2 года назад 409
Саахымат дойдутугар
Кулун тутар 20 күнүгэр Балыктаах бөһүөлэгэр “Звёздочка” оҕо уһуйааныгар “В мире шахмат”диэн улуустааҕы сэминээр ыытылынна.
Сэминээри уһуйаан сэбиэдиссэйэ Антонина Сергеевна Кычкина киирии тылынан аста.
Улуус дьыссааттарыттан, Балыктаах орто оскуолатын алын кылаастарын учууталлара, дириэктэр Айталина Михайловна Мохначевская кыттыыны ыллылар.
Иитээччилэр уонна музыкальнай салайааччы Елена Ивановна Стручкова “Добро пожаловать в страну Шахмат” диэн инсценировканы оҕолору кытта көрдөрдүлэр.
Орто бөлөххө “Саахыматы кытта билсии” диэн дьарыгы Христина Афанасьевна Цыпандина ыытта. Саахымат фигураларын оонньуу, таабырын,хартыына нөҥүө хатылаатылар. Саахымат дуоската хас өҥтөн турарын быһаардылар уонна бу дьарыкка фигуралар ханан туралларын быһаарда.
Саргылаана Прокопьевна Чиркова уһуйаан уопсай хайысхатын, үөрэтэр сүрүн өрүттэрин кэпсээтэ. “Одаренный ребёнок” программаҕа сөп түбэһиннэрэн, саахыматы оҕоҕо кыра сааһыттан кыра кыралаан билиһиннэрии үлэтэ барарын эттэ.
Иитээччилэр И.П.Сухин программатын үөрэтэн, олоххо киллэрэ сылдьалларын сырдатта. Саахыматы үөрэтии, ньымаларын көрдөрүү араас хайысханан арааран ыытылынна.
Елена Ивановна Стручкова физкультура хайысхатынан улахан уонна бэлэмнэнии бөлөх оҕолоругар, икки хамаандаҕа арааран, “Шахматная эстафета” култалаһыыга күрэхтэһиннэрдэ.
Саргылаана Васильевна Стручкова “Саахымат оонньуутун нөҥүө оҕо тылын-өһүн сайыннарыы ньымалара” диэн маастар-кылааһыгар бэйэтин уопутуттан дьарыкка туттар босуобуйаларын, оонньууларын көрдөрдө.
Алёна Илларионовна Протодьяконова саахымакка аналлаах дидактическай оонньуулары оонньотто уонна төрөппүтү кытта үлэни сырдатта.
Надежда Васильевна Стручкова мониторинг хайдах ыыппытын уонна туох түмүктээҕин кэпсээтэ.
Христина Афанасьевна Цыпандина кэлбит ыалдьыттарга уопсай биктэриинэ ыытта.
Түмүккэ санаа атастаһыыта буолла. Элбэҕи билэн-көрөн, истэн, бэйэлэригэр туһалааҕы ылбыттарын кэлбит ыалдьыттар бэлиэтээн туран махтаннылар. Сэминээр үрдүк таһымҥа ааспытын, өссө да маннык тэрээһин ыытылларыгар баҕа санааларын эттилэр.
“Звёздочка” уһуйаан барыта 17 үлэһиттээх, олортон сэттэтэ педагог идэлээхтэр. Бу кэлэктииби РСФСР үөрэҕириитин туйгуна, РФ үөрэхтээһинин Бочуоттаах үлэһитэ Антонина Сергеевна Кычкина салайан үлэлии сылдьар.
Сырдатта Мария Захарова,
Балыктаах, Мэҥэ Хаҥалас
