6 дней назад 1080
Дэгиттэр талааныгар сүгүрүйэн ааһыаххайыҥ…
Тыйаатыр артыыһын анараа дойдуга ытыс дохсун тыаһынан атаарар үгэс баар – ол аата кини талааныгар сүгүрүйэллэрин биллэрэллэр. Оттон култуура үлэһитэ бу күн сириттэн күрэннэҕинэ, кини үлэлээбит кэмигэр нэһилиэнньэ төһө сэргэхтик олорбутун, ол кэмнээҕи умнуллубат кэнсиэрдэри, кини салайыытынан тэриллибит гастроллар көрдөөх түгэннэрин, куонкурустарга кыттыыны, фестивалларга ситиһиилэри, тэрийбит куруһуоктарын, дьону ускуустуба көрүҥнэригэр уһуйбутун, кулууп оччотооҕу үлэтин уонна, саамай сүрүнэ, кини сыанаҕа айбыт уобарастарын ахталлар.
Дьохсоҕоҥҥо өр кэмҥэ култуура үлэтин сүрүннээбит, кулууп дириэктэринэн уһуннук үлэлээбит Татьяна Михайловна Халыеваны бэҕэһээ идэлээх күнүгэр – Култуура үлэһиттэрин күнүгэр – ийэ буоругар кистээтилэр…
«Ырыаһыт өллөҕүнэ, ырыата хаалар» дииллэринии, Татьяна Михайловна баяҥҥа доҕуһуоллуурун, ыллыырын-туойарын, айылҕаттан артыыстыыр дьоҕурун көрбүт дьон, оһуохайдыырга, тойуктуурга, чабырҕахтыырга, ыллыырга үөрэппит оҕолоро кинини өрүү өйдүү-саныы сылдьыахтара диэн туран, өссө биирдэ ытыктыыр киһибит дэгиттэр талааныгар сүгүрүйэн ааһыаххайыҥ…
