1 месяц назад 68
Киэҥ эйгэҕэ сахалыы саҥарыы сатабыла
Олунньу 27 күнүгэр Дьокуускай куорат В.П. Ларионов аатынан Физико-техническэй лиссиэй 10 «а» кылааһын кэллэктиибэ Арассыыйа норуоттарын сомоҕолоһууларын сылыгар аналлаах «Киэҥ эйгэҕэ сахалыы саҥарыы сатабыла» диэн тыл этиигэ өрөспүүбүлүкэтээҕи курэх тэрийэн ыытта. Кылаас салайааччыта: Мария Юрьевна Саввина.
Дььүүллүр сүбэ бэрэссэдээтэлэ, СӨ Национальнай бибилэтикэтин ааҕыыны үөрэтэр институтун научнай үлэһитэ, тыл билимин хандьыдаата уонна «Киэҥ эйгэҕэ сахалыы саҥарыы сатабыла» кинигэ (2021 с. тахсыбыта) ааптара Ангелина Кузьмина санаатын маннык эттэ: «Кинигэ суруллан баран быыл буолан сыппакка олоххо номнуо киирэн, оҕолорго төрөөбүт тылы үөрэтэллэригэр туһалыы сылдьарыттан үөрэбин. Бу оонньуу аман өс уонна дебат икки ардынан халыыптаах, ураты көрүҥнээх. Балаһыанньатын оҥорорбор саха тылын учууталларын кытта кэпсэтэн, үөрэтэн маннык көрүҥнээх тыл оонньуута араатардыыр дьоҕуру сайыннарарга киирэ илигин өйдөөбүтүм. Оҕолор бэйэлэрэ эппиттэрин курдук киһи эрдэттэн бэлэмнэммэккэ тута ылан санаатын сааһылаан дириҥник хорутан этэрэ ордук уустук. Онон санааны сайа этэргэ кинигэни элбэхтик ааҕар тирэх буоларын өйдөөтүлэр. Мин оҕолор бу сыл аайы ыытар күрэспитигэр хайдах кытталларын, туохха сыыһалларын, тугу таба туттан бэрт кыайыылаахтык чаҕылхайдык этэллэрин анааран научнай ыстатйыа бэлэмниибин. Бу уопуту Саха сирин үрдүнэн тарҕатар бэрт туһалаах буолуоҕар эрэнэбин».
Саха тылын түһүлгэтигэр биэс оскуолаттан сахалыы куттаах оҕолор төрөөбүт тылбыт күндүтүн, сүмэтин иҥэриннилэр, сахалыы сайаҕастык санааларын эттилэр: Н.С. Охлопков аатынан Нам улууһун гимназията, Республиканскай лиссиэй-интернат, 17-с оскуола, А.Г., Н.К. Чиряевтар ааттарынан Дьокуускай куорат Саха национальнай гимназията, В.П. Ларионов аатынан Физико-техническэй лиссиэй.
🔸Тэрээһин саха үгэһин быһыытынан алгыстан саҕаланна. Алгыһы Ульяна Васильевна Захарова ыытта. Күрэх кыттааччыларын, ыалдьыттарын дьиэрэйэр хомус тыаһынан 7 «а» кылаас кэллэктиибэ айхаллаата. Кылаас салайааччыта Е.В. Антонова. Лиссиэй директора Александра Максимовна Соловьева түһүлгэҕэ мустубут дьону үөрүүлээх тэрээһин саҕаламмытынан уруйдаата, кыттааччыларга ситиһиини баҕарда.
🔸Күрэх икки түһүмэҕинэн ыытылынна:
1 түһүмэх:
«Сомоҕолоһуу диэн норуоттар бэйэ-бэйэлэрин кытта ситимнээх буолуулара» тиэмэҕэ иһитиннэрии оҥоруу.
2 түһүмэх:
Бэриллибит тиэмэлэртэн тардан ылан тыл этии.
🔸Күрэх түмүгүнэн кыттааччыларга анал ааттар ананнылар, добун сурук, бириис туттарылынна:
🌿 «Өркөн этээччилэр» — 17 оскуола, «Айыы оҕолоро» хамаанда.
🌿 «Хомоҕой тыллаах этээччилэр» — Өрөспүүбүлүкэтээҕи лиссиэй-интэринээт, «Гумнар» хамаанда.
🌿 «Этигэн тыллаах этээччилэр» — В.П. Ларионов аатынан Физико-техническэй лиссиэй, «Дьулуур» хамаанда.
🌿 «Итэҕэтиилээх тыллаах этээччилэр» — Н.С. Охлопков аатынан Нам улууһун гимназията, «Арай» хамаанда.
🌿 «Кэскиллээх этээччилэр» — Дьокуускай куорат Саха национальнай гимназията, «Куорат кыргыттара» хамаанда.
🔸 Тумуккэ кыттааччылар, дьүүллүүр сүбэ бэйэлэрин санааларынан үллэһиннилэр, этии киллэрдилэр, махтал тылларын эттилэр.
🔸 Тэрээһин кытааччыларын сомоҕолуур үөрүүлээх түгэнинэн аныгы тэтимнээх оһуохай үҥкүүтэ буолла. Оһуохайы таһаарда уонна түһүлгэни киэргэттэ Ульяна Васильевна Захарова.
Бары кыттааччыларга, хамаанда салайааччыларыгар, дьүүллүүр сүбэҕэ барҕа махталбытын тириэрдэбит.
🌿Төрөөбүт тылбытын үөрэтиэх,
🌿Этигэн кэрэтин кэрэхсиэх,
🌿Өбүгэ кэриэһин харыстыах,
🌿Сахалыы ыраастык саҥарыах.
Кузьмина А.А.
