5 месяцев назад 460
Видеопоэзия куонкуруһун кыттыылаахтара – “Сосновый бор” лааҕырга
Национальнай бибилэтиэкэ уонна “Саха Сирин култуурата” айар холбоһук ҺӨҔҮҤ хамсааһынын чэрчитинэн ыччаты сахалыы ааҕарга көҕүлүүр буктрейлер уонна видеопоэзия күрэхтэригэр холбоон 800-тэн тахса киһи кыттыбыта.
Ол түмүгэр электроннай бибилэтиэкэбит пуондата 153 видео-матырыйаалынан хаҥаабыта. Ону бу сигэлэринэн киирэн көрүөххүтүн, уруокка туһаныаххытын сөп: https://new.nlrs.ru/collections/3636 (буктрейлердар), https://new.nlrs.ru/collections/4354 (видеопоэзиялар).
Кэрэхсэбиллээҕэ диэн, бу роликтар – үйэлээхтэр: хаһан да суолталара сүппэт, тиэмэлэрэ ааспат. Бэйэлэрэ тэттик киинэ курдуктар.
Ол иһин буктрейлерга да, видеопоэзияҕа да оҥоһуллубут тематическай кэллиэксийэлэрбитин уонунан тыһыынча киһи сэҥээрэ көрбүт. Оттон Айыллаана Иванова Суорун Омоллоон “Күкүр Уус” драматыгар буктрейлера уонна Лилия Гоголева Эллэй “Үөрэх ыҥырыыта” хоһоонугар видеопоэзията саамай ааҕыллыбыт докумуоннар кэккэлэригэр киирбиттэрэ.
Өссө биир үөрэрбит – буктрейлер уонна видеопоэзия куонкурустара, көрөөччү биһирэбилин талар куоластааһыннаах буолан, бибилэтиэкэбитигэр тыһыынчанан саҥа ааҕааччылары бэлэхтээтилэр.
Ити курдук икки өттүттэн – кыттааччыга да, тэрийээччигэ да – эргиччи туһалаах бырайыак бириистэрин ол иһин дьоһун гынарга кыһаллабыт. Холобура, буктрейлер күрэҕэр улахан дьоҥҥо бастаабыт Борис Габышев-Варламов (Ньурба) ноутбук (спонсор – “Саханефтегазсбыт” генеральнай дириэктэрэ Виктор Лебедев), оҕолорго Аня Кириллина (Саха гимназията) уруһуйдуур планшет (“Ил Түмэн” издательскай дьиэ туруорбута), дьиэ кэргэттэргэ Максимовтар (Одьулуун, Чурапчы) бэчээттиир МФУ тэрил (“СУ-77” ХЭТ дириэктэрэ Петр Бурнашев бэлэҕэ) туппуттара. Сиһилии манна ааҕыаххытын сөп: https://blogi.nlrs.ru/93902/112264 уонна https://blogi.nlrs.ru/93902/119749
Ону сэргэ 50 оҕо 2024 сыл олунньутугар “Сосновый бор” лааҕырга сынньанар чиэскэ тиксибитэ.
Оттон билигин от ыйын 17 күнүттэн атырдьах ыйын 6 күнүгэр диэри “Сосновый бор” лааҕырга аны видеопоэзияҕа миэстэлэспит 14 оҕобут сынньана сылдьар.
Никита Соловьев, Намыы, Булуҥ улууһа:
– Оскуолабыт иһинэн “Твин Пикс” диэн телестудия үлэлиир. Сандаара Игоревна Тобонова салайар. Кини тэрийиитинэн, бастаан буктрейлерга күрэхтэспиппит. Далан “Дьикти саас” сэһэнигэр ролик этэ. Онтон былырыын Альберт Бүлүүйүскэй “Мин бүгүн эдэрбин” сонеттар дьөрбөлөрүгэр дьүһүйүү устубуппут.
Ол видеопоэзиябыт айар бөлөхтөргө бастаан, Бороҕон оскуолатыгар 2 путевканы биэрбиттэрэ. Онон мин уонна Дима Стручков кэллибит. Хотулар айаммыт ороскуота улахан – 50-ча тыһыынчаны бараатым. Ол иһин төрөппүттэрбит устунан Дьокуускайга үөрэнэ хааларга сүбэлииллэр. Дималыын иккиэн тохсуһу бүтэрдибит. Мин докумуоммун тыа хаһаайыстыбатын техникумугар биэрбитим, землеустроитель идэтигэр. Киирбэтэхпинэ, университет СУНЦ диэн оскуолатыгар туттарсан көрүөм. Этэҥҥэ буоллаҕына, быйыл устудьуон буолуом. Оччотугар бу лааҕырга сылдьыым – оҕо сааһым умнуллубат кэрэ кэмэ буолан хаалыа.
