1 месяц назад 280
Төрөөбүт тылбыт алаадьы сыттаах, окко сууламмыт кэһиилээх…
Төрөөбүт тыл уонна сурук-бичик күнэ сылын аайы өрөспүүбүлүкэ үрдүнэн бэрт тэрээһиннээхтик ааһар. Оскуолаҕа ахсын араас тэрээһиннэр буолаллар.
Үөһээ Бүлүү М.А. Алексеев аатынан Өрөспүүбүлүкэтээҕи интэринээт-лиссиэйигэр бу дьоро күн алгыстаах алаадьыны үөрүүлээх линейка кэмигэр буһарыытыттан саҕаланна.
Көмүлүөк оһох таһыгар алаадьы буһан сырдьыгыныыр тыаһа, ыраастыыр-арчылыыр сыта барыбытын ураты турукка киллэрдэ.
Бэһис кылааспыт оҕолоро олоҥхону куукулалаах толордулар, алтыстар төрөөбүт дойду туһунан ырыалары ыллаатылар. Эбээлэрбит кэлэн, алгыс тылын эттилэр.
Оскуоланан бары, алаадьыбыт курдук төгүрүктүү туран, тоҥолохтон тутуһан, күөрчэхтии эргийдибит, эһиэхэйдээн эҥээриттибит . “Күн оһуохайа” бырайыак урукку сылларын муҥутуур кыайыылаахтара Алиса Иванова, Кира Спиридонова, Виолетта Васильева таһаардылар. Онус кылаас уолаттара хоһоон аахтылар.
Күнүс 14.00 чаастан “КҮН” оҕолоро төрөппүттэргэ уонна үөрэнээччилэргэ “Кини кимий?” диэн Т.О.К. оонньууну ыыттылар.
Киэһэ интэринээппит төрөппүттэрэ ыраах улуустартан, нэһилиэктэртэн сылдьар оҕолорго, “окко сууламмыт кэһии” диэн ис хоһоонноох бырайыагынан, сахалыы астаах мааны сандалыны тартылар.
Онон бүгүн, чахчы да, үтүө мааны сэргэх күн ааста. Төрөөбүт тылбыт дьылҕата биһиги бүгүҥҥү сыһыаммытытттан тутулуктааҕын бары өйдөөн тарҕастыбыт.
М.А. Алексеев аатынан Өрөспүүбүлүкэтээҕи интэринээт-лиссиэй медиакиинэ.
