5 дней назад 883
Таатталар Дьокуускайга оһуохай түһүлгэтин түстээтилэр
“Оһуохай” өрөспүүбүлүкэтээҕи түмсүүтэ (сал. А.Д. Данилов), Улуу Кыайыы 80 сылын көрсө, Арчы дьиэтигэр улуустарынан “Кыайыы кынаттаах оһуохай” түһүлгэлэрин тэрийэр бэртээхэй бырайыагын чэрчитинэн бүгүн, муус устар 6 күнүгэр, таатталар оһуохайы оройуттан туттулар.
“Түмсүү – төлкө төрдө” дииллэринии, Арчы дьиэтигэр дьон тоҕуоруһа мустубута, киһи элбэх кэлбитэ – сүргэбитин көтөхтө.
Сахалыы сиэринэн, бастаан алгыһынан арчыланыы буолла. Сыт таһааран, аал уоту айах тутан, Иван Иванов алҕаата.
Үөрүүлээх чааһыгар Таатта улууһун баһылыгын социальнай боппуруостарга солбуйааччы Святослав Сунхалыров, Дьокуускайга олорор биир дойдулаахтар “Таатта” түмсүүлэрин бэрэссэдээтэлэ Владимир Аржаков, “Оһуохай” өрөспүүбүлүкэтээҕи түмсүү салайааччыта Александр Данилов эҕэрдэлээтилэр.
Александр Джурович уонна кини солбуйааччыта, Дархан этээччи, Ил Дархан оһуохайга стипендиата Марта Николаева бу түһүлгэни тэрийсибит дьоҥҥо “Оһуохай” түмсүү аатыттан күүстээх энэргиэтикэлээх хартыынаны – 15 тыһыынчаттан тахса киһи оһуохайдыы турар хаартыскатын – бэлэх туттаран үөртүлэр.
– Таатта улууһун хас биирдии нэһилиэгэр оһуохай түмсүүлэрин тэрийдибит. Былааммыт киэҥ. Холобура, бу сайын, Саха Сирин үтүөлээх этээччитэ Афанасий Попов көҕүлээһининэн, оҕолорго оһуохай лааҕырын арыйар соруктаахпыт, – диэн сырдатта Тааттаҕа оһуохай түмсүүтүн салайар Иван Иванов.
Өрөспүүбүлүкэҕэ билигин 3 эрэ Аар Дархан этээччи баар: Семен Черноградскай, Егор Осипов уонна Розалия Тихонова. Кинилэр таатталыы оһуохайы истэ кэлбиттэрэ – тэрээһин таһымын үрдэттэ. Түгэнинэн туһанан, өрөспүүбүлүкэҕэ киэҥник биллэр Дархан этээччи Валентин Хоруновы үбүлүөйдээх сааһынан эҕэрдэлээтилэр.
Дьоро күнү Уолбаттан “Уолбан” бөлөх уолаттара Алексей Аржаков, Леонид Егоров, Александр Харайданов, Владимир Васильев киэргэттилэр.
Улуу Кыайыыны уруйдуур, Манчаары оонньууларын айхаллыыр оһуохайы таһаардылар: Уолбаттан Алексей Аржаков, Харбалаахтан Айаал Быгынанов, Чөркөөхтөн Михаил Прохоров уонна Мария Сабарайкина, Дьохсоҕонтон Лариса Попова уонна Ытык Күөлтэн Иван Иванов.
Дьокуускай куорат олохтоохторугар таатталыы оһуохайы билиһиннэрэ, хайдах этиллэрин иһитиннэрэ, хаамыытын көрдөрө, төрүт үҥкүүбүт нэҥиринэн эрчимирдэ, кылыһахтаах куолас дорҕоонунан ыраастыы, сахалыы хомоҕой тылынан санаабытын сааһылыы, ыраах Таатта сириттэн анаан-минээн оҥостон кэлэн, өрөбүл күммүтүн сэргэхсиппиттэрин, дойду тыынын биэрбиттэрин, оһуохай сомоҕолуур эйгэтин түстээбиттэрин иһин Таатта улууһун дьаһалтатыгар (баһылык э.т. Р.И. Захаров), Норуот айымньытын дьиэтигэр (дир. Г.Г. Вырдылин), Таатта оһуохайын түмсүүтүгэр (сал. И.Ф. Иванов) махтанабыт!
“Таатта” түмсүү.
Михаил Соргу түһэриилэрэ.
