23 часа назад 356
Өксөкүлээххэ сүгүрүйэн
Айар тыл аҕата, бөлүһүөк суруйааччы Алексей Елисеевич Кулаковскай-Өксөкүлээх Өлөксөй бүгүн, ол эбэтэр кулун тутар 16 күнүгэр, төрөөбүтэ 148 сылын бэлиэтээн, үгэскэ кубулуйбут сүгүрүйүү түмсүүтэ Дьокуускайга буолан ааста.
Доҕордоһуу болуоссатыгар баар мэҥэ тааһыгар уопсастыбаннас сибэкки дьөрбөтүн уурда, сиэнэ Лариса Реасовна Кулаковская, култуура миниистирин солбуйааччы Мария Турантаева, Саха сирин суруйааччыларын сойууһун бэрэссэдээтэлэ Гаврил Андросов уо.д.а. тыл эттилэр.
1900 сыллаахха Өксөкүлээх Өлөксөй “Байанай алгыһа” хоһоону суруйбутуттан ааҕан, быйыл саха суругунан уус-уран литературатын 125 сыла бэлиэтэнэр. Ону сэргэ 2023-2027 сылларга өрөспүүбүлүкэҕэ Өксөкүлээх 5 сыла биллэриллибитэ. Онон улуу киһибит аатын үйэтитиигэ үлэ утумнаахтык ыытылла турар.
Төрөөбүт күнүн көрсө, кулун тутар 14 күнүгэр Николаев-Кииҥҥэ, бу архыып-бибилэтиэкэ уонна Мэҥэ Хаҥалас улууһун Павловскай В.Н. Оконешников аатынан орто оскуолата кыттыһан, “Мөккүөр түһүлгэтэ” диэн өй-билии оонньуутун уолаттарга анаан тэрийэн ыыттылар.
Алын сүһүөх кылаастар “Аман өс” күрэҕэр кытыннылар. Павловскай үөрэнээччитэ Георгий Кулаков кыайыылаах аатын ылла. Оттон V-XI кылаастарга дебат буолла. Бэһистэр, алтыстар «Тыа сиригэр олорор ордук дуо?» сэттистэр, ахсыстар «Интэриниэт: киһи аймах баайа уонна содула», тохсустар, онустар, уон бииристэр «Оҥоһуу өй: үтүө уонна мөкү өрүттэрэ» диэн тиэмэлэргэ санааларын эттилэр, бэйэлэрин көрүүлэрин кэпсээтилэр. Түмүккэ Павловскай хамаандалара V-VI уонна IX-XI кылаастарга бастаатылар. VII-VIII кылаастарга I миэстэни Дьокуускай “Айыы кыһата” оскуолатын оҕолоро ыллылар.
В.Г. Белинскэй аатынан кыраайы үөрэтэр бибилэтиэкэ ааҕааччылара Лариса Реасовна Кулаковскаяны кытта көрүстүлэр. Кини төрдүн-ууһун, бииргэ төрөөбүттэрин, Өлөөһө удьуорун туһунан кэрэхсэбиллээҕи кэпсээтэ, сэдэх хаартыскалары көрдөрдө.
Манна даҕатан эттэххэ, быйыл тохсунньу 24 күнүгэр Өлөөһөлөр форумнара буолбута. 1771 сыллаахха төрөөбүт Алексей Собакинтан тэнийэн барбыт халыҥ аймахха талааннаах, дьоҕурдаах, айдарыылаах элбэх киһи баара биллэр: суруйааччылар, салайааччылар, учуонайдар, артыыстар, уустар, спортсменнар…
Аны сарсын 17.03 бука барыгытын «Свет Кулаковского — Өксөкүлээх сардаҥата» диэн сылын аайы ыытыллар аахсыйаҕа кыттыһаргытыгар ыҥырабыт.
Аан бастаан уоту Өксөкүлээх сиэнэ, РСФСР норуотун үөрэхтээһинин туйгуна, СӨ үөрэҕириитин тиһигин бочуоттаах бэтэрээнэ Рива Реасовна Кулаковская сарсыарда 9.30 ч. Ытык Күөл “Таатта” литературнай-художественнай түмэлигэр баар Өксөкүлээх Өлөксөй балаҕанын көмүлүөгүттэн ылан уматыаҕа.
Ол түгэни бу https://m.vk.com/taatta_kultura сигэнэн быһа көрүөххүтүн сөп. Чахчыта да, Өксөкүлээх Өлөксөй бэйэтин норуотугар үйэлэр тухары умуллубакка сыдьаайар сырдыгы биэрбитэ.
Уонна түмүккэ, Өксөкүлээх Өлөксөй кинигэлэрин ааҕыҥ диэн туран, Ньурба улууһун Маалыкай олохтооҕо Афанасий Потапов Өксөкүлээх Өлөксөй “Саха интеллигенциятыгар” суругар оҥорбут буктрейлерын билиһиннэрэбит.
Хаартыскалары Е.Потоцкая, Николаев-Киин, куйаар аһаҕас ситимиттэн туһанныбыт.
