1 месяц назад 297
Айар дьоҥҥо тургутуу кэмэ
Бүгүн ыам ыйын 21 күнүгэр Саха Сирин үрдүнэн ырыа алыптаах дорҕооно дуораһыйар, дьикти дьүрүскэнэ дьиэрэһийэр, иэйиилээх матыыптара кутуллар түһүлгэлэрэ түстэнэллэр.
Ырыа күнэ официальнайдык 2022 сылтан бэлиэтэнэр. Ил Дархан ыйааҕа тахсыаҕыттан ыла. Ол иннинэ норуот күүһүнэн ыытыллан кэлбитэ. Маныаха 2013 сыллаахха туһугар туспа рекорд олохтоммутун ахтар оруннаах: 3000 киһи “Өрөгөй” спорт уораҕайыгар мустан ыллаабыта. Бу сомоҕолоһуу Ырыа күнэ судаарыстыба таһымыгар бигэргэнэригэр төһүү күүс буолбута чуолкай.
Ырыа күнүн 12 сыл устата туруулаһан туран туруорсубут киһинэн биллиилээх мелодист, самодеятельнай композитор, СӨ норуодунай артыыһа, Кэбээйи улууһун Бочуоттаах гражданина, СӨ култууратын үтүөлээх үлэһитэ, СӨ култууратын туйгуна, “Дьүһүй” ырыа кулуубун төрүттээччи, үгүс ансаамбылы салайбыт, хомуурунньуктары, ырыанньыктары хомуйан таһаартарбыт, элбэх баяниһы уһуйбут, сүүһүнэн ырыаны айбыт, хас да гимн, ол иһигэр Дьокуускай куорат өрөгөйүн ырыатын ааптара, кэлиҥҥи кэмҥэ анал байыаннай дьайыыга анаммыт патриотическай ырыалары суруйар Алексей Калининскай-Луҥха буолар.
Кини идиэйэтин бастакынан суруналыыс Милан Афанасьев, бөлүһүөк учуонай Ксенофонт Уткин-Нүһүлгэн, уопсастыбанньык, бэлиитик Анатолий Гольдман, бэйиэт Христофор Горохов-Элгэстэй, билим доктора, бэрэпиэссэр Ульяна Винокурова, итиэннэ Афанасий Иванов-Тоҕой өйөөбүттэр.
Дьэ, ол кэнниттэн бу хамсааһын суолтатын өйдөөн, Ил Түмэн дьокутааттара, култуура министиэристибэтэ, улуустааҕы салаалара, тэрилтэлэрэ, үлэһиттэрэ, ансаамбыллар, тыйаатырдар, айар сойуустар, Айыы кыһата, ырыаһыттар, мусукааннар, суруналыыстар кыттыһан, көдьүүстээх үлэ ыытыллан барбыта. Кинилэргэ Алексей Калининскай ааттарын ааттаан туран махтаммыта манна баар: https://www.sakhaparliament.ru/obshchestvo/11466-t-b-k-t-m-ge#.YpguY-376Hg.whatsapp
Билигин аан дойдуга оҥоһуу өй баһылаан-көһүлээн эрэр. Нано-сөкүүндэнэн начаас айар-тутар искусственнай интеллекпит ханнык баҕарар тылынан, хайдах баҕарар муусуканы чыпчылыйыах бэтэрээ өттүгэр суруйан кэбиһэр. Биллэн турар, онно кини бэлэм айымньылары туһанар, олортон таҥан таһаарар.
Ол түмүгэр аҥаардас ааспыт 2024 сыллаахха Арассыыйа ырыа айааччыларыгар оҥоһуу өй 8,5 млрд солк. хоромньуну оҥорбут.
Дьэ, онон Ырыа күнэ саамай тоҕоостоох кэмҥэ баар буолла: ИИ үйэтигэр саха дьүрүлдьүттэрин ааптарыскай бырааптарын араҥаччылыырга, айар кыахтарын туох да харгыһа суох толору арыйалларыгар табыгастаах усулуобуйаны тэрийэргэ, оҥоһуу өйү кытта күрэстэһэр кэмҥэ мелодистар, композитордар, музыканнар, ырыаһыттар, артыыстар бары бииргэ түмсэллэригэр, сыыппара эйгэтигэр көһөр быыһык бириэмэҕэ сүүйтэриитэ суох сөпкө сайдар суолу тобуларга, ырыа саха тылын ыччакка тарҕатыыга бастыҥ ньыма буоларынан күүскэ өйөнүллэригэр утумнаах үлэ барыахтаах.
Уопсайынан, айар үлэлээх дьоҥҥо билигин тургутуулаах түһүмэх саҕаланна: чахчы талааннаахтары эрэ ИИ сиидэлээн хаалларыаҕа. Ону сэргэ муусукаҕа идэтийбэтэх эрээри, ИИ көмөтүнэн бэркэ айарга үөрэммит дьон үөскээн-үүнэн тахсыаҕа.
“Ол эрээри киһи айбыта дууһалаах, онон ИИ киэниттэн уратылаах, ол иһин өрүү сыаналаныаҕа ”, – диэн уоскутунабыт даҕаны, барыта наһаа түргэнник уларыйа турар. Онон сэрэхтээх, бэлэмнээх уонна көмүскэллээх буолар ордук.
