Сахалыы сэһэргиибит 1 неделя назад 544

Хорсун буойун сырдык аатыгар

Анал байыаннай дьайыыга сырдык тыыннарын толук уурбут уолаттарбыт тустарынан биир дойдулаахтарыгар кэп­сиир уонна сурукка тиһэн хаалларар, үйэтитэр  ытык иэстээхпит.

Бүлүү улууһун Илбэҥэ сэлиэнньэтигэр муус устар 5 күнүгэр М.А. Алексеев аатынан оскуола выпускнига, анал байыаннай дьайыы кыттыылааҕа, “Эр санааланыы” уордьан кавалера Николай Николаевич Васильев сырдык кэриэhигэр «Патриоты Родины» диэн өрөспүүбүлүкэтээҕи байыаннай-спортивнай күрэхтэhии  ыытылынна.

Коля  1994  сыллаахха 6 оҕолоох Васильевтарга тѳрдүс оҕонон күн сирин көрбүтэ. Дьылҕа Хаан тыйыс ыйааҕынан, аҕата эдэр сааһыгар олохтон туораабыта. Онон 6 бытырыыс оҕону ийэлэрэ Елизавета Егоровна иитэн-харайан, аймахтара кѳрсѳн, этэҥҥэ улаатыннарбыттара.

Оскуолаҕа үөрэппит учууталлара: “Коля элбэх саҥата суоҕа, киhи эрэнэр киhитэ этэ, дьоҥҥо кыhаллара, болҕомтолооҕо, үтүѳ санаалааҕа, бэйэтин кыанар буолан, спортивнай кү­рэхтэһиилэргэ, араас тэрээһиннэргэ көхтөөхтүк кыттара”, – диэн бэлиэтииллэр. Оттон бииргэ үөрэммит доҕотторо Коля доҕор быһыытынынаан эрэллээҕин, эппиэтинэстээҕин, кинини кытта бииргэ дьоллоох оҕо сааһы билбиттэрин ахталлар.

Коля үлэтин 2020 сыллаахха Бүлүүтээҕи ойуур баhаарын умуруорар авиционнай сулууспаҕа саҕалаабыта. Бииргэ үлэлэспит уолаттара: “Өрүү инники күөҥҥэ сылдьара, үлэҕэ эппиэтинэстээхтик сыһыаннаһара, бэриниилээҕэ көстөрө, туруорбут сыалын ситиһэ сатыыра”, –  дииллэр.

 2022 сыллаахха дойдутун көмүскүүр сыаллаах-соруктаах анал байыаннай дьайыыга барбыта,  Донецкай өрөспүүбүлүкэҕэ сэриилэспитэ.

2024 сыллаахха, баара-суо­ҕа 30 сааһыгар, анал байыаннай дьайыыга олоҕун толук уурбута…  

Нэһилиэкпит биир биллэр-көстөр ыччатын, оскуолабыт  выпускнига   Николай Васильевы мэлдьи ахтыахпыт-саныахпыт.

Күрэхтэhиигэ барыта 6-лыы киhилээх 9 хамаанда кытынна:  «Искра» (Халбаакы),  «Динамит» (Бүлүү куоратын «Авиалесохрана» тэрилтэтэ), «Звезда» (Кыhыл Сыыр), «Биир сомоҕо» (Чинэкэ), «Мохсоҕол» (Горнай улууhун Орто Сурт), «Дьулуур» (Баппаҕаайы оскуолата,) «Феникс» (Баппаҕаайыттан тѳрүттээх устудьуоннар), «Молодая гвардия» (Баппаҕаайыттан тѳрүттээх үлэhит, устудьуон ыччат), «Легенда» (Баппаҕаайы эдэр ыччата).

Ийэ дойдуну кѳмүскээччигэ анаммыт ураты тэрээhиҥҥэ сыаналаах бириистэрин туруорбут Николай чугас дьоно, кэргэнэ Евдокия Александровна, ийэтэ Елизавета Егоровна, бииргэ тѳрѳѳбүттэрэ, эбэлэрэ Елизавета Алексеевна, Татьяна Игнатьевна, аймахтара, бииргэ үѳрэммит, үлэлээбит доҕотторо, табаарыстара, нэhилиэк дьоно-сэргэтэ муhуннулар.

