4 часа назад 199
Нэһилиэк түмсүүлэрэ дьүлэйдэр курдук тэрийиэхтэрин сөп
Муус устар 7 күнүгэр Таатта улууһун Дьүлэй нэһилиэгин Дьокуускай куораттааҕы түмсүүтүн отчуоттуур-быыбардыыр мунньаҕа үрдүк таһымҥа буолан ааста.
-Тэрээһиммит сүрүн сыала – түмсүү саҥа састааба талыллан үлэлииригэр дьоммутун-сэргэбитин түмүү уонна саҥа састаап таһаарыылаахтык үлэлииригэр усулуобуйа үөскээһинин тэрийии этэ. Ол сыалбытын сүүс бырыһыан толордубут.
Дьоммут-сэргэбит ийэ ууларыттан хамсаан, тоҕо анньан кэлбиттэриттэн наһаа үөрдүбүт. Ол курдук, түөрт сүүсчэкэ киһилээх кыракый нэһилиэк Дьокуускай куоракка ыытар тэрээһинигэр сүүстэн тахса киһи кэллэ. “Сэргэлээх” остолобуой үлэһиттэрэ сүрдээҕин сөхтүлэр.
Дойдубут минньигэс аһыгар тиийэ тэрийэн аҕалбыт баһылыкпыт Олег Дмитриевич Осиповка, баһылык солбуйааччыта Любовь Васильевна Ефимоваҕа, нэһилиэк уопсастыбанннай түмсүүлэрин салайааччылара Айталина Меркурьевна Туласыноваҕа, Наталья Романовна Захароваҕа, оскуола, кулууп, КСК үлэһиттэригэр сүһүөхтээх бэйэбит сүгүрүйэн туран махтанабыт.
Эдэриттэн кырдьаҕаһыгар тиийэ түмсүбүт биир дойдулаахтарбыт көрсүһүүлэрэ аһара истиҥник-иһирэхтик барда.
Бу тэрээһин нэһилиэк түмсүүтүн мунньаҕын ыытыыга уонна дьону түмүүгэ сонун эбэтэр саҥа көрүҥ буолар диэтэхпитинэ, арааһа, улаханнык сыыспаппыт буолуо. Өрөспүүбүлүкэ бары улуустарын түмсүүлэрин салайааччыларыгар сүбэ-ама курдук этиэхпит: “Нэһилиэктэргит түмсүүлэрин мунньахтарын дьүлэйдэр курдук тэрийэн ыытыҥ”, – диэн, – санаатын үллэһиннэ Дьокуускай куоракка Дьүлэй түмсүүтүн салайбыт Иван Гаврильевич Неустроев.
Кини кэргэнинээн Саргылана Ивановналыын түмсүүнү 18 сыл устата кыһамньылаахтык салайан кэллилэр. Үлэлээбит сылларын отчуотун оҥорон баран, Иван Гаврильевич нэһилиэк түмсүүтүн салгыы мантан ыла Дмитрий Константинович Осипов салайарын иһитиннэрдэ. Боломуочуйаны туттарыы сиэрэ истиҥ-иһирэх быһыыга барда.
-Дьүлэйдэр бу чуораан тыаһын истиҥ. Бу чуорааны Дмитрий Константинович тыаһаттар эрэ, түмсүү мунньаҕар бары сүүрүүнэн кэлиэхтээххит. Биһиги, Неустроевтар дьиэ кэргэн, саҥа талыллыбыт актыыпка син биир баарбыт, Дьүлэйбит туһугар салгыы үлэлииргэ бэлэммит”, – диэтэ Саргылана Неустроева саҥа салайааччыга чуораан туттарарыгар.
Дмитрий Осипов култуура эйгэтигэр биллэр-көстөр үлэлээх. Кини өбүгэтин тыынын илдьэ сылдьар буолан, сүбэтэ-соргута, көмөтө-өйөбүлэ элбэх буолуоҕа.
Биир дойдулаахтарыгар Дьүлэй нэһилиэгин баһылыга Олег Дмитриевич Осипов, оскуола дириэктэрэ Оксана Николаевна Гуляева ааспыт сылга туох үлэ барбытын отчуоттаан сырдаттылар.
Тэрээһиҥҥэ Туора Күөл талба талааннааҕа, СӨ норуотун маастара Изабелла Элякова өбүгэлэрбит кэтэ сылдьыбыт былыргы үйэтинээҕи саха таҥаһын кэллиэксийэтин көрдөрдүлэр.
Любовь Ефимова лотерея курдук оонньууну ыыппытын сэҥээрдилэр, бириис ылан үөрдүлэр-көттүлэр.
Ыраах сир диэбэккэ, дьүлэйдэр биир дойдулаахтарыгар ырыа кэһиилээх кэлбиттэр. Кинилэри “Тоҕус тойон” ансаамбыл салайааччыта Геннадий Кононович Васильев бэлэмнээн илдьэ кэлбит.
Дьокуускай куораттааҕы “Таатта” түмсүү бэрэссэдээтэлин солбуйааччы Лариса Аввакумова тыл этэригэр, Дьүлэй түмсүү биир үчүгэй үлэлээҕин, түмсүүлээҕин, күүстээх санаалаах, үлэһит бэрдэ салайааччылааҕын бэлиэтээн туран, кэргэннии Неустроевтарга уонна актыбыыс Анастасия Теплоуховаҕа түмсүү Махтал суруктарын, өйдөбүнньүк бэлэхтэрин туттарда.
Дьүлэй түмсүүтүн актыбыыстарыгар нэһилиэк баһылыга Олег Осипов эмиэ Махтал суруктары, өйдөбүнньүк бэлэхтэри, оттон киниэхэ Туора Күөлтэн тардыылаах урбаанньыт, “Arctic Colour” тэрилтэ салайааччыта Андрей Неустроев дьаһалтатыгар анаан бэйэтин бэлэҕин туттарда.
Сомоҕолоһууну, өйдөһүүнү, хардарыта көмөлөсүһүүнү өрө тутан, Дьүлэй түмсүүтэ бэртээхэй тэрээһини тэрийдэ. Толору астаах сандалыга 100-тэн тахса киһи олорон, үтэһэлээх эти, убаһа хаанын, иһин, онтон да атын сахалыы аһы амсайан, киэһэ хойукка диэри инникин былааннары, үлэлэрин кэпсэттилэр.
Уопсайынан, дьүлэйдэр ураты таллааннаах дьон: Арассыыйа Геройа Родимир Максимов, Таатта талаҕын аатырдыбыт Эрнст Алексеев, норуот маастара Маайа Петрова, нуучча географическай уопсастыбатын кытта үлэлэһэр, итиэннэ Өймөкөөн сылгыһыт уолугар Дугуйдааҥҥа ат толору симэҕин тигэн бэлэхтээбит, өбүгэ хара ииһин бастакынан таһаарбыт норуот маастара Изабелла Элякова, учуутал идэлээх эрээри, Тыа хаһаайыстыбатын түмэлин өрөспүүбүлүкэҕэ соҕотох тэрийбит Егор Сыромятников, удьуор ырыһыат Кузьминнар уо. д. а.
Тааттаҕа саамай уһуннук баһылыктаабыт Олег Дмитриевич бу сыллар тухары түстээбит түмсүүлээх эйгэтэ ыраах-чугас олорор биир дойдулаахтарын нэһилиэктэрин тула түмэ турдун, биир сомоҕо буолан, Туора Күөл сайдар кэскилэ кэҥээн истин!
Лариса Аввакумова, “Таатта” түмсүү бэрэссэдээтэлин солбуйааччы.
