2 месяца назад 172
Аҕа уонна уол
Олунньу 23 күнэ – хорсун быһыы, күүстээх санаа, албан аат бырааһынньыга.
Таатта улууһун Харбалаах “Кэскил” уһуйааныгар ааспыт нэдиэлэ устата “Төрөөбүт дойдуга бэриниилээх буолуу тапталтан саҕаланар” нэдиэлэ буолан ааста.
Нэдиэлэ бастакы аҥаарыгар оҕолорго төрөөбүт сирдэригэр-уоттарыгар харыстабыллаахтык сыһыаннаһыы туһунан араас хайысхалаах үлэлэр ыытылыннылар.
Нэдиэлэни түмүктүүр күҥҥэ, олунньу 21 күнүгэр, нэһилиэк таһымыгар спорт инструктор К.Г. Литвинцев, олохтоох библиотека сэбиэдиссэйэ А.В. Тарабукина тэҥҥэ үлэлэһэн, Улуу Кыайыы 80 сылынан, Аҕа дойдуну көмүскээччи күнүнэн «АҔА УОЛУНААН» диэн спортивнай күрэх буолан ааста.
Бу күрэххэ орто, улахан, бэлэмнэнии бөлөх уолаттара аҕаларын, убайдарын кытта кытыннылар.
Уопсайа 9 хамаанда илин-кэлин түһүстэ.
Биэс түһүмэх түмүгүнэн, Алеша Бродников аҕата Виктор Спиридиновтыын бастаатылар, Шестаков Силантий, Арсений аҕалара Алексей Шестаковтуун II миэстэ буоллулар, Макаров Владик аҕата Андрей Макаровтыын үһүстээн, кыайыы өрөгөйүн биллилэр.
Атыттар номинация ылан, үөрэн-көтөн тарҕастылар.
Олус сэргэх тэрээһин буолан ааста, кэлэн кыттыыны ылбыт аҕаларбытыгар, төрөппүттэрбитигэр улахан махталбытын тиэрдэбит.
Оксана Андреева,
Харбалаах, Таатта.
