5 месяцев назад 379
Төрүт үгэһи уонна политехническай үөрэҕи дьүөрэлээн
Мэҥэ Хаҥалас улууһун Дьабыыл агрооскуолата Чаачыгыйга “Илгэ” диэн лааҕырдаах. Бу лааҕыр базатыгар от ыйын 8 күнүттэн Майа И.Г. Тимофеев аатынан лиссиэйэ “Инженерный прорыв” диэн сезонун саҕалаата.
Салайааччы Михаил Соловьев буолар. Барыта 125 оҕо сылдьар.
Лааҕыр М.К. Аммосов аатынан Хотугулуу-Илиҥҥи федеральнай университет инженернай-техническэй институтун, физико-техническэй институтун, научнай коллаборация дьиэтин, инфраструктурнай технология коллеһын, АйТи-кубу, саахымат улуустааҕы киинин кытта ситимнээхтик үлэтин торумнаан ыытар.
ХИФУ инженернэй-техническэй институтун преподавателлэрэ Александр Будикин, Егор Слободчиков, ФТИ лабораториятын салайааччыта Михаил Ченянов, полимернай матырыйааллары үөрэтэр химия хайысхатын настаабынньыга Николай Слепцов, оҕолору наукаҕа сыһыаран, уруок ыыта сылдьаллар.
Саахымат Мэҥэ Хаҥаластааҕы киинин педагога Гаврил Колосов умсугутуулаах, өйү, толкуйу сайыннарарга аналлаах дьарыгы тэрийэр.
Ахсаан, физика, информатика, медиа-суруналыыстыка, уус-уран тылга уһуйуу, бырайыактааһын хайысхаларын Майа лиссиэйин учууталлара үөрэтэллэрэ былааннанар.
Улууспут өйөбүлүнэн медиа-суруналыыстыка салаатыгар аныгы ирдэбилгэ эппиэттиир тиэхиньикэлээхпит олус тоҕоостооҕун салаа салайааччыта Федор Жирков бэлиэтиир.
Бары тэрээһиннэрбит сахалыы сайаҕас тылынан ыытыллаллар. Оҕолор алта этэрээккэ арахсан дьарыктаналлар, сынньалаҥнарын көхтөөхтүк атаараллар.
Күннэтэ оҕолор үөрэнэллэрин таһынан, оҕуруот көрөллөр, титииккэ ыанньыксыттарга көмөлөһөллөр.
Лааҕыр матырыйаалынай тирэҕин бөҕөргөтүүгэ үлэлэһэн, тыа сирин олоҕор, айылҕаҕа чугаһыыллара хайҕаллаах.
Баһаатайдарынан устудьуоннар, ол иһигэр лиссиэй выпускниктара уонна үрдүкү кылааһын үөрэнээччилэрэ үлэлииллэр.
Иллэҥ кэмнэригэр күннэтэ эттэрин-сииннэрин эрчийэн, спордунан дьарыктаналлар, маассабай көхтөөх оонньуулары көҕүлүттэн туталлар.
Лааҕыр үлэһиттэрэ биир сүбэнэн оҕолор үөрэх саҥа дьылын күүс-уох мунньунан көрсөллөрүн туһугар кыһамньылаахтык үлэлииллэр.
“Илгэ” лааҕыр базатын олус тупсаҕайдык тэрийбит Дьабыыл нэһилиэгэр, оскуолатыгар, улуус салалтатыгар, үөрэх управлениетыгар махтанабыт.
Мидена Петрова, Майа лиссиэйин учуутала.
