1 год назад 307
Ытык Ийэҕэ сүгүрүйэн
Муус устар 12 күнүгэр СӨ бастакы Президенэ Михаил Ефимович Николаев, Космонавтика күнүн бэлиэтиир тэрээһиннэр чэрчилэринэн, Сэбиэскэй Сойуус Геройун, аан дойду барыта сүгүрүйэр чулуу киһитин төрөппүт, ииппит ытык ийэ Анна Тимофеевна Гагарина пааматынньыгар Саха Сирин олохтоохторун аатыттан тыыннаах сибэкки дьөрбөтүн уурдарда.
Бу бэлиэ түгэҥҥэ Юрий Гагарин сиэн балтылара – Ю.А. Гагарин аатынан мемориальнай заповедник түмэлин үлэһиттэрэ Тамара Дмитриевна Филатова уонна Наталья Борисовна Гагарина – кыттыыны ыллылар.
Санаттахха, бастакы космонавт ийэтигэр аналлаах мэҥэ өйдөбүнньүгү туруоруу идиэйэтин көҕүлээбит киһинэн Михаил Ефимович буолар. Ону олоххо киллэрээччитэ – скульптор Эдуард Пахомов.
Сахалар бэлэхтээбит үйэлээх оҥоһуктарын Гагарин куорат олохтоохторо үчүгэйдик көрөллөр-харайаллар, сылын аайы Космонавтика күнүгэр сибэкки уураллар. Сүгүрүйүү миитинин кэнниттэн Юрий Гагарин музейын иһинэн үлэлиир оҕо кулуубун кыттыылаахтарыгар “Гагарин оонньуулара” диэн эстафета тэриллэр.
Манна даҕатан эттэххэ, “Николаев-киин” архыып-бибилэтиэкэҕэ “На плечах гигантов” диэн бырайыак үлэтин саҕалаата. Бастакы тэрээһин Космонавтика күнүгэр ананна. Бу күн оҕолор Юрий Гагарин сиэн балтыта Тамара Филатовалыын кэпсэттилэр.
Итини сэргэ Юрий Гагарин аатынан мемориальнай заповедник-түмэл уонна Николаев-киин кыттыһан виртуальнай быыстапканы тэрийдилэр. Манна Гагариҥҥа уонна космонавтикаҕа сыһыаннаах архыып докумуоннарын, хаартыскалары, видеолары, лиэксийэлэри, уруоктары көрүөххүтүн, биктэриинэлэргэ оонньууоххтун сөп. Сигэтэ бу: https://nikolaevcentre.ru/virtual/49/index.html?utm_source=whatsapp&utm_medium=messenger&utm_campaign=pt-458&utm_eid=164
Николаей-киин
