Сонун сүүрээни сэргиэххэ

“Ay Yola” бөлөх “Хумай” диэн ырыата аан дойдуга аатырда. Үгүс киһи башкирдар “Урал Батыр” диэн эпостаахтарын биллэ, ону ааһан өссө персонажтарын кытары билистэ – куба-кыыс Хумай халлаан көтөрдөрүн баһылыга Самрау диэн аҕалаах уонна Күн ийэлээх эбит.

Бу ырыа түүр омуктар култуураларыгар болҕомтону күүһүртэ, ыччат бэйэтин төрдүн-төбөтүн, төрүт үгэһин, тылын-өһүн үөрэтэригэр күөртүүр күүс буолла.

Биһиги да олоҥхобутун ити курдук аныгылыы киэбинэн киэҥ эйгэҕэ билиһиннэриэхпитин сөп бөҕө буоллаҕа дии.

Айар-тутарга билигин оҥоһуу өйү да туһаныахха сөп. Арассыыйаҕа Никита Глухов диэн эдэр киһи нуучча классик поэттарын хоһоонноругар ИИ көмөтүнэн матыыптары суруйан, хаартыскаларын хамсатан, бэртээхэй клиптэри оҥорор буолла.

Бу сонун сүүрээни сахалар сэргээн, уус-уран литературабытын ыччакка тарҕатыыга туһаныахпытын сөп эбит диэн, холобур быһыытынан Никита Глухов роликтарын таһаарабыт. Көрүҥ, сэргээҥ, идиэйэтэ ылыҥ.