2 месяца назад 404
Туох барыта тапталтан саҕыллар…
Бу дьыл олунньу 1 күнүгэр Бүлүү куоратын И.Л. Кондаков аатынан гимназиятыгар үгэс буолбут баал буолан ааста.
Быйылгы баал “Всё начинается с любви…” (“Туох барыта тапталтан саҕыллар”) диэн тиэмэҕэ ыытылынна.
Бу үтүө тэрээһин өссө 2011 сылтан гимназистары аан дойду култуураларын кэрэ эйгэтигэр сыһыарар, оҕо биирдиилээн, ханыылаһан, күргүөм айар-тутар дьоҕурун сайыннарар сыаллаах ыытыллар буолбута.
Бүлүү М.Н. Жирков аатынан Култууратын дыбарыаһын саалата бу күн тобус-толору көрөөччүлээх. Ыҥырыылаах ыалдьыттар, төрөппүттэр, оҕолор, учууталлар оннуларын булан олорбуттар. Бары туох эрэ дьиктини кэтэһэн, ис-истэриттэн сырдаабыт дьүһүннээхтэр, харахтара мичилиспит.
Сабыы аһыллаатын кытта, бүгүҥҥү киэһэни иилээн-саҕалаан ыытыахтаах X-XI кылаастар уоланнара Воронов Аврелий, Егоров Тимур, Катанов Алмаас, Алексеев Эрхан, Захаров Борис, көрөөччүлэр ытыстарын тыаһыгар доҕуһуоллатан, сыанаҕа таҕыстылар.
Бу театрализованнай тэрээһиҥҥэ оҕолуун-учууталлыын бары кытталлар. Баалы учууталлар полонез үҥкүүнэн арыйдылар, математика учуутала Тамара Егоровна Соловьева, эдэркээн ырыаһыт Лиза Архангельская (VII кылаас) кэрэ куоластарынан романс толорон, бу киэһэни киэргэттилэр.
Гимназия өссө биир талааннаах үөрэнээччитэ Лобашев Дима (VII кылаас) фортепианоҕа “На заре ты ее не буди” романсы оонньообутуттан бары да дуоһуйууну ыллыбыт. Таптал ыраас, истиҥ иэйиитин арыйар араас хоһоон, инсценировка биһигини урукку кэмнэргэ тириэрдэ сырыттылар.
Кыргыттар солко былаачыйанан суугунаан, хобулукка дугунан, остуоруйа кэрэ куоларын санаталлар. Уолаттар үрүҥ ырбаахы, жабо, хара фрак таҥастаах туттардыын-хаптардыын тупсубуттар.
Муусука дьүрүскэнигэр уйдаран, вальс, полонез үҥкүүлээн дайдылар.
Оҕолор, ый устата улахан кылаас үҥкүүһүттэриниин, төрөппүттэриниин бэлэмнэммит вальстарын үрдүк сыанаҕа толорон, көрөөччүлэр биһирэбиллэрин ылыан ыллылар.
Маннык үрдүк таһымнаах баалы иилээн-саҕалаан тэрийдэ дириэктэри иитэр үлэҕэ солбуйааччы Татьяна Валентиновна Поскачина, сценаристар нуучча тылын, литературатын учууталлара Светлана Степановна Игнатьева, Анна Валерьевна Филиппова, кэрэ үҥкүүлэри туруорда хореограф Николь Кононовна Аммосова.
Аныгыскы баалга көрсүөххэ диэри!
Наина Ионова, IX “б” кылаас,
Бүлүү.
