Саха төрүт оонньууларыгар күрэхтэстилэр

Арассыыйаҕа Аҕа дойдуну, Саха сиригэр Ийэ дойдуну кѳмүскээччилэр сылларынан, Баппаҕаайы нэһилиэгэр Аҕа сылынан кулун тутар 15 күнүгэр Илбэҥэ сэлиэнньэтигэр III-IV кылаас уолаттарыгар «Эрдьигэн-2025» күрэх буолан ааста.

Бу күрэхтэһии педагогическай үлэ уонна СӨ үѳрэҕириитин тиһигин бочуоттаах бэтэрээнэ, настаабынньык учуутал, сэрии оҕото, ѳр сылларга Баппаҕаайы оскуолатыгар физкультура, НВП учууталынан үлэлээбит Афанасьев Семен Иннокентьевич 85 сааһыгар ананна.

Кини 1940 с. кулун тутар 11 күнүгэр Бүлүү улууhун Тѳҥүргэстээх нэhилиэгин олохтоохторо Афанасьевтага үһүс оҕонон тѳрѳѳбүт. 1971 сыллаахха Бүлүүтээҕи педагогическай училище физкультурнай салаатын бүтэрбит.

Баппаҕаайы оскуолатыгар 1972 сылтан 40 сыл устата халбаҥнаабакка үлэлээбитэ. Үѳрэнээччилэрэ улуус күрэхтэһиилэригэр: теннискэ, баскетболга, тустууга, хайыhарга – өрүү инники күѳҥҥэ сылдьаллара, өрөспүүбүлүкэҕэ тиийэ кыттан ситиhиилэнэллэрэ. Кэлин оҕолору дуобакка, саахымакка эрчийбитэ.

«Эрдьигэн-2025» күрэхтэһии кыттааччылара: Баппаҕаайыттан Харлампьев Кеша, Борисов Саша, Кириллин Эрхаан, Васильев Саша, Николаев Артем, Лѳкѳчѳѳнтөн Сидоров Сарыал, Федоров Дьулуур, Харлампьев Айаан, Дьокуускай куорат Саха гимназиятыттан Семен Иннокентьевич сиэнэ, IV кылаас үѳрэнээччитэ Дьолуо Уйгун.

Уолаттар тѳһѳ күүстээхтэрин, кыахтаахтарын, дьулуурдаахтарын, түргэннэрин, имигэстэрин, сымсаларын кѳрдѳрѳр саха норуотун оонньууларыттан күрэх түһүмэхтэрэ: ойбонтон уулааһын, кириэс тэбии, отоннооһун эбэтэр хомуур күрэх, ѳһѳс торбос, тирэхтээх эр бэрдэ уонна мас тардыһыыта.

Уолаттары сынньата таарыйа, түһүмэхтэр быыстарыгар оскуола оҕолоро ыллаан-туойан, үҥкүүлээн, хоһоон ааҕан, муода кѳрдѳрѳн, кѳрѳѳччүлэри аралдьыттылар.

Күрэхтэhии түмүгүнэн Баппаҕаайы уолаттара үс бочуоттаах миэстэни эрэллээхтик ыллылар. III м – Борисов Саша, II м – Кириллин Эрхаан уонна “Эрдьигэн Бэргэн” – Николаев Артем.

Семен Иннокентьевич төрөппүт оҕолоро кыайыылаахтарга кубок, мэтээл уонна бириис туттардылар. Кѳхтѳѳх кыттыыны ылбыт уолаттарга – мэтээллэр, ѳйдѳбүнньүк бэлэхтэр.

Маннык бэртээхэй тэрээhини Баппаҕаайы оскуолатын алын кылааhын учуутала Жиркова Ирина Николаевна, нуучча тылын уонна литературатын учуутала, Семен Иннокентьевич кыыhа Винокурова Алина Семеновна сүүрэн-кѳтѳн, эрдэттэн бэлэмнэнэн, үрдүк таhымнаахтык тэрийэн ыыттылар.

Кинилэргэ күүс-кѳмѳ буолан, күрэхтэhиини судьуйалаатылар: ОБЗР учуутала Антонов Аян Анатольевич, спорка тренер Иванов Дмитрий Маркович.

Дьүүллүүр сүбэҕэ физкультура учууталлара Иванова Мария Константиновна, Степанов Егор Егорович уонна Семен Иннокентьевич уола Афанасьев Александр Семенович үлэлээтилэр.

Афанасьевтар дьиэ кэргэн, аҕаларын чиэстээн, үбүлүѳйүн бэлиэтээн, урут 1996 сыллаахха Семен Иннокентьевич бэйэтэ тэрийэн ыыппыт «Эрдьигэн Бэргэн» күрэхтэhиитин сѳргүтэн, уолаттарга умнуллубат тыҥааһыннаах түгэннэри бэлэхтээтилэр.

Кыттааччыларга анал эмблемалаах, ааттара суруллубут футболкалары сакааhынан оҥотторон кэтэрдибиттэрэ – кэлин бу тэрээһини ѳйдүү-саныы сылдьалларыгар өйдөбүнньүк буолан хаалыаҕа.

Бу күн Семен Иннокентьевич Афанасьевы Баппаҕаайы оскуолатын салалтата, олорор түѳлбэтин салайааччыта С.Н. Николаева, үѳрэппит оҕолоро (1974, 1977, 1979, 1997 выпустар) эҕэрдэлээтилэр, ис сүрэхтэн тахсар истиҥ тылларын анаатылар, ахтан-санаан ыллылар.

Нэhилиэк бэтэрээннэрин сэбиэтин бэрэссэдээтэлэ Николаева Александра Алексеевна Семен Иннокентьевичка «Бүлүү улууhун бочуоттаах бэтэрээнэ» дьоһун бэлиэни туттарда.