Владилена Третьякова, Налимскай, Орто Халыма:
-Мин эмиэ Никиталаах курдук, хотуттан сөмөлүөтүнэн көтөн кэлбитим. Орто Халыматтан билиэппэр 55 тыһ. солк. төлөөбүтүм. Төһө да ыарахан сыаналааҕын иһин, кэлбитим сүүс төгүл ордук: астына аҕай сылдьабын. Оҕо бөҕөтүн кытта билистим. Күн аайы араас тэрээһин, караоке кытта баар. Доруобуйабытын эмиэ көрөллөр, эмтииллэр. Видеопоэзия күрэҕэр Бүөтүр Байды “Хачыалка” уонна Бүөтүр Тобуруокап “Танюша” хоһооннорун аахпытым. “Астыктык артыыстаан ааҕыы” анал ааты ылан, “Скинтайм” маҕаһыынтан кэриэй кэсмиэтикэтин бэлэх туппутум.
Нарыйаана Родионова, Покровскай куорат:
-Оскуолабыт медиа-киинин бибилэтиэкэрбит Сардаана Алексеевна Кириллина салайар. Кини бу саас бастыҥ педагогическай быраактыка Бүтүн Арассыыйатааҕы күрэҕэр «Читаем в семье, читаем о семье» номинациятын кыайыылааҕа буолбута. Куруһуокпутугар сылдьар Ганя Адамов видеопоэзия күрэҕэр эмиэ кыттыбыта.
Ганя суруйар хоһооннорун биллэр поэттар сэҥээрбиттэрэ, Сайа бэйэтин блогар сырдаппыта. Национальнай бибилэтиэкэ оҕо айар талаанын арыйар куонкурустары ыытарын иһин махтанабыт.
Дамир Андреев, Дьиикимдэ, Ньурба улууһа:
– Учууталбыт Любовь Афанасьевна Сабычикова салалтатынан, Дьиикимдэ үөрэнээччилэрэ видеопоэзия күрэҕэр көхтөөхтүк кыттан, оскуолабыт путевканан наҕараадаламмыта. Мин ити куонкуруска Иннокентий Артамонов “Кэриэстээҥ, бука бары” хоһоонун аахпытым.
Бу “Сосновый бор” лааҕырга кэлэрбин биир сылы быһа күүппүтүм. Эрэммитим курдук, наһаа үчүгэй эбит. Сменабыт “Будущий дипломат” диэн. Дипломат буолуон баҕалаах оҕолор Арассыыйа эрэгийиэннэриттэн кэлбиттэр. Бэйэм адвокат буолуохпун баҕарабын, ол иһин кинилэри кытта кэпсэттим, билистим. Спордунан үлүһүйэбин – волейбол, теннис. Оттон предметтэртэн саха тылын сөбүлүүбүн. ҺӨҔҮҤ курдук, төрөөбүт тылга интэриэһи күүһүрдэр күрэхтэр өссө да ыытылла турдуннар.
Сандал Романов, Өлөчөй, Мэҥэ Хаҥалас:
– Алтан оскуолатыгар үөрэнэбин. Ерема Матчитовтыын Күндэ “Кии сыта” хоһоонугар видеопоэзия устубуппут. Бастакы холонуубут буолан, хайдах саныырбытынан уонна сатыырбытынан оҥорбуппут. Атыттар киэнин көрөн, билигин биллэрдэххитинэ, олох атын таһымҥа устуо этибит.
Биһиги оскуолабыт бу күрэххэ хас да ролигынан кыттан, биһирэбил бириискэ тиксибитэ. Ол путевканы учууталбыт Анна Михайловна Попова миэхэ анаабытыгар махтанабын. “Сосновый бор” наһаа үчүгэй эбит. Хас биирдии күммүт хатыламмат ураты, кэрэхсэбиллээх. Баһаатайдарбыт араас интэриэһинэй тэрээһиннэри ыыталлар.
Егор Левин, Кэбээйи:
-Кэбээйи оскуолата буктрейлер да, видеопоэзия да күрэхтэригэр саамай көхтөөхтүк кыттыбыта. Көҕүлээччинэн саха тылын учуутала Антонина Петровна Терехова буолар. Холобура, бу видеопоэзия күрэҕэр дьиэ кэргэттэргэ Диана Павлова уонна кини эбэтэ Марина Семеновна, эһэтэ Артем Алексеевич Киренскэйдэр кыайбыттара. Оттон Айсен Егоров үрдүкү кылаастарга бастаабыта.
Мин бэйэм үөрэхпэр үчүгэйбин. Улууска 5 предмеккэ олимпиадаҕа кыттааччыбын. Миэстэлэһэбин. Сүүрүүгэ эмиэ үчүгэй көрдөрүүлээхпин. Эһиил оскуоланы бүтэрэн, экэнэмиис идэтигэр туттарсыам. Онон бу үөрэнээччи быһыытынан бүтэһик сайыммар “Сосновый бор” лааҕырга босхо сынньана сылдьарбыттан үөрэбин. Куонкурус тэрийээччилэригэр уонна учууталбар Мария Егоровна Павловаҕа махтанабын.
