1 день назад 311
Хоһооннор – дьоннор…
Бүгүн СӨ норуодунай бэйиэтэ, суруйааччы, тылбаасчыт Михаил Елисеевич Тимофеев (15.03.1932–22.01.2013) төрөөбүт күнүнэн, Бүлүү куоратын Г.С. Донской аатынан 2-с №-дээх оскуолатын үөрэнээччилэрэ Адамов Айынаат, Дорофеев Рудольф, Иванов Мирон, Томский Меркурий, Томский Вильгельм, Рожин Артур, Павлов Мичил, Стручков Максим “Хоһооннор – дьоннор” диэн видеопоэзияны учуутал Раиса Васильевна Торотоева салайыытынан оҥорбуттарын билиһиннэрэбит. Кэрэхсэбиллээҕэ диэн, манна улуус баһылыга Сергей Николаевич Винокуров кыттыбыт. Кини култуура, ускуустуба, литэрэтиирэ дьон дууһатын иитэр, норуоту сомоҕолуур, барыларын сырдык санаа тула түмэр күүстээҕин дьэҥкэ өйдүүр буолан, бу маннык айар бырайыактары олус өйүүрүн, биир дойдулаах айар дьоннорун ааттарын үйэтитиигэ оройуон олохтоохторо бары сыһыаннаах буолаллара быдан көдьүүстээҕин бэлиэтээн, норуот күүһүнэн опералары, испэктээктэри туруорууну көҕүлүүрүн биһирии, хайгыы көрөбүт, атын салайааччыларга холобур оҥостобут.
Михаил Тимофеев, чахчы, чаҕылхай хоһооннордоох бэйиэт. Кини тылларыгар элбэх ырыа айыллыбыта. Ону Марина Попова, Матвей Лобанов, Анастасия Лыткина, Нина Чигирева, Анегина Ильина-Дмитриева курдук уһулуччулаах ырыаһыттарбыт, репертуардарыгар киллэрэн, үрдүк сыанаттан толороллоро. Михаил Елисеевич Саха Өрөспүүбүлүкэтин гимнин ааптардарыттан биирдэстэрэ буолар. Аны туран, кини саха дьахталларыттан бастакы лүөччүк Вера Захарованы прототип оҥостубут поэматыгар композитор Валерий Кац моноопера суруйан турар. Онегинныы строфанан “Ааныс” диэн хоһоонунан сэһэнэ эмиэ ураты болҕомтону ылар.
М.Е. Тимофеев кинигэлэрин кэллиэксийэтин бу сигэнэн киирэн, онлайн ааҕыаххытын сөп: https://new.nlrs.ru/collections/1377
