1 месяц назад 471
Михаил Бурнашев оонньоммотох оруолун оонньоотулар…
“Ленинград блокадата” диэни иһиттэххэ, сахаларга сыһыаран, 1940 сыллаахха 34 талааннаах оҕо, артыыс идэтин баһылаары, театральнай институкка үөрэнэ тиийэн баран, сэрии саҕаланан, сорох уолаттара кыргыһыы толоонугар тыыннара быстан, куоракка хаалбыттар төгүрүктээһиҥҥэ түбэһэн, хоргуйан, ыалдьан, үксүлэрэ суорума суолламмыттарын саныы биэрэҕин. Олор истэригэр Уус Алдан Курбуһаҕыттан Михаил Бурнашев баара.
“Бурнашев Мишаны олунньу 27 күнүгэр сарсыарда массыынаҕа олордон илдьэ кэлээрибит сыҕарытан, тас ааҥҥа таһаарбыппыт, илиитэ, атаҕа хамсаабат буолбут этэ. Хараҕын уута иэдэһинэн таҥнары сүүрэн түһэрэ… Ити барыта сэрии оҥорбут соро… Институт дириэктэрэ Миша Бурнашеву агдакатыттан көтөҕөн киллэрэн, вестибюль ортотугар туруоран кэбиспитэ. Оннук туран хаалбыта… Барсар кыаҕа суоҕа. Биһиги массыынаҕа тиэллэн, “олох суолунан” Финляндскай вокзалга кэлбиппит”.
Итинник диэн ахтыытыгар суруйбут бииргэ үөрэммит кыыһа, дойдуларыгар тыыннаах ордон кэлбит 15 устудьуонтан биирдэстэрэ – Хаҥалас Булгунньахтааҕар олорбут Ксения Васильевна Гаврильева.
Ол айылҕаттан артыыс уол Михаил Бурнашев оонньоммотох оруолун, эстибит эрилин биир дойдулаах кэнчээри ыччата, Курбуһах Н.Н. Окоемов аатынан орто оскуолатын VIII уонна IX кылаастарын үөрэнээччилэрэ, “Ленинграды төгүрүктээһин ыар кэмнэрэ…” тэрээһиҥҥэ “Өлүүнү кыайбыт олох” диэн театрализованнай дьүһүйүү гынан көрдөрдүлэр.
–Сценарийын нуучча тылын учуутала Екатерина Егоровна Аммосова суруйбута. Олохтоох бибилэтиэкэ үлэһитэ Марфа Анатольевна Пестрякова бу устуудьуйа устудьуоннарын туһунан кинигэлэри булан биэрбитэ. Михаил Бурнашевка аналлаах альбом баар эбит. Онно олоҕуран оҥоһулунна.
Дьүһүйүүнү култуура үлэһитэ Елена Николаевна Винокурова салалтатынан нуучча тылын учуутала Валентина Афанасьевна Тордуянова, музей үлэһитэ Мария Петровна Бурнашева туруордулар.
Сүрүн оруолу IX кылаас үөрэнээччитэ Курилкин Кеша толордо, Михаил Бурнашев трагическай уобараһын толору арыйар гына итэҕэтиилээхтик оонньоото. “Үрүйэчээн” ансаамбылга үҥкүүлүүр, итиэннэ кэнсиэрдэргэ ыллыыр буолан, Кеша сыанаҕа тахса үөрүйэх, холкутук туттар-хаптар, толлон турбат.
Барыта 14 оҕо кытынна. Михаил Бурнашев туһунан эрдэттэн билэллэр этэ. Былырыын Ленинград блокадаттан букатыннаахтык босхоломмута 80 сылынан кылаас чааһыгар кэпсээбиттэр эбит.
Бу үөрэх дьылыгар Улуу Кыайыы 80 сылынан патриотическай хабааннаах элбэх үлэ барыаҕа. Үөрэнээччилэр Аҕа дойду Улуу сэриитигэр сылдьыбыт, тыылга үлэлээбит эбээлэрин, эһээлэрин туһунан ахтыылары хомуйуохтара, уулуссалар ким аатын сүгэллэрин үөрэтиэхтэрэ, – диэн сэһэргээтэ Анастасия Анатольевна Аммосова, дириэктэри иитэр үлэҕэ солбуйааччы, бу дьүһүйүүнү сүрүннээччи.
“Ленинграды төгүрүктээһин ыар кэмнэрэ…” тэрээһини «Тойон Мүрү» култуура дыбарыаһыгар С.С. Васильев-Борогонскай аатынан киин бибилэтиэкэ, үөрэх улуустааҕы салалтата, Сэһэн Ардьакыап аатынан түмэл тэрийэн ыыттылар, блокада туһунан баай ис хоһоонноох быыстапканы бэлэмнээбиттэр.
Тулуна оскуолатын үөрэнээччилэрэ байыаннай лүөччүк Николай Сыромятников, Өнөр оҕолоро Дьоруой куорат – Ленинград – 872 хонуктаах төгүрүктээһинин ыар сылларын туһунан хоһооннору аахтылар. Кинилэр бу сайдыылаах олоххо этэҥҥэ олорорбут туһугар өлөртөн да куттаммакка сэриилэспит хорсун-хоодуот буойун көлүөнэҕэ махтана санаатылар…
Ким да умнуллубат, туох да умнуллубат.
