4 дня назад 185
Былатыан ыччаттара
Арассыыйаҕа Аҕа дойдуну, өрөспүүбүлүкэҕэ Ийэ дойдуну көмүскээччилэр, итиэннэ Улуу Кыайыы 80 сылларынан Таатта улууһун эдэр ыччатын икки ардыларыгар «Былатыан ыччаттара» диэн V төгүлүн ыытыллар күрэх буолан ааста.
Сыала-соруга: ыччакка патриоттуу тыыны иҥэрии, чөл олоҕу тарҕатыы, сомоҕолоһууну тэрийии.
Күрэх 4 түһүмэҕинэн барда:
1) «Ааҕыы умсулҕана»
2) «Кыайыы ыһыаҕын мала-сала»
3) “Кэрэни кэрэхсээн” – хартыыналары таайыы
4) «Түргэттэр, сымсалар» — саха төрүт оонньууларыгар куоталаһыы.
Түһүмэхтэр сорудахтара Кыайыы 80 сылыгар туһуламмыттар.
Харбалаах аатыттан Мытник Алена Алексеевна, Оконешников Александр Владимирович, Татаринова Людмила Андреевна «ХОК» диэн ааттаах хамаанданан кытыннылар.
Уопсайа улуустан 7 хамаанда күрэхтэстэ. Олус интэриэһинэйдик, бэһиэлэйдик ааста. Элбэҕи билэн, билсэн, үөрэн-көтөн тарҕастылар.
Түмүккэ Ытык Күөл оҕо саадын «Күн туллуктара» хамаандата I миэстэни ылла уонна бу сылга көһө сылдьар кубок хаһаайыттара буоллулар.
Олох-дьаһах хомунаалынай хаһаайыстыбатын эдэр эрчимнээх уоланнара иккистээтилэр.
Харбалаахтан «ХОК» хамаанда бочуоттаах III миэстэни ылары ситистэ!
Бу хамаанданы олохтоох түмэл салайааччыта С.А.Васильева, библиотекарь А.В.Тарабукина бэлэмнээн кытыннардылар.
Чахчы да, киэн туттар чулуу киһибит ыччаттара буоларгытын хаһан да умнумаҥ! Кини сырдык аатын суолдьут сулус оҥостуҥ!
Арина Тарабукина, Харбалаах, Таатта