Чугас дьоно, оскуола дириэктэрэ П.А. Алексеев, Баппаҕаайы нэhилиэгин баһылыгын солбуйааччы Г.И. Алексеев, Ил Түмэн дьокутаатын кѳмѳлѳһѳѳччүтэ, “Адем” тутуу хампаанньатын генеральнай дириэктэрэ А.А. Григорьев күрэхтэhээччилэргэ кыайыыны-хотууну, тулууру ситиhэллэригэр алгыс тылларын анаатылар. Патриот уолбут Николай туhунан кэпсээн, ахтан ыллылар. Тыымпыттан кэргэнин аймах дьоно Анна Николаева, Платон Еремеев ырыаларын бэлэх ууннулар.

Аҕыс түһүмэхтэн турар күрэхтэhиигэ хас биирдии кыттааччы хамаанда дьоҕурун, сатабылын, кыаҕын тургутан кѳрдѳрдүлэр:

1. Бэйэни билиhиннэрии.

2. АК-74  аптамаат сааны  ыhыы-хомуйуу.

3. Аптамаат маҕаһыынын буулдьанан толоруу.

4. Эт-сиин кыаҕын кѳрдѳрүү (уолаттар тардыналлар, кыргыттар пресс хачайдыыллар).

5. Бириэмэҕэ моһоллору ааһыы, суhал кѳмѳнү оҥоруу.

6. Мас хайытыы, саhааннаан туруоруу.

7. Ойбону алларыы.

8. Эстафета (хайыhардаах, салааскалаах, бэрэбинэ үрдүнэн сүүрүү, сыыллыы, граната быраҕыы, сүүрүү).

Күрэхтэhии түмүгүнэн:

I миэстэ – «Феникс» (Баппаҕаайыттан тѳрүттээх устудьуоннар хамаандалара, хамандыыр Васильев Даниил Сергеевич). Хас биирдиилэригэр – ЖК телевизор.  Елизавета Егоровна оҕолорун уонна аймахтарын кытта туруордулар.

II миэстэ – «Молодая гвардия» (Баппаҕаайыттан тѳрүттээх үлэhит, устудьуон ыччат хамаандата, хамандыыр Яковлев Анастас Алексеевич). Коля табаарыстара, доҕотторо туруорбут робот-пылесостара, гайковерттар.

III миэстэ – «Легенда» (Баппаҕаайы эдэр ыччатын хамаандата, хамандыыр Васильев Денис Христофорович). Бүлүүтээҕи “Авиалесоохрана” 5 тыһыынчалыы солкуобайы харчынан биэрдэ.

«Кыайыыга дьулуурун иhин»  – «Биир сомоҕо» (Чинэкэ хамаандата. Е.Е. Васильева бииргэ үѳрэммит 1984 с. выпуһа сэртипикээттэри спонсордаата.

Халбаакы «Искра» хамаандатыгар  ИП «Огудов А.П.»  уонна доҕотторо 50 000 солк. харчынан туттардылар.

«Бастыҥ визитка» – «Динамит» (Бүлүү куоратын «Авиалесохрана» хамаандата). Баппаҕаайы олохтоох дьаһалтатыттан (баһылык Е.А. Николаев) сэртипикээттэр.

Биирдиилээн кѳрүҥҥэ бастыҥнар:

АК-74  аптамааты ыhыы-хомуйуу – Никифоров Анатолий Анатольевич («Легенда», Баппаҕаайы), Алексеева Елена Гаврильевна («Молодая гвардия», Баппаҕаайы). Кинилэргэ Николай Васильев бииргэ үѳрэммит 2012 с. выпуһун оҕолоро 5000 солк. харчынан бириистэрэ.

Аптамаат маҕаһыынын буулдьанан толоруу – Чемезов Мирослав Евгеньевич («Мохсоҕол», Орто Сурт), Николаева Чэмэлинэ Афанасьевна («Феникс», Баппаҕаайы). Бириистэрин Тыымпыттан Николай кэргэнин аймахтара туруордулар –5000 солк харчынан.

