1 день назад 396
Баппаҕаайы иитэр-үөрэтэр кыһаларын үбүлүөйэ
Ахсынньы 13 күнүгэр Бүлүү улууһун Илбэҥэтигэр үѳрэммит-үлэлээбит, кынат үүннэрбит кыһабыт, ССРС норуодунай учуутала М.А. Алексеев аатынан Баппаҕаайы орто оскуолата тэриллибитэ 95, оскуола иннинээҕи саастаах оҕо биэбэйигэ 65 сылларын үѳрүүлээхтик бэлиэтээтибит.
Бу дьоро күн үөрэнээччилэр, үлэhиттэр, ситиhиилээхтик үлэлиир куруhуоктар оҥоһуктарын быыстапкатын, итиэннэ музейы кѳрүүттэн саҕаланна.
Хаартысканан оҥоһуллубут фотозонаҕа араас сыллардааҕы выпускниктар бэйэлэрин булан көрөн үөрдүлэр, дьон интэриэhин бу сонун көстүү тарта.
Биир сүрүн тэрээhининэн «Оскуола историята» стендэни арыйыы буолла.
Сылларынан түѳрт кэрдиис кэмҥэ арааран оҥорбуттар: 1929-1949 сс. – оскуола тѳрүттэниитэ, 1949-1971 сс. – оскуола саҥа сайдар саҕахтара, 1972-1989 сс. – оскуола уонна тыа сирин үлэтин биир ситимэ, 1990-2004 сс. – оскуолаҕа тѳрүт сахалыы тыыны киллэрии.
Оскуолабыт сайдыыта бу стендэҕэ барыта бэлиэтэммит: ханна, хайдах тэриллиэҕиттэн саҕалаан, кимнээх дириэктэрдээбиттэрин, хас оҕо үѳрэммитин, сыыппараларынан чахчылары, профессиональнай куонкурустарга кыттыбыт учууталлары, пионерия, лааҕыр, производственнай үѳрэхтээһин, куруhуоктар тэриллибиттэрин – барытын хабан киллэрбиттэр.
Стендэни таҥан, үгүс сыраларын ууран оҥордулар: физика учуутала Т.В. Федорова, нуучча тылын уонна литературатын учуутала А.С. Винокурова, алын кылаас учуутала А.Н. Шамаева, омук тылын учуутала Х.В. Харлампьева.
Учууталлар оҕолорго үбүлүѳйдээҕи аһаҕас ураты уруоктары ыыттылар.
Тэрээhин иккис үѳрүүлээх чааhыгар Бүлүү улууһун баһылыгын социальнай бэлиитикэҕэ солбуйааччы Александр Анатольевич Прокопьев, үѳрэх улуустааҕы салалтатын кылаабынай исписэлииһэ Вера Иннокентьевна Атласова, Баппаҕаайы нэһилиэгин баһылыга Егор Афанасьевич Николаев, оскуолабыт дириэктэрэ Прокопий Анатольевич Алексеев эҕэрдэлээтилэр, наҕараадалары туттардылар.
Кулуупка мустубут дьон иннигэр, үрдүк сыанаҕа ыҥырыллан, оскуола, дьыссаат үлэhиттэрэ чиэстэннилэр, ѳрѳспүүбүлүкэ, улуус, нэhилиэк, оскуола салалталарыттан араас суолталаах грамоталары, махтал суруктары туттулар.
Υрдүк наҕараадалаах кэллиэгэлэрбитин эҕэрдэлиибит:
«Почетный ветеран системы образования РС(Я)» – Жиркова Ирина Николаевна, алын кылаас учуутала.
«Отличник системы образования РС(Я)» – Федорова Татьяна Васильевна, физика учуутала.
«Учитель учителей РС(Я)» – Винокурова Алина Семеновна, нуучча тылын уонна литературатын учуутала.
«Честь и достоинство Вилюйской школы» мэтээл – Никифорова Ульяна Николаевна, саха тылын уонна литературатын учуутала
«За вклад в развитие Вилюйской школы» бэлиэ – Андреева Дарианна Николаевна, география учуутала, Оленова Светлана Дмитриевна, алын кылаас учуутала.
«За вклад в развитие дополнительного образования РС(Я)» – Кириллина Матрена Егоровна, музыка учуутала.
«За вклад в развитие дошкольного образования РС(Я)» – Новикова Саргылана Юрьевна, иитээччи.
Оскуола дириэктэрэ ыҥырыылаах ыалдьыттарга, бочуоттаах сынньалаҥҥа олорор бэтэрээннэргэ ѳйдѳбүнньүк бэлэхтэри туттарда. Улуус оскуолаларын дириэктэрдэрин аатыттан анаан кэлбит Евелева Юлиана Николаевна (Хампа), Гоголев Андрей Александрович (Дьѳккѳн), Яковлев Иван Андреевич (Лѳкѳчѳѳн) эҕэрдэлээтилэр.
“Сүргэ” оҕо тыйаатыра биhиги нэhилиэкпитигэр үѳрэххэ, билиигэ, сырдыкка талаhыы 1929 сылтан саҕаламмытын кѳрдѳрѳр “Баппаҕаайы оскуолатын кэрдиис кэмнэрэ” диэн музыкальнай дьүһүйүүнү оонньоон кѳрдѳрдө. Салайааччылара – эбии үѳрэхтээһин педагога Степанова Марина Марковна.
Бырааhынньыкпыт оскуола, оҕо саадын кэлэктииптэрин эҕэрдэ кэнсиэринэн түмүктэннэ.
Билиигэ-кѳрүүгэ, сайдарга сирдиир, кэскилгэ угуйар кыһабытыгар махтанабыт! Мантан саҕаланар оҕо саас умнуллубат түгэннэрэ, эдэр саас кэрэ кэрчиктэрэ. Ырааhынан, сырдыгынан сыдьаайа турдун, тапталлаах оскуолабыт!
Людмила Тарасова,
М.А.Алексеев аатынан Баппаҕаайы оскуолатын учуутала
Илбэҥэ, Бүлүү
