3 недели назад 571
Суруллубут ааҕыллыахтаах…
Бүгүн кулун тутар 3 күнэ – Суруйааччы аан дойдутааҕы күнэ.
Суруйааччы ааҕааччылаах буолуохтаах. Аныгы ыччаты аахтараары, Национальнай бибилэтиэкэ уонна “Саха сирин култуурата” айар холбоһук ҺӨҔҮҤ хамсааһын чэрчитинэн буктрейлер күрэҕин үрдүк таһымнаахтык тэрийэн ыыппыттара. Ол куонкуруска киирбит бастыҥ үлэлэри сэҥээрэ көрүҥ, ыйыллыбыт сигэлэринэн кинигэлэри онлайн ааҕыҥ.
Егор Неймохов “Хара мааска”
Сэрии кэнниттэн урусхалламмыт дойду устун кэрийэ сылдьан уорар-талыыр “Хара Мааска” баанда, аны Саха сиригэр кэлэн буулаабытын, старшай лейтенант, өрөспүүбүлүкэ бастакы Спартакиадатын (1932 с.) мас тардыһыытыгар муҥутуур кыайыылааҕа Гавриил Романович Десяткин-Күүстээх Дэһээккин салалтатынан биһиги милииссийэлэрбит туппуттара.
Норуодунай суруйааччы Егор Неймохов ол чахчыларга олоҕуран суруйбут дэтэктиибигэр Күүстээх Дэһээккин төрөппүт уола, Социалистическай Үлэ Дьоруойа, көмүс бырамыысыланнаһын сайыннарбыт, “Якутзолото” тэрилтэни салайбыт Тарас Гаврилович Десяткин аатынан техникум “Альтаир” театральнай устуудьуйатыгар дьарыктанар устудьуоннар (сал. Ольга Михайловна Яковлева) 2023 сыллаахха буктрейлер оҥорбуттарын сэргээҥ:
Манна даҕатан эттэххэ, Егор Петрович Неймохов быйыл төрөөбүтэ 75 сыла. Онон Томпо улууһун Мэҥэ Алданыгар кини сылын биллэрбиттэрэ.
Бу кинигэни онлайн ааҕар сигэ: https://new.nlrs.ru/open/12814
Дьолуолаах “Биһик” сэһэнэ
Саха сирин суруйааччыларын сойууһун чилиэнэ, хоһоонньут, кэпсээнньит, “Сахаада” спордун маастара, СӨ физкультураҕа уонна спорка туйгуна, Күндээдэ нэһилиэгин бочуоттаах гражданина, «Ньурба уоттара» айар түмсүү салайааччыта Пономарев Дмитрий Николаевич-Дьолуолаах Мэҥэ Хаҥалас Мэлдьэхсититтэн төрүттээх буолан, Чурапчы көһөрүллүүтүн туһунан “Биһик” сэһэни киһи долгуйа ааҕар гына уустаан-ураннаан суруйбута. Бу сэһэн 2022 сыллаахха “Айар” кинигэ кыһатын “Бастыҥ проза” бириэмийэтин ылбыта.
Буктрейлеры суруйааччы биир дойдулааҕа, Ньурба улууһун Күндээдэ олохтооҕо Борис Николаевич Габышев-Варламов оҥорбута, куонкуруска бастакы миэстэни ылан, ноутбугунан наҕараадаламмыта.
Суорун Омоллоон “Күкүр Уус” драмата
Д.К. Сивцев “Күкүр Уус” драматыгар Айыы Кыһатын Х кылааһын үөрэнээччитэ Айыллаана Иванова, оччолорго ахсыска үөрэнэр эрдэҕинэ, доҕотторун уонна аймахтарын оонньотон, кытыннаран, бэйэтэ тэттик киинэ курдук буктрейлеры устубуттарын көрүҥ:
Сэҥээрбит буоллаххытына, кинигэни ааҕар сигэ: https://new.nlrs.ru/open/9361