Айаал Лукин, Сатаҕай, Амма.
-Аммабын эрээри, биһиэхэ өрүс суох, Суола үрэх оҕолоробут. Видеопоэзия күрэҕэр учууталларым Христина Егоровна Скрябина уонна Раиса Романовна Егорова кытыннарбыттара. Ойуунускай “Өрүөл кэриэһин” аахпытым. Аммаҕа буолбут кыргыһыы буолан, сүрэхпэр чугастык ылынар айымньым. Оскуолабыт үөрэнээччилэрин уруһуйдарынан киэргэтэн, роликпытын оҥорбуппут.
Лааҕыр наһаа үчүгэй. Бастакы күнтэн бары доҕордостубут. Өссө куонкуруста ыытаарыҥ, “Сосновый бор” иккистээн кэлиэм этэ.
Ярослав Дмитриев, Майа, Мэҥэ Хаҥалас:
-Былырыын Мусьяна Попова, Георгий Григорьев уонна мин буолан А.С. Пушкин “У лукоморья дуб зеленый” хоһоонун Сэмэн Тумат “Муора хонноҕор күөх дууп маска” диэн тылбаастаабытын аахпыппыт.
Учууталбыт Мидена Гаврильевна Петрова уһуйар. Оскуолабыт политехническай хайысхалаах лиссиэй. Ол эрээри мин гуманитарийбын. Литература уруогун сөбүлүүбүн. Юридическайга туттарсыам, убайым курдук борокуруор буолуом.
Лилия Акимова, Бүлүү куората:
-Мин “Ориентир” медиа-кииҥҥэ дьарыктанабын. Салайааччыбыт Марианна Константиновна Ионова. Кини биһигини айар куонкурустарга кыттарга көҕүлүүр. Видеопоэзия күрэҕэр кылгас олоҕу олорбут талааннаах поэтесса Ирина Колодезникова-Ымыы “Саха балаҕана” хоһоонугар ролик устубуппут.
Быйыл биһиги 1-кы нүөмэрдээх оскуолабыт аатын сүгэр киһитэ Гавриил Иосифович Чиреяв үбүлүөйдээх 100 сыла. Кини өрөспүүбүлүкэ сайдыытыгар сүҥкэн үтүөлээх. Киэн туттабын уонна бэйэм эмиэ дойдубар туһалаах киһи буоларга кыһаллыам.
Лилиана Гоголева, Тиит Арыы, Хаҥалас:
-Мин Эллэй “Үөрэх ыҥырыыта” видеопоэзиям куонкуруска бастаабыта.
“Айылгы” медиа-кииҥҥэ дьарыктанабын, салайааччыбыт Любовь Алексеевна Гоголева.
Биһиги оскуолабыт этнограф учуонай Г.В. Ксенофонтов аатын сүгэр. Национальнай бибилэтиэкэ тэрийиитинэн, бу дьыл бэс ыйыгар кини сиэнэ Михаил Леонидович уонна хос сиэнэ Анастасия эһэлэрин дойдутугар бастакыларын кэлэн бардылар. Ыччаты сайыннарар ити курдук араас өрүттээх тэрээһиннэри ыытаргыт олус бэртээхэй.
Юрий Лебедев, Дьохсоҕон, Таатта:
–Мин, дьиҥэр, Баайаҕабын. Ол эрээри тустууга дьарыктанаары, Дьохсоҕоҥҥо үөрэнэбин. Салайааччыларбыт Варвара Феодосьевна Колотинская уонна Любовь Петровна Тарбахова интэринээт оҕолоругар “Дьохсоҕон боотурдара” диэн бөлөҕү тэрийбиттэрэ. Эллэй “Талыы-кэрэ Сахам Сирэ” диэн хоһоонугар видеопоэзия устубуппут. Спортсмен буолуон баҕарар киһи үчүгэйдик саҥарарга үөрэниэхтээх. Тоҕо диэтэххэ, аан дойдуну кэрийэн күрэхтэһэр буоллаҕа дии. Онон эппитин-хааммытын эрэ эрчийэр буолбакка, тылбытын, өйбүтүн эмиэ дьарыктыыбыт.
Оҕолор бары дуоһуйа сынньана сылдьалларыттан тэрийээччилэр үөрэбит. Өссө 2 оҕо күһүн суол турдаҕына кэлиэхтээх.
Түгэнинэн туһанан, ҺӨҔҮҤ хамсааһын ыытар куонкурустарын өйүүр “Сосновый бор” кииҥҥэ, чуолаан дириэктэр Варвара Альбертовна Васильеваҕа, үлэһиттэр Марина Васильевнаҕа, Лена Михайловнаҕа уонна Александр Хабаровка махтанабыт.
Анисия Иевлева.
