2 месяца назад 244
Түмсүү – сүдү күүс
Дьокуускай куоракка улуус землячестволара тэриллибиттэрэ отучча сыл буолла. Биир дойдулаахтар түмсүүлэрэ элбэх өрүттээх үлэни ыыталлар, төрөөбүт түөлбэлэрэ үөрүүлээх да, хомолтолоох да түгэннэригэр кинилэри кытары бииргэ буолаллар.
Ол гынан баран, 2021 сылга диэри улуус түмсүүлэрэ тэрээһиннээхтик бииргэ үлэлээһиннэрэ суох этэ, хас биирдии улуус бэйэтин биир дойдулаахтарын эрэ кытары үлэлэһэрэ.
Улуустар землячестволара бииргэ үлэлээһиннэрин тэрийэр инниттэн Дьокуускай куорат Аҕа баһылыгын иһинэн 34 улуус түмсүүтүн сомоҕолуур Сэбиэт тэриллибитэ 4 сыла буолла. Үлэтин сүнньэ куоракка баар улуустар землячестволарын түмүү, кинилэр үлэлэрин сүрүннээһин буолар.
Үлэбитин Сайсары күөл ытык кэрэ-бэлиэ миэстэ буолбутунан, дьон болҕомтотун онно туһаайаары, стела туруорууттан саҕалаабыппыт, күөл кытыытын субуотунньугунан ыраастаабыппыт. Сайсары – Саха сиригэр Эллэй, Омоҕой өбүгэлэрбит сахтарыттан ураты тыыннаах, иччилээх буолан, мааныланан, ытыктанан кэлбит кырдьаҕас күөл билиҥҥи кэми уонна түҥ былыргыны ситимниир сүдү күүстээх .
2021 сылга өрөспүүбүлүкэ бары улуустарыгар баһаардар тураннар, сүрүн үлэбит баһаары утары охсуһууга туһуламмыта. Улуус түмсүүлэрэ уоту утары охсуһууга добровольческай этэрээттэри тэрийиигэ, уоту умулларар тэриллэри, аһыыр аһылыгы, таҥаһы хомуйууга улахан көмөнү оҥорбуттара.
2022 сылтан Украинаҕа анал байыаннай дьайыы саҕаламмытынан, буойуттарбытыгар үгүс өрүттээх өйөбүл, көмө оҥоһуутун тэрийиигэ үлэлэһэбит. 2022 с. алтынньы 1 күнүгэр Сэбиэт өрөспүүбүлүкэ Уопсастыбаннай палаататын кытары Кангалассы баар мобилизацияламмыттары мунньар сиргэ буойуттарбыт санааларын бөҕөргөтөр тэрээһини ыыппыта. Улуустар землячестволарыттан харчы хомуйан, Саха Сириттэн байыастарбыт барар сирдэригэр сэргэ туруоран, алгыс түһэрэн, атаарыыны тэрийбиппит.
Сэбиэт чилиэнэ, Өлүөхүмэ түмсүүтүн салайааччыта Алексей Валерьевич Куприянов, улууһун баһылыгын сорудаҕынан, Арассыыйа илин эҥэригэр баар саллааттарын биир бастакынан кэрийэн көрсөн, көмө оҥорон кэлбитэ. Онон кини логистиканы үөрэтэн, байыаннай чаастары, Саха Сирин бэрэстэбиитэлистибэтин кытары билсиһэн, инникитин байыаннай дьайыы кыттыылаахтара кыһалҕаларын быһаарарга сибээс олохтоон, улуустарга уонна землячестволарга суолу тэлбитэ.
Анал байыаннай дьайыы саҕаланыаҕыттан Сэбиэт буойуттарбытыгар үгүс өрүттээх өйөбүл, көмө оҥоһуутугар, Дьокуускайга кэлэр байыастар биир дойдулаахтарын кытары көрсүһэллэрин, атааралларын тэрийиигэ, о. д. а. боппуруостарга туох кыалларынан көмөлөһө сатыыр.
Олунньу 21 күнүгэр Өрөспүүбүлүкэ норуоттарын ассамблеятын, А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтин, бойобуой дьайыылар бэтэрээннэрин “За Отечество” ассоциациятын, “Сэрии оҕолоро” өрөспүүбүлүкэтээҕи уопсастыбаннай тэрилтэтин, Ис дьыала министиэристибэтин уонна ис сэриилэр бойобуой дьайыыларга бэтэрээннэрин ассоциациятын, сэрии, үлэ, сэбилэниилээх күүстэр, быраабы араҥаччылыыр уорганнар куораттааҕы бэтэрээннэрин кытта итии точкалар, Афганистан, Чечня, анал байыаннай дьайыы, Аҕа дойду Улуу сэриилэрин кыттыылаахтарыгар, сэрии оҕолоругар аналлаах “Жить во славу Отечества” диэн патриотическай марафону тэрийэн ыыттыбыт.
Улуус землячестволарыттан анал байыаннай дьайыыга сырдык тыыннарын толук уурбут буойуттарбыт хаартыскаларын хомуйбуппутун марафоҥҥа туһанныбыт уонна видео оҥордубут.
Сэбиэт улуус землячестволарын күүһүнэн сыл аайы кэнсиэр тэрийэн ыытар. СӨ Бырабыыталыстыбатын, Ил Түмэни, куорат дьаһалтатын уонна уопсастыбаннай тэрилтэлэри кытары бииргэ үлэлэһэбит, улуустар куорат дьаһалтатын кытары хардарыта барыстаахтык бииргэ үлэлээһиннэригэр көмөлөһөбүт.
Куорат Думатын дьокутааттарыгар туруорсан, Дьокуускай 203-с микрооройуонугар баар СМАРТ-бибилэтиэкэҕэ саха классик суруйааччыта Николай Денисович Неустроев аатын иҥэрэллэрин ситистибит.
Ити курдук улуустар түмсүүлэрин Сэбиэтэ бары бииргэ олорор сирбит – Дьокуускай куораппыт, өрөспүүбүлүкэбит – сайдарын-тупсарын, ийэ дойдуну таптыырга, көмүскүүргэ ыччаты иитиигэ, төрөөбүт түөлбэни кытары сибээс быстыбатын туһугар үлэлэһэр.
Иван Неустроев, Сэбиэт бэрэссэдээтэлэ.
Хаартыскалар куйаар аһаҕас ситимиттэн.
