1 месяц назад 565
Түүр төрүттээхтэр түмсэммит
Ардахтаах тымныы күн буоллар да, Дьокуускай олохтоохторо биир силистээх түүр омукпут сыдьааннарын – татаардары – көрөөрү-истээри, үгэстэрин, култуураларын кытта билсээри, Хомсомуол болуоссатыгар тоҕуоруһа муһуннубут.
Бу федеральнай Сабантуй 2001 сылтан Арассыыйа эрэгийиэннэринэн ыытыллар. Быйыл Саха Сиригэр буолла.
Бэс ыйын 11 күнүттэн араас тэрээһиннэр саҕаламмыттара: татаар киинэтэ, испэктээгэ, кэнсиэрэ, быыстапката, сурунаалын биһирэмэ, о.д.а..
Сабантуй диэн ыһыы үлэтэ бүппүтүн, сааскы түбүк үмүрүйбүтүн үөрүүтүгэр тэриллэр бырааһынньык. Ол иһин айыыларга сүгүрүйэр, аар айылҕаҕа махтанар, алгыһынан арчыланар ыһыахтаах сахалар уратытык көрдүбүт. Биһиэнэ ханна эрэ үөһэнэн, куйаарынан эҥсэр эбит буоллаҕына, кинилэр киэнэ сирдээҕи… Ол да буоллар, иккиэммит сүрүнэ биир – уйгулаах-быйаҥнаах, дьоллоох-соргулаах олоххо талаһыы.
Биир түүр төрдүлээх-төрүттээх буоламмыт, ханыылаһар, майгыннаһар өрүппүт үгүһүн икки эрэгийиэн баһылыктара – Саха Өрөспүүбүлүкэтин Ил Дархана Айсен Николаев уонна Татарстан Раиса Рустам Минниханов – тыл этэллэригэр иккиэн бигэргэттилэр.
Саха Сиригэр татаардар инньэ XVIII үйэттэн саҕалаан олохсуйан барбыттара. Билигин кинилэри сомоҕолуур “Туган як” диэн общиналаахтар.
Бэрэссэдээтэллэрэ Игорь Халилов бу үөрүүлээх түгэҥҥэ СӨ үтүөлээх тутааччытын аатын ылла.
Хомсомуол болуоссатыгар Мииринэй, Өлүөхүмэ, Нерюнгри татаардарын быыстапкалара тэрилиннэ.
Сабантуй үөрүүлээх аһыллыытыгар саха уонна татаар артыыстара кыттыылаах музыкальнай-цирковой дьүһүйүүнү көрдөрдүлэр.
Кэлбит ыалдьыттары татаардар босхо аһынан күндүлээтилэр: улахан сылабаартан итии чэй куттулар, оһохтон сылаас алаадьыны амсаттылар, сарсыарда сүүрэ сылдьыбыт бараан этиттэн шурпа буһаран иһэртилэр.
Саамай тыҥааһыннаах түгэнинэн төрүт көрүҥнэргэ күрэс буолла.
Курдаах корешка татаар бөҕөһө Радик Салахов бастаан, Р.Н. Минниханов туруорбут “Лада Гранта” массыынатын, оттон мас тардыһыытыгар саха мадьыныта Дьулустаан Ноговицын кыайан, «Рысь-3 Пикап» вездеходу ылар чиэскэ тигистилэр.
Кэлэр сылга Сабантуй Омскай уобаласка буолар. Ол бэлиэтин тутарыгар Иван Колесник, бырабыыталыстыбаларын бэрэссэдээтэлин солбуйааччы: “Сахалар үрдүк таһымҥа тэрийдигит. Биһиэхэ улахан эппиэтинэс сүктэрилиннэ: эмиэ эһиги курдук ыытарга кыһаллыахпыт”, – диэн сыанабылын, хайҕалын эттэ уонна XXVI Сабантуйга ыҥырда.
Михаил Эверстов-Соргу түһэриилэрэ.
Анисия Иевлева сырдатыыта.
