Манчаары оонньууларыгар диэри 100 хонук хаалбытын бэлиэтээн

Бу сайын Тааттаҕа ыытыллар “Манчаары оонньуулара” күрэс буолара оруобуна 100 хонук хаалбытын бэлиэтиир “Түмсүү – төлкө төрдө” тэрээһин кулун тутар 30 күнүгэр Дьокуускайга буолла.

СӨ Бырабыыталыстыбатын бэрэссэдээтэлин солбуйааччы Сергей Местников, Таатта улууһун баһылыгын э.т. Руслан Захаров, СӨ спорка уонна физкультураҕа миниистирэ Леонид Спиридонов, саха төрүт көрүҥнэригэр “Сахаада-спорт” ассоциациятын бэрэсидьиэнэ Александр Ким-Кимэн, Таатта улууһун бочуоттаах гражданина Семен Бурцев кыттыыны ыллылар.

-Тааттаҕа Манчаары оонньуулара ыытылларын туһунан уураах тахсыаҕыттан 4 сыл ааста. Ити кэм устата былааннаах үлэ баран, аны 3 ыйынан Ытык Күөлгэ Саха сирин дьоно-сэргэтэ тоҕуоруһа мустуоҕа, Арассыыйа эрэгийиэннэриттэн, Москубаттан ыалдьыттар биһиги култуурабытын, үгэспитин, күрэхтэһиибитин көрө-истэ кэлиэхтэрэ. Маныаха тэрийэр кэмитиэт үлэтин сыала-соруга диэн, сүрүн спортивнай, социальнай эбийиэктэри кэмигэр үлэҕэ киллэрии, итиэннэ култуурунай, спортивнай тэрээһиннэри үрдүк таһымнаахтык тэрийэн ыытыы буолар. Билиҥҥитэ балачча үлэ барда: интэринээттээх үөрэх кыһата баар буолла, тыа сиригэр суох баараҕай спортивнай комплекс 70 бырыһыана түмүктэнэн, сотору аанын тэлэччи арыйыаҕа, стадион силигэ ситэн эрэр, о.д.а. Манчаары оонньууларыгар Таатта улууһа киэркэйэн, тупсаҕай көстүүлэнэн, ыалдьыттары үчүгэй бэлэмнээх көрсүөҕэр саарбахтаабаппын. Бу мустубуккутун курдук, Тааттаттан төрүттээх дьон бары биир санааҕа түмүстэххитинэ, ханнык баҕарар үлэ кыайтарыа, оонньуулар ситиһиилээхтик ааһыахтара.

Аҕыйах хонуктааҕыта Бырабыыталыстыба тиэрмиҥҥэ хамыыһыйата мунньахтаата. Спортивнай тиэрминнэри сахатытыы боппуруостарын үөрэтэн көрөн баран, “национальнай оонньууларга спартакиада” диэни “саха төрүт көрүҥнэригэр күрэс” дииргэ диэн быһаарбыппыт. Таатталар ити тиэрмини бастакынан бүгүн сүрэхтээтигит. Чахчыта да, маннык улахан тэрээһиннэр төрөөбүт тылбытын тарҕатыыга төһүү буолуохтаахтар.

Спорт миниистирэ Леонид Спиридонов 100 сыллааҕыта Тааттаттан тахсыбыт улуу киһибит Былатыан Ойуунускай, Саха АССР киин кэмитиэтин бэрссэдээтэлинэн олорон, өрөспүүбүлүкэҕэ физкультурнай хамсааһыны төрүттээбитин, төрүт көрүҥнэри нэһилиэнньэҕэ тарҕатыыга күүстээх үлэни ыыппытын аҕынна. Бу түмсүү күрэс тыынын норуокка тиэрдэр, туох үлэ барбытын, Манчаары оонньууларыгар анаан оҥоһуллубут брендбуктары билиһиннэрэр тэрээһин буоларын бэлиэтээтэ.

“Сахаада-спорт” бэрэсидьиэнэ Александр Ким-Кимэн Саха сирэ федеральнай сокуоҥҥа тиийэ төрүт көрүҥнэри туруорсарын, федеральнай реестргэ мас тардыһыыта, хапсаҕай, ыстаҥа киирбитин, мас тардыһыыта аан дойду таһымыгар тахсыбытын, оттон хапсаҕайга аан дойду чөмпүйэнээтэ былырыын Кыргыстааҥҥа буолбутун, В.Путин 2013 сыллаахха төрүт көрүҥнэри олимпийскай бырагыраамаҕа киллэрэр тыл көтөхпүтүн, онон биһиги мас тардыһыыбыт хаһан эмэ Олимпиада көрүҥэ буоларыгар эрэнэрин, итиэннэ бу Манчаары оонньууларын төрүттээбит Афанасий Алексеев Манчаары ХХII оонньууларыгар тиийбэккэ, биир ый анараа өттүгэр суох буолбутун, ол эрээри кини саҕалаабыт дьыалата сайда туруоҕар итэҕэйэрин, Арассыыйа эрэгийиэннэриттэн биһиги эрэ төрүт көрүҥнэргэ анаммыт спортивнай кииннээхпитин, өрөспүүблүкэбит төрүт оонньууларбытын тарҕатыыга утумнаах үлэни ыытарын туһунан сиһилии сырдатта.

Таатта улууһун баһылыгын э.т. Руслан Захаров уонна гражданскай оборонаҕа ССРС туйгуна, Саха АССР үөрэҕириитин үтүөлээх үлэһитэ, Таатта улууһун уонна нэһилиэгин Бочуоттах гражданина Семен Бурцев таатталар ааттарыттан эҕэрдэлээтилэр уонна Манчаары оонньуларыгар куорат олохтоохторун ыҥырдылар.

Күрэскэ диэри 100 хонук хаалбытын туоһулуур электроннай таблону холбуур кунуопканы спорт миниистирэ Леонид Спиридонов, Таатта улууһун баһылыгын э.т. Руслан Захаров, атах оонньууларыгар СӨ спордун маастара, куобахтаан ойууга өрөспүүбүлүкэ рекордсмена Андрей Васильев, Ытык Күөл Алампа аатынан 1-кы №-дээх оскуолатын VIII кылааһын үөрэнээччитэ, төрүт оҕунан ытыыга СӨ спордун маастара, өрөспүүбүлүкэ рекордсмена Дайаана Борисова баттыыр чиэскэ тигистилэр.

Манчаары оонньууларын өрөгөй ырыатын суруйууга куонкурус биллэриллибитэ. Онно Дьулустаан Толстяков хоһооно, Ариана Решетникова дьүрүлэ кыайбыта. Ол гимни бу күн Таатта эр дьонун ансаамбыла толордо, бар дьоҥҥо аан бастаан ыллаан иһитиннэрдилэр.