2 недели назад 363
Сахалыы комикс күрэҕэ түмүктэннэ
“Ааҕар Саха сирэ” түмсүү тэрийэн ыыппыт “Саха номоҕун аах – комикс уруһуйдаа” өрөспүүбүлүкэтээҕи күрэҕэ түмүктэннэ.
Барыта 21 үлэ киирбит: Дьокуускай куораттан, Амма, Бүлүү, Кэбээйи, Мэҥэ Хаҥалас, Ньурба, Сунтаар, Үөһээ Бүлүү улуустарыттан.
Куонкурус ирдэбилигэр комикс кээмэйэ, уруһуйданар ньымата (көмпүүтэргэ дуу, уруучуканан дуу, араас өҥнөөх харандааһынан дуу, акварелынан дуу, о.д.а.) чопчу ыйыллыбатах буолан, ким хайдах сатыырынан ойуулаабыт.
Омоҕой Баай, Эллэй Боотур, Тыгын Дархан, Майаҕатта Бэрт Хара, Ньырбачаан, Ый Кыыһа, Суоһалдьыйа Толбонноох, о.д.а. тустарынан номохторго, ону тэҥэ олоҥхо сюжетыгар олоҕуран уруһуйдаабыттар.
Дьүүллүүр сүбэҕэ Арассыыйа худуоһунньуктарын сойууһун чилиэнэ Мира Аргунова, “Айар” кинигэ кыһатын худуоһунньуктарын отделын сэбиэдиссэйэ Нина Давыдова, Национальнай бибилэтиэкэ үлэһитэ, “ҺӨҔҮҤ” хамсааһын көҕүлээччитэ, суруналыыс Анисия Иевлева, Национальнай архыып үлэһитэ, олоҥхо тиэмэтигэр сыыппара худуоһунньуктарын мультимедийнай быыстапкаларын тэрийбит Светлана Яковлева, “Барҕарыы” пуонда дириэктэрин солбуйааччы, тыл билимин хандьыдаата Мария Кириллина үлэлээтилэр
Күрэх сүрүн спонсора – “Барҕарыы” пуонда, дириэктэр Афанасий Васильевич Постников.
Түмүгү билиһиннэрэбит:
I үрдэл – Күннэй Петрова, Ньурба гимназиятын Х кылааһын үөрэнээччитэ. “Ньырбакаан” – 7000 солк.
II үрдэл – Дайаана Иванова, Үөһээ Бүлүү улууһун Дүллүкү Х кылааһын үөрэнээччитэ. “Майаҕатта Бэрт Хара” – 5000 солк.
II үрдэл – Сайаана Бережнева, Дьокуускай куорат Айыы кыһатын үөрэнээччитэ. “Майаҕатта” – 5000 солк.
III үрдэл –Андрей Чинхоин, Кэбээйи улууһун Сиэгэн Күөл XI кылааһын үөрэнээччитэ. “Үс дойду үһүйээннэрэ” – 3000 солк.
III үрдэл – Милана Софронова, Амма 1-кы нүөмэрдээх оскуолатын VI “в” кылааһын үөрэнээччитэ. “Ньургун Боотур уонна Уот Уһутаакы” – 3000 солк., ону тэҥэ А.Иевлева тус бирииһэ.
III үрдэл – Айсана Юмшанова, Дьокуускай куорат Айыы кыһатын VIII “а” кылааһын үөрэнээччитэ. “Ый Кыыһа” – 3000 солк.
Биһирэбил бириистэр:
Джульетта Ноговицына, Ньурба улууһун Хатыы оскуолата. “Омоҕойдоох Эллэй” – 1000 солк.
Бүлүү улууһун Тааһаҕар оскуолатын Х кылааһын үөрэнээччилэрэ (сал. О.С. Каратаева), “Суоһалдьыйа Толбонноох – 1000 солк.
Трофимова Нарыйаана, Сунтаар улууһун Күүкэй оскуолатын Х кылааһын үөрэнээччитэ. “Манчаары Кутанаҕа сырыыта” – 1000 солк.
Күрэхтэһиини өйөөбүт “Барҕарыы” пуондаҕа, чуолаан дириэктэр Афанасий Васильевич Постниковка, итиэннэ эспиэрдэргэ уонна кыттыбыт оҕолорго, төрөппүттэргэ, учууталларга тэрийээччилэр махталларын тиэрдэллэр.
Бириистэри ыларга билсэр нүөмэргит: +7 968 155-48-17
