11 месяцев назад 303
“Библионочь-2023” сэргэхтик ааста
Бүгүн, ол эбэтэр ыам ыйын 27 күнүгэр, Бүтүн Арассыыйа үрдүнэн Библиотека күнэ бэлиэтэнэр.
Бу күнү көрсө, Арассыыйа үрдүнэн сылын аайы ыытыллар “Библионочь 2023” акцияҕа кыттыһан, эколог-суруйааччы И.М. Сосин төрөөбүтэ 95 сылыгар аналлаах сэргэх тэрээһини Балыктаахха олохтоох библиотека үлэһитэ Трифонова Сардана Семеновна ыытта.
Иннокентий Сосин айымньыларынан “Айылҕалыын алтыһан” виктэриинэҕэ кэлбит ыалдьыттар актыыбынайдык кытыннылар.
Библиотека көхтөөх ааҕааччыларыгар номинациялары туттартаата.
Оҕолорго “Бастыҥ ааҕааччы” – Местникова Муся, Говорова Намыына, улахан дьоҥҥо – Захарова Мария Алексеевна, Семенова Мария Семеновна.
“Сыл ааҕааччыта” – Андросова Татьяна Михайловна, Андросов Дмитрий Иннокентьевич, Борисова Альбина Николаевна, Екатерина Иннокентьевна уонна Семен Николаевич Ноговицыннар.
“Онлайн-биктэриинэҕэ саамай көхтөөх” – Наталья Матвеевна уонна Александр Васильевич Габышевтар.
Ааҕааччы Мария Семенова Библиотека күнүнэн истиҥник эҕэрдэлээн туран, библиотекарьга кинигэ бэлэх уунна.
Салгыы билиҥҥи кэм экологтара – “Гринвей” хампаанньа үлэһитэ, Төҥүлүттэн сылдьар Захарова Ирина Васильевна уонна “Мейтан” хампаанньа бородууксуйатын Цыденжапова Татьяна Сергеевна – кэпсээтилэр, атыылаатылар.
Төрүт сахалыы астарбытыгар маастар-кылаас буолла. Быырпаҕы Рожина Надежда Федоровна
уонна саламааты Иванова Татьяна Егоровна астаан көрдөрдүлэр.
Аны “Сөптөөхтүк аһааһын кистэлэҥнэрэ” (правильное питание – ПП) диэн элбэх сүбэлээх интэриэһинэй иһитиннэриини Ноговицына Любовь Николаевна уонна Макарова Мария Ивановна оҥордулар.
“Бириэмэни аттарыныы” (тайм-менеджмент) диэн туһалаах сүбэни Стручкова Татьяна Артуровна биэрдэ.
“Тиэргэним бэлэхтэрэ” диэн бэйэтин тэлгэһэтигэр иитэр араас кыылларын-көтөрдөрүн туһунан кэпсээтэ Габышева Яна Ильинична,
“Чэгиэн турук төрдө – хамсаныы” диэн зумба-үҥкүү хамсаныыларынан Долгунова Лилия Васильевна дьарык ыытан сэргэхситтэ.
Ити курдук бэрт сэргэх тэрээһиҥҥэ кыттан, сонун арааһын иһиттибит, сүбэ-ама ыллыбыт. Эдэр ийэлэрбит олоххо көхтөөхтөрүн, доруобуйаларын көрүнэллэрин истэн сэргээтибит.
Мария Захарова,
Балыктаах, Мэҥэ Хаҥалас.