Уолаттарга тардыныы – Никифоров Анатолий Анатольевич («Легенда», Баппаҕаайы). Елизавета Алексеевна бирииhэ – казан. Кыргыттарга пресс хачайдааһын – Яковлева Сияна Алексеевна («Молодая гвардия», Баппаҕаайы). Чинэкэттэн Семенова Татьяна Игнатьевна бирииhэ – аэрогриль.

Ойбону алларыы – Герасимов Семен Васильевич («Биир сомоҕо», Чинэкэ). Николай кэргэнэ Евдокия Александровна бирииhэ – балаакка.

«Бастыҥ хамандыыр» – Яковлев Анастас Алексеевич («Молодая гвардия», Баппаҕаайы). Николай ийэтэ Е.Е. Васильева Е.Е. – электрошашлычница.

Саамай эдэр кыттааччы – Николаева Чэмэлинэ Афанасьевна (Баппаҕаайы). М.А.Алексеев аатынан оскуола дириэктэрэ П.А. Алексеев  бирииhэ – 2000 солк. харчынан.

Саамай аҕа саастаах кыттааччы – Михайлов Александр Прокопьевич (Чинэкэ).  Баппаҕаайы оскуолатын дириэктэрэ П.А. Алексеев бирииhэ – 3000 солк. харчынан.

Анал бириис – Васильев Даниил Сергеевич («Феникс», Баппаҕаайы). С.А. Еремеева бирииhин тутта.

Кыргыттарга «Саамай сымса сытыы, тулуурдаах кыттааччы» – Иванова Елизавета Николаевна («Динамит», Бүлүү «Авиалесохрана»).  Чинэкэттэн Мария, Василий Орлосовтар бириистэрэ – мүѳт нобуора.

Уолаттарга «Саамай сымса сытыы, тулуурдаах кыттааччы» – Ионов Николай Николаевич (Орто Сурт). Николай Васильев анал байыаннай дьайыыга биир сулууспалаахтарын бирииhэ – 70 тыh.солкуобайга саа сэртипикээтэ.

Тулуурдаах, дьулуурдаах, дьиҥнээх патриоттуу санаалаах ыччаппыт нэhилиэккэ олус сэргэх, бэрт тыҥааһыннаах, чаҕылхай күрэхтэhиини кѳрдѳрѳн,  сэргэхсийии күнэ тэрилиннэ. Ону тэҥэ анал байыаннай дьайыы кыттыылааҕа, хорсун-хоодуот уолбут Коля аатын үйэтитэн чиэстээтибит. Кини кэргэнигэр, оҕотугар, дьонугар, эрэллээх табаарыстарыгар кытаанах доруобуйаны, ситиhиилээх, дьоллоох олоҕу баҕарабыт.

Бу тэрээhини ыытарга сүүрбүт-кѳппүт тутаах дьон – оскуола учууталлара М.К. Иванова, Д.Н. Андреева, М.И. Афанасьева.

Ханнык баҕарар тэрээhини арыйыыга саҥаран-иҥэрэн киэргэтээччи ыытааччылар – И.Н. Жиркова, А.С. Винокурова.

Судьуйаларынан А.А. Антонов, Д.М. Иванов, С.Н. Васильев, Е.В. Николаева, комментаторынан Д.Н. Андреева үлэлээтилэр. Сырдатыы үлэтигэр (хаартыска, видео) – оскуолатааҕы “Кѳмүс бѳрүѳ” пресс-киин эдэр кэрэспэдьиэннэрэ (салайааччы Л.С. Тарасова уонна кѳмѳ видеограф С.Н. Николаева), муусуканан киэргэтии – С.А. Алексеева.

Хорсун буойун Николай Васильев кэргэнигэр, оҕотугар, чугас дьонугар, эрэллээх табаарыстарыгар, «Патриоты Родины» күрэхтэhиигэ  Бүлүү, Горнай улуустарыттан  кыттыбыт спортсменнарбытыгар истиҥник махтанабыт.

Бу күн историяҕа биир чаҕылхай тэрээһин буолан, бар дьон ѳйүгэр-сүрэҕэр сөҥөн хааллаҕа.

Людмила Сергеевна Тарасова,

Баппаҕаайы М.А.Алексеев аатынан оскуолатын учуутала,

 “Кѳмүс бѳрүѳ” пресс –киин салайааччыта.

Илбэҥэ, Бүлүү.