Дьүрүлү дьүһүйүү

Дьүрүлү дьүһүйүү. Бу этиини судургутук быһаардахха, дьүрүл диэн муусука, оттон ону кыраасканан дьүһүйүү – уруһуй. Эдэр худуоһунньуктарга оннук сорук турбут: кэрэ матыып дорҕоонун киистэнэн ойуулаан, биитэр скульптура, инсталляция оҥорон көрдөрүҥ диэн.

Дьэ, онуоха хас биирдиилэрэ хатыламмат хартыыналары суруйбуттар, араас оҥоһуктары айбыттар: ким эрэ муус чопчу таммалыырын ырыа курдук истэр эбит, хайалара эрэ хаар хаачыргыырын доҕуһуол оҥостор эбит.

Итинник ураты быыстапка Дьокуускай куорат Ю.А. Гагарин аатынан Култуура уонна аныгы ускуустуба киинигэр муус устар 4-8 күннэригэр көрдөрүүгэ турда. “Дети рисуют музыку” диэн.

Ааптардар – Л.А. Ким аатынан Оҕо ойуулуур-дьүһүннүүр оскуолатын уруһуйга уһуйааччыта Анна Дмитриевна Саввина уонна Оҕо ускуустубатын 1-кы №-дээх оскуолатын муусукаҕа үөрэтэр учуутала Наталия Александровна Васьковская.

Быыстапкаҕа Л.А. Ким аатынан Оҕо ойуулуур-дьүһүннүүр оскуолатын уруһуй IV кылааһын үөрэнээччилэрин үлэлэрэ турда. Түөрт сыл үөрэммит дьон сиэринэн, оҥоһуктара да, хартыыналара да хаачыстыбалаахтар уонна киһи сэҥээрэр гына кэрэхсэбиллээхтэр.

Үөрүүлээх тэрээһиҥҥэ култуура миниистирин солбуйааччы Мария Турантаева, Дьокуускай куорат дьаһалтатын култуураҕа уонна духуобунай сайдыыга салалтатын идэлээх сойууһун бэрэссэдээтэлэ Пелагея Левина, Л.А. Ким аатынан Оҕо ойуулуур-дьүһүннүүр оскуолатын дириэктэрэ Николай Птицын, Оҕо ускуустубатын 1-кы №-дээх оскуолатын дириэктэрэ Максим Шумилов кыттыыны ыллылар, эҕэрдэ тылларын эттилэр.

Ю.А. Гагарин аатынан Култуура уонна аныгы ускуустуба киинин дириэктэрэ Евдокия Винокурова:

– Неоэкспрессионист худуоһунньук Жан-Мишель Баския этэн турар: “Мин оҕо уруһуйдаабытын курдук ойуулуурга кыһаллабын”, – диэн. Бүгүн, чахчы, оннук ис сүрэхтэн кыһаллан уруһуйдаммыт хартыыналары көрөбүт. Бу үс сыллаах бырайыак уонна икки оскуола силлэһиитин, нууччалыы эттэххэ, коллаборациятын түмүгэ – айар үлэ күүстээх синергиятын көстүүтэ.

Биһиги бу Гагарин аатынан кииҥҥэ оҕолор айымньылаах үлэлэрин хаһан баҕарар үөрэ-көтө көрсөбүт уонна саалаларбытын бу курдук кинилэр талааннарын таһаарар түһүлгэҕэ кубулутарга бэлэммит.

Быыстапканы тэрийбит ааптардарга тыл биэрбиттэригэр, Анна Саввина үлэ хаамыыта хайдах барбытын аҕынна уонна уустук сорудаҕы толорбут худуоһунньук уонна мусукаан оҕолорго, махтанан туран, барыларыгар сэртипикээттэри туттартаата.

Наталия Васьковская:

-Классическай мусукаалынай үөрэҕи аҥаардас эксээмэнинэн эрэ сыаналаабакка, хааччахтыыр кыраныыссаны ааһан, атыннык тургутар санаа үөскээбитэ ыраатта. Маныаха идиэйэбин Анна Дмитриевна өйөөн, оҕолор үс сыл устата дьүрүл дорҕоонуттан үөскээбит уобарастарын ойууга түһэрэн дьүһүйэргэ холоннулар. Аны билигин төттөрүтүн уруһуйу муусука гынан көтүтэн көрүөххэ баара. Оттон ол олох туспа устуоруйа…