1 месяц назад 103
Кинигэ бэлэхтэһэр күн
Олунньу 14 күнүгэр Кинигэ бэлэхтэһэр күн бэлиэтэнэр. Дьааҥы улууһун Боронук оскуолатыгар бу күн “Кинигэ бэлэхтээһин” диэн аахсыйа тэрилиннэ.
Төрдүс уруок кэнниттэн үөрэнээччилэр уонна учууталлар аактабай саалаҕа муһуннубут. Бастаан алын кылаастар оҕолоро аахпыт кинигэлэрин билиһиннэрбиттэрэ уонна ол кинигэлэрин бэйэ-бэйэлэригэр хардарыта бэлэхтэспиттэрэ. Онтон үрдүкү кылаастар оннук гыммыттара.
Бу аахсыйаҕа кыттаары, хас биирдии үөрэнээччи дьиэтиттэн оҕо сэҥээрэр ис хоһоонноох, ойуулаах-уруһуйдаах кинигэни аҕалбыта. Боронукпутугар элбэх да интэриэһинэй кинигэ баарын билэн сөхтүбүт, бары олус диэн сэҥээрдибит.
Кинигэ бэлэхтэһэр аахсыйа биһиги оскуолабытыгар сылын аайы ыытыллар. Тоҕо диэтэххэ, кинигэни ааҕаммыт, биһиги күнтэн күн билиибит хаҥыыр.
Ааҕыыга көҕүлүүр бу ураты тэрээһини оскуолабыт учуутала Светлана Васильевна Ноговицына ыытта.
Мария Мордовская, XI кылаас,
Боронук, Үөһээ Дьааҥы
