куорат оскуолаларыгар өрүү бастыҥ холобур буолар. Бу да Тиһэх чуораан бырааһынньыга икки тылынан олус истиҥник барда.

СПЛ туһунан киһи киэн тутта кэпсиирэ ити эрэ буолбатах, кэрэхсэбиллээҕэ элбэх. Холобура, манна оҕолор оскуоланы идэлээх бүтэрэллэр.

Ол курдук, дириэктэр Надежда Константиновна Тимофеева мындыр толкуйунан, үрдүк уонна орто анал үөрэх кыһаларын, тустаах тэрилтэлэри кытта сөбүлэҥ түһэрсэн, идэҕэ уһуйар 8 кластеры үлэлэтэллэр: “Горная промышленность” – хайа оробуочайдарын бэлэмнииллэр, “Транспорт” – массыына өрөмүөннээччилэри, “Строительство и ЖКХ” – силиэсэрдэри, “Энергетика” – электромонтажниктары, “Агротехнологии” – овощеводтары, “Креативная индустрия” – таҥас, киэргэл, тулалыыр уонна сыыппара эйгэлэрин дизайнердарын, “Цифровые технологии” – көмпүүтэр алдьаммытын оҥорооччулары, “Медицинские технологии” – ыарыһаҕы көрөр-истэр, бүөбэйдиир сиэстэрэлэри, медбырааттары.

Итини таһынан 2-с разрядтаах токардары, гончардары, симэҕи таҥар ювелирдары уһуйан таһаараллар. Үгүс уол, автооскуолаҕа үөрэнэн, “В” категориялаах суоппар быраабын ылар.

Тиһэх чуорааҥҥа Т.Г. Десяткин аатынан бырамыысыланнай техникум дириэктэрэ Дмитрий Игоревич Павлов кыһын устата дьарыктаммыт уонна тургутууну ситиһиилээхтик ааспыт уолаттарга 2-с разрядтаах электромонтажник сибидиэтэлистибэтин уонна “Десяткинское движение” диэн значоктары туттартаата.

Томпотооҕу горнай-геологическай техникум уонна Нерюнгритааҕы медицинскэй колледж бэрэстэбиитэллэрэ эмиэ туоһу суруктары үөрүүлээх быһыыга-майгыга туттартаатылар.

Выпускниктары уонна учууталлары Дьокуускай куорат үөрэҕин салаатын начаалынньыгын солбуйааччы Егор Афанасьевич Охлопков, Ил Түмэн аатыттан Ыччат парламенын бэрэссэдээтэлэ Антон Анатольевич Васильев, Сайсары түөлбэтин салалтатыттан куорат элбэх оҕолоох ийэлэрин түмсүүтүн бэрэссэдээтэлин солбуйааччы Матрена Владимировна Угапьева эҕэрдэлээтилэр.