2 дня назад 1063
Дэбдиргэҕэ Ньурба тыйаатыра ыалдьыттаата
Игидэй оскуолатын оҕолоро Ньурба тыйаатырын артыыстарын кытта бэрт истиҥник, иһирэхтик кэпсэттилэр. Артыыстар оҕолор биэрбит ыйытыыларыгар эппиэттээтилэр.
Онтон киэһэ Алексей Балакаев айымньытынан “Ийэ сүрэҕэ” диэн (реж. Юрий Макаров), чахчы, үчүгэй испэктээги көрдөрдүлэр. Тыаһа-ууһа, уота-күөһэ, артыыстар оонньуулара көрөөччүлэри сөхтөрдө.
Ийэ – Сардаана Михайлова, Миндьээ – Вера Лазарева, Ойууна – СӨ үтүөлээх артыыһа Майя Слепцова, Саарка – Надежда Афанасьева, Саарка чаҕардара – Олег Конощюк, Эдуард Ларионов, Пүрбээ – Никита Григорьев.
Ийэ барахсан сүрэҕэ – оҕоҕо. Бу дириҥ өйдөбүллээх уобараһы Сардаана Михайлова толору арыйда, ийэ оҕотун туһугар долгуйуутун сүрдээх итэҕэтиилээхтик оонньоото. Кинини кытта тэҥҥэ ити турукка киирэн ылаҕын. Саарка оруолун толорбут Надежда Афанасьева олус талааннаах артыыска эбит. Омсолоох дьоруой да буоллар, көрөөччүнү бэйэтигэр умсугута тарта.
Пүрпээ – Никита Григорьев оонньуурун астына көрдүм. Саарка чаҕардара кинини кэлэн ылалларыгар хамсаныылара испэктээги тыҥааһыннаан, тэтимирдэн биэрдэ, олус киэргэттэ. Ол көстүү хараҥа күүс аан дойдуну даҕаны бүтүннүү сабырыйыан сөбүн сэрэтэр курдуга… Ол эрээри сырдык ыраас тапталтан олох тиллэрин, тылларын бу испэктээк бигэргэттэ.
Ийэ сүрэҕэр оҕото өрүү баар! Оттон Миндьээ тапталыгар киһи итэҕэйэр.
“Уот Дьулустаан” сериалга Сүөкүлэни оонньообут Майа Слепцованы оскуолаҕа буолбут көрсүһүүгэ көрөөт тута билбитим. Кини оонньуурун илэ көрөр – бэйэтэ дьол! Ханнык да уобараһы кыайа-хото тутар артыыска.
Ньурба тыйаатырыгар бу айымньы иккиһин турбут. Бастакытын Саха АССР үтүөлээх артыыһа, режиссер Спартак Слепцов туруора сылдьыбыт. Ону эмиэ көрүөхпүн баҕардым.
Худуоһунньук Дарья Тартакынова бэртээхэй үлэни оҥорбут. Барыта биир ситим. Сыана тыына, тыас-уус, муусука, ырыа, үҥкүү көрөөччүнү калмык дойдутугар сырытыннаран аҕалар.
Бэртээхэй киэһэни бэлэхтээбит Ньурба тыйаатырын артыыстарыгар махтанабыт. Айымньылаах үлэҕит ситиһиилээх буоллун, үгүс көрөөччүлээх буолуҥ.
Игидэй нэһилиэгэр саҥаттан саҥа испэктээк кэһиилээх кэлэ тураарыҥ.
Гизелла Софроновна Попова, Игидэй, Таатта.